J'ai dans l'idée qui s'en va y'avé du feu d'satchi! Y'a bri d'eunne éléction pour Counnèstablye en ville; nou pâsle d'eunne députation, et j'ai oui dithe d'un fliotchet d'principaux qui s'en vont s'met' a g'nors d'vant l'Counnèstablye Piné pour le supplié en grâce d'avé la bonté d'consenti d'résté dans les manchots d'la tchéthue pour ocquo tchiq' années. I' m'semblye que j'les y vé! L'preumi f'tha un speech pour dithe que jommais d'sa vie i' n'avait veu d'si belle booe dans les rues; un autre ditha qu'y'a yeu pus d'rente d'touos l's autres Counnèstablyes; un trèsieme y'a fait juthé d'souos'tnin l'houmme qui nos a fourni d'la margarinne jaune. Et pis, y'en étha un autre qui ditha que l'houmme qui nos a promins d'la lumiéthe éléctrique a bouan marchi dét tésté au gouvernâs jusqu'a ch'qué sa machine fonctionne.
Enfin! Touôs ses amins - et n'y'a pas eunne ruette de la ville dans tchi n'y'en ait au mains yun - s'en vont ètre là, dans lus bouans habits, y'un d'chès jours, pour lis dithe a un houmme pour l'embeurré.
L'Counnèstablye respondra, coumme ils ont tous amor de faithe, qui n'a fait qu'sen d'vé, qu'il est prèt a vérsé san sang pour ses paraissiens, et qu'si tout a marchi pas mal ch'est seul'ment li qui faut r'mércié. i' ditha que pour de li, tout ithait d'travers et a la vaubathe, si ch'n'est l'souotchin qu'lis dounnent la Police, l'Coumiti des C'mins, l's Experts, et les deustrès clèrques de l'office.
Mais j'ai dans l'idée - ch'est ocquo qu'eunne supposition - qui pouorrait y'avé du feu d'satchi. Tchès qu'ou dithaites si mé, Piteur Pain, mé mettais sus les rangs? Ou riez! Et pourtchi, si vos pliait! J'sis d'âge de raison; y'a yeu des Pains de touos temps en Jerri, j'sis au rât; j'peux d'vîzé un Anglais aussi bin qu'abon d'forgeurs; tchi qu'a dit que je n'pouôrrais pon remplyi l'poste? Et si ch'est vrai qu'les Chantniers, la Police, l's Experts et les clèrques - ch'est les Counnèstablyes yeu même qui l'disent tréjous dans lus speech - font pour dithe tout l'travas, ch'peux tout aussi bin m'proumné par la ville, les mains dans les pouchettes, coumme autchin autre buzard. et dans l's Estats! Tchès qu'a dit que je n'pouôrais pon m'taithe tout aussi eloquemment coumme mes parchouniers? Et trejous je vot'tais a l'arbour de bain, pour faithe anglyi les recteurs! Vethe! ch'est quazi conv'nu: J'sis quazi candidat. "Reserve your votes!" coumme disait l'autre. et y'a étou chen'chin qui n'est pon de r'fus: touos les sequestres d'la chapelle a Laïzé sont d'man bord.
Tant pus j'y pense, et tant pus j'sis d'avis de dithe "Oui" a la deputation, s'ou vint par siez nous - a condition que nou m'dounne le temps d'consulté nos gens.
Et pis, coumme disait Laïzé: "Y'a chutte chaine! J'té vé dejà, man Piteur, a ouvri un bazaar, ou pôse un fond'ment, ou d'but sus eunne 'strade d'èscolle, a faithe un 'speech,' ov chutte chaine la atouôre de tan co! Eunne chaine qu'a couôté tchinze a djix-huit chents louis, a ch'que j'en comprends! Si tu'ès èslu, faudra la prêté a Lonôre pour qu'ou s'faiche photografé avec - la tante Betté en pouôrithait de dèspié!"
Ch'est conv'nu. si eunne Deputation - eunne "influential" deputation, vingtchinq ou trente principiaux - promettait de m'souôt'né, d'payi touôs les frais, la band, les ribbans, la litcheu (des "soft drinks" seulment, si vos pliait), les carosses, et tout l'bataclian, i'm bidam! la paraisse pouôrait m'vaie sus les rangs.
"Plump for Piteur and Progress!" Je n'sait pon ch'que ch'la veur dithe, mais v'la tchi f'thait tout l'monde voté pour mé, chose seuthe! Moussieu Piné étha fort a faithe pour ne pas perdre san collyi.
Piteur Pain
1916
Viyiz étout: