Enfin, garçons, chès pour Mardi,
Soignis de n'pas vos apierchi,
Et trouvous en temps à l'Ugnion,
Car chest bain seux qu'il y f'sa bon.
Je fésons cuize une tapais d'qué,
Pour cheux qui voudront lus stoffé;
Yéza du baize et du mangi
Pour goudalé et pour mâqui:
Y yen aiza pour tous les goûts,
Yeza du su, yeza du doux
Pour les uns yeza du paîvret,
Et pour les autres du salet;
Enfin tout y sça comme y faut.
Il est vrai quî gnièza rain d'caud,
Tout sça frait. Mais y sça bain cui,
Chez John de Caen qui va l'couqui;
J'nos allons avé les jambons,
Respé d'vous, de deux p'tits couochons
Qu'étaient justement bouans à prendre.
Je sis seux que ché sça d'qué tendre,
Et pis un tas de beu rôti;
Y yen aiza et tout d'bouilli,
Et pis du cidre et du pain frais,
Des pommes de terre et des pannais;
Et si quiqu'un est haîniqueux,
Yéza du podin sus l'drécheux,
Y yen aiza pour tout le monde.
Ou pouais v'nin d'un mille à la ronde,
Et mangi tous à tigue de cor
Comme sous étiez à la "Pomme d'Or."
Enfin, pour en bâfré vot' lot,
Votais pour le Chant'gni Cabot,
Et nommais le vot' député.

J'vos en prie venais du Huzé
Du Ban'lais, de la Taûpin'nie,
Du Clos Duzé, d'la Carros'sie,
D'la Huzette, d'la Mauve, et des Hayes,
Du Haut-de-l'Orme, et de Cambrais,
Du Tas-de-Jan, du Vert-Pignon,
De la Fosse et du Houguillon,
Du Pont, de la Hocquardézie,
D'la Ville-ès-Normans, des Côtis,
Du Moulin d'Haut, du Moulin d'Bas,
Du Carrefour, du Becquet-ès-Cats,
De l'Epine, et d'la Maze d'Angot,
D'la Quesnêe et d'Lamont Billot,
De Diélament et des Câtiaux,
Des Bouillons, des Hèches, et des Vaux,
D'la Parfonde-rue, d'la Pièche-Maugi,
Du Câté, du Pot-du-Roqui,
Et de l'Egypte et des Jannièzes,
Des Forges, et du Haut-des-Queizezes,
Des Hautes-Crouais, du Clos-Bisson.
De Sous-les-Bouais, d'la Grande-Maison,
D'la Maison d'Haut, du Haut-Pavet,
Dz'Augrès, du Gardin-d'Olivet,
D'la Houle-ès-Chians et du Creux-Bouonne;
J'entends si yavait quiqu' personne
Qui sçait là d'dans, déhalais-lé,
Et le faites v'nin déjeuné.

L'Anmin FLIPPE.