Pour la treîzime et dernièthe leçon à l'entou dé la bordèe d'êlection à St. Ou, né v'chin tchiques d'vis qué j'ai ouï, veu ou ouï dithe.
Savous, bouannes gens, pourtchi qué la band l'Union n'fut pas à la bordèe?
Mé, j'men vais vo's l'dithe. I' d'mandaient douze ch'vayièrs dé St. Georges dé v'nin èt quand nou zeut ouï ch'la au mîtinne, tchiques zuns firent la r'merque qu'avec chutte ch'vallelie, nou pouorrait certainement avé daeux viaux.
Chinq p'tits jaunets pour acater un viau, et ch'la à St. Ouain, mais v'là qu'est bein saeux. Et p'is pour des viaux qu'nou peut avé l'pedigree sièz l'engistraeux.
Tch'est qu'est l'sien qui fut averti dé sé trouvé l'lend'main matin, à djîns zhèuthes à la p'tite Cour, pour avé bâlyi trop d'sa goule.
Et pourtchi qu'nou lî dit ch'la d'pis qu'au Mêcredi, Mousieu l'Juge Vaudin n'a pas des At Home pour les siens qu'ont l'drouèt à un free lodging au Gloster Hotel.
I' yen avait iun qui tait dans la bliaze et comme i' né viyait pas assèz clié pour faithe unne crouaix, nou r'fusi d'accepté sa vouaix. et si nou zavé voulu lé mettre à l'abri du frais comme si v'là qu'éthait peut être fait, tchi qu'est lé Chantgni qu'éthait tèt content d'avé chutte salle job et tch'est qui sée s'rait passèt.
Jé pouorrais bein vo's en raconté bein d'aoutres, mais "Caouain", taie ta bec si tu né veur pas qué nou té teurtre le cô, chein qui pouorrait sé faithe dans la Cohue Royâle.
Nou pâle tréjous des êlections à St. Ou comme dé la pâraisse iou qui s'pâsse des saînnes comme nou vait pas âyeur.
Mé, j'ai veu mus. Ch'tait unne bordèe d'êlection qui s'pâssi ès Pierres-dé-Lé, pas bein loin d'Jerri, comme ou'le viyîs.
Là ètout, pour faithe pliaîsi ès siens qu'ont l'drouèt d'vouaix nou zaccate lus viaux.
Eh bein! i' yavait un richard qui tait lé propriétaire d'un viaux tchi tait tétouanne comme unne bourrique et quand i' voulait sé n'allé à bânnon, i' yavait unne job pour l'en empêchi.
Nou voulait savé ètout dans tchi près il allait brouter.
Iun des marchands qui voualit s'asseuthé dé chu viaux, d'pis qu'il avait dèhalèt unne douzaine dé p'tits jaunets dé d'dans sa bourse pour l'acaté, chu marchand s'fît: Pour savé tch'est qué chu viaux là aime mus et pour être saeux qui n's' êcappetha pas, comment i' faout qué j'm'y prenche. Unne raide bouanne idèe l'î vint. I' s'fît: pour un jour j'allons l'î rompre unne gambe. Et pis oprès l'avé hissetè dans l'kerre, j'l'amèneraons à l'êtabble. Jé s'rons là pour être saeux dans tchi bétchèt dé terre i' pilvaquetha.
Ma fingre, fouai dé Caouain, ch'la fut fait et tout alli d'charme. Et auprès nou mint le viau à bânnon. Et tchiques r'bouttaeux, pour saeux lé vit et r'mint sa gambe en bouan ètat, car nou pouvait l'vés sauticoté comme un critchèt tchique temps oprès et ch'la malgré les chitchettes qu'nou zavait laissi amathèes à l'entou d'la gambe.
Ch'la s'pâssi ès Pierres-dé-Lé' et les siens qu'en savent pus long, peuvent dithe qué ch'la est la puthe. plienne et entièthe véthitèt.
* * *
J'ai tèt au mîtinne dé pâraisse à la Trintè et j'ai ouï un biau speech qué fit iun des grands de la haoute Ville dé chutte pâraisse.
J'vo's en raconterai un p'tit but dans la gâzette dé Samedi tchi veint.
A bétôt, garçons.
Caouain
1911
Viyiz étout: