à Portinfé, Saint Ou.
Vendredi au sé.
Moussieu l'Editeu,
Comme le temps s'pâsse! I' n'y a pas longtemps le r'nouvé 'tait fini, et j'attendaimes d'un jour à l'autre le bieau êté tchi nou-s-avait 'té promînt par un tâs d'gens tchi prétendaient saver mais, comme nou-s-a veu, n'y connaissaient rein. Enfîn, si l'mais d'septembre nos donnit pûs d'mouoilliêtuthe et d'tempêtes que d'bieau temps, je n'pouvons pas nos pliaindre de chein que j'avons yeu chais trais ou quatre jours. Par ichîn, et j'crais bein étout siez vous, j'avons yeu hardi d'bieau solé. Même, il a fait si caud que par bordée nou-s-avait d'la peine à enduther la chaleur. J'ai yeu un coup d'solé dans mes pouôres gambes, et j'ai bein d'la peine à marchi. La Merrienne a souffert même pûs qu'mé, et au moment oulle est au liet, se frottant prèsque tout l'temps avec des medicaments tchi jusqu'ichîn n'pathaissent pas aver yeu autchune êffet. Oulle est yunne de chais femmes tchi craient que chein qu'y'a êcrit sûs la boutelle, ou la bouâite, de pillules est la véthité. Je n'gagne rein d'li j'vos l'ai dit bein des fais, oulle est têtoigne de natuthe, et oulle empliéthe en vieillissant, comme l'ânon à man grand'pèthe, tchi n'tait pas content d'vos fliantchi un co-d'pid dans san jeune âge, mais pûs tard vos en donnait un couplye, et vos mordait comme un tchan d'vant être satisfait.
À ch'teu', Moussieu, pour tchiquechose de pûs sérieux, et par chonna j'veur dithe l'élection pour Sénateurs. I' pathaît que n'y étha que chînq candidats pour les quatre vacances, et j'éthions 'té pûs contents, ma bouonnefemme et mé, si y'en avait yeu une douzaine, et même pûs. Des chînq, y'en a yun tchi s'en va tchais, mais j'n'en savons pas pûs long que la s'maine pâssée, sinon que dans m'n opinion, le Ph'lip Rom'thi s'est fait hardi d'bein chais jours, et dév'thait s'faithe seux à ch'teu' de v'nîn d'dans. I' m'semblye tch'il est certain d'aver hardi d'vouaix dans la Campagne. Autrement, j'n'ai autchune idée de chein tchi pouôrrait s'arriver. J'ai consulté la Merrienne, mais ou n'ma pas donné grande satisfaction.
En Angliétèrre ils ont à la fîn chouaisi un successeur pour Moussieu Macmillan, et si j'avions l'même systême ichîn, sans doute che s'sait ou l'Sénateur Cyril Le Mèrquand ou l'Sénateur Krichefski, mais pour le moment l'Ile n'est pas prête pour un changement si radical. Il est pôssiblye que d'vant long les membres r'chév'thont tchique paiements pour lûs services, et quand chonna veindra i' s'sa hardi intérêssant d'compather le paiement d'un Sénateur avec chein qu'un simplye Député voudra aver.
Nou peut comprendre l'anxiêté des pathens de chais deux filles tchi ont 'té en vacance hors d'Ile, et tchi n'lûs avaient pas êcrit pour neuf ou djais jours, mais je n'voudrais pas vos dithe tchèsque la Merrienne en crais, car ou pouôrrait s'trouvait d'vant la Grande Cour.
Pâslant d'autre chose, ou-s-avez sans doute liut dans la gâzette pour chutte compangnie tchi s'en va craitre des champignons dans tchique tunnel en Jèrri. Le Sieur Alexandre, de Saint Pièrre, est hardi concerné dans chu projet, tch'est pour fourni un tonné d'champignons par jour. Ch'est une drôle d'idée, mais la compagnie dait saver tchèsqu'ou fait, et la Merrienne, tch'aime hardi les champignons et peut en mangi à touos les r'pas, la souhaite tout succès. Oulle a caltchulé que si chaque homme, chaque femme et mousse mangent châtchun un champignon par jour, i' n'y en étha pas assez, même à un tonné par jour, pour les satisfaithe tous. Mais entre nou, Moussieu, je n'me fiêthais pas sûs ses chiffres, car ou n'a jamais 'té bein forte en mathématiques.
Je n'fus pas au grand show d'bêtes en Ville, mais nou m'a dit que ch'tait yun des miyeurs que Jèrri avait jamais veu. Par san portrait dans la Post, la vaque au Sieur Le Cornu, tchi fit l'championnat, éthait 'té difficile à battre dans autchune année, et j'me d'mande combein que san propriétaithe en d'mand'dait si un ach'teur se présentait. I' s'peut même qu'oulle est dêjà vendue, et ch'est seux qu'ou n'a pas 'té donnée pour rein, si chonna et l'cas.
Pour un fini, Moussieu, le Ernest Le Cornu est ocquo à s'prom'ner sûs l'Continent, et j'espèthe tch'i' r'veindra en santé.
Ch'est tout pour agniet, Moussieu. J'vos souhaite tout ch'que y'a d'miyeu. À bétôt.
Ph'lip
Viyiz étout: