Nos r'velà grés de deux bouans Chantn'iers pour treis ans d'pus.
Et tchi biaux discours que j'ouîmes à l'Hotel de Ville!
J'ai souvent pensé que ch'dait être bain difficile pour des orateurs qu'entreprannent de proposer ou de s'conder des candidats pour une poste tchelconque, de trouver autchune chose intêressante ou originale à dithe à l'appui d'lus candidat.
La personalité de l'orateur et la manièthe qu'i' s'exprime y va pour tchiquechose, mais ch'est tréjous la même chanson, che n'peut pas être autrement, des êloges sus les services du candidat par le passé et un long résumé de ses qualités; tchiques patholes sus l'excellence du système honorifique, une répétition des anciennes phrases "the right man in the right place," "top of the poll," etc.
Et v'la peutêtre pourtchi que les êlecteurs quand i' savent qu'i' n' s'en va pas y aver d'opposition, font preuve d'une manque d'intéthêt dans la chose publique, par lus absenter la séthée d'la nomination, mais ils ont grand tort et les orateurs l'aut' sé étaient parfaitement justifiés d'en faithe la r'merque.
Quand un fonctionnaithe public a sacrifié pour de longues années la pus grande partie d'san temps et fait de grands sacrifices de ses intéthêts personnels, la moindre chose que les êlecteurs pouraient faithe er'sait de montrer lus appréciation par remplye la salle la séthée d'la nomination.
Nou comprend bain que puor ieux le programme ne s'sait peutêtre pas bain amusant ni bain intérêssant, mais i' n'faut pas oublier que pour les candidats che s'sait de la pus grande importance, car au mains, ch'la lus prouvethait que lus services étaient appréciées à lus juste valeur et lus don'nait bain pus d'encouothagement de r'prendre le fardé sus les êpaules pour une autre gestion.
Sans vouler dépréciez la valeur des patholes êloquentes et sincèthes des proposants et s'condants le pus fort stimulant pour un serviteur public est une salle remplyie de fond en comblye d'êlecteurs erconnaissants.
Dans touos les discours de l'aut'e sé, la chose la pus frappante fut la pliainte formulée par notre amin le Chantn'yi Cabot et le grand désappointement qu'il êprouvi de réaliser qu'i' n'y avait pas de dames dans l'assistance.
Quant à mé, je fus surprins, car je n'li connaissais pas ches sentiments-là.
Je n'savais pas qu'il appréciait, à chu point-là la présence du "beau sexe."
Nos dames de St.Hélier ont évidemment mantchi à lus d'vé et i d'vraient acheteu en aver bain des r'mords de conscienche.
Chein qu'elles ont à faithe acheteu pour erpather la chose et pour erconsoler not'e galant Chantn'yi, est d'aller en grand nombre Samedi tchi vaint à la Cour Royale assister à s'n assermentation.
Je sis seux que George Vardon sé f'tha un pliaisi de lus trouver des sièges.
Et quant à nous, êlecteurs de la Ville, acheteu que je savons à tchi nos en t'nin, i'faut vaie que patheille chose ne se r'arrive pas dans treis ans d'ichin.
Et j'îthons même pus liain!
Pas un seul homme ne sign'ra san papi de nomination.
Che s'sa toutes des dames!
Sa proposante est toute trouvée.
Je la r'quémande Marie Hibou!
Il est un mio trop bouanne heuthe pour suggérer le nom de la s'condante et des autres signataithe du papi de nomination.
Car i' peut s'arriver des changements dans l'couothant de treis ans i' y a une chose que je pouvons garanti tréjous, ch'est que si je pouvons réaliser chu projet-là, quand vaindra la séthée d'la nomination, la salle de l'Hotel de Ville es'sa trop p'tite!
Caouain
2/10/1926
Viyiz étout: