L'Êlection
Ph'lip va à la Trin'té
Moussieu l'Editeu,
Mêcredi au sé j'tais à la Trin'té, car j'eut la chance d'être porté là et d'être ram'né siez-mé. Ch'tait, comme sans doute ou l'savez, l'occasion d'la reunion tch'avait tait convotchie pour oui tchèsque le moussieu tch'oppose le John Le Mérquand pour Sénateur avait à dithe.
"Ecoute bein, Ph'lip," s'fit la Merrienne comme je sortais, "et ne r'veint pas si tard que tu voudras allé t'couochi d'vant m'raconté chein tchi s'pâssé. J'n'ai pas l'honneur de connaître le Sieur Siouville, et y faudra qu'tu m'diche si ch'est un homme sûs tch'y qu'nou peut s'fié."
Quand je r'vint la v'la tout-d'suite à m'tchéstchonné. Ou n'me donnit même pas l'temps d'hallé mes bottes et d'mettre mes slippeurs, ou de dêsboutonné ma bianche dgène tchi m'êtrangliait. "Tchèsqu'y s'est pâssé," ou d'mandit. "Assièds-té et dis-mé tout. En approuve-tu du Sieur Siouville, et crais-tu tch'y f'thait un bouon Sénateur?"
"Eh bein, Merrienne," j'l'y dit, "oui, sûs un sens j'en approuve hardi. Il est charmant, un bouon Jêrriais, et y pâsle franchement et sans hésitâtion, mais, à ma veue, il a grand d'faut."
"Oh!" ou dit, "et tchèsqu'il est chu grand d'faut-là?"
"Il est teetotleur," j'l'y dit, "et n'y'a pas yeu d'invitâtion après l'meeting de ramonté à l'hotel ou à l'auberge pour bèthe à sa santé. Et mé tch'avais une sé abominablye."
"Comme de couôtume," ou dit, "quand ch'n'est pas té tch'y convie. Mais quant à mé ch'n'est pas un d'faut du tout. Au contraithe j'admithe un homme tch'y n'touche ni à bièthe ni à litcheu. Ch'est grand dommage que n'y en a pas pûs comme l'y."
"Il est prédicateur local," j'l'y dit.
"Y n'en est que d'mûs," ou dit. "J'qu'menche à vais qu'chest l'homme tch'y nos faut dans l's'Etats."
"P't'être bein," j'l'y dit, "mais un p'tit lérmin asêsé n'éthait pas fait d'ma quand-même. Enfin, hors de chonna, ch'est un bein charmant corps et un bouon campagard, et sans doute il étha des vouaix dans la campagne. Quant à la Ville, nou n'sait pas, mais nous a tréjous veu qu'un candidat d'la campagne peut battre yun d'la Ville s'il a des gens dans les pâraisses à travàillyi pour l'y. Pour vrai dithe dans ch't'êléction ichin non n'peut pas dithe, car, après tout, yun des candidats a tait dans l's'Etats tchiques années, et est président du Comité d'Education, tandis qu'l'autre est presque inconnu en Ville, et nou n'peut pas dithe que jusqu'ichin il a fait grand'chose."
"Y n'est jamais trop tard pour qu'menchi," ou dit, "est, après tout, y n'a qu'justement pâssé la prime de l'âge. J'ai ouï tch'il a souësante-deux ans."
"Ch'est vrai," j'l'y dit, "et bein seux tch'il a bouonne mine. Mais r'venant à la reunion, ch'est l'Connêtablye de Saint-Jean tch'a présidé, et il en a fait une raide bouonne djobbe. Il îtha un but, tu vêrras, le Clifford Le Vesconte."
"Nou pâsle raide bein d'l'y," ou dit, "mais y d'vait y'en avé d'autres sûs la piatforme."
"Notre amin Hedley Maillard a fait un bouon p'tit discours," j'l'y dit, "épis justement comme nou criyait que ch'tait tout fini, ne v'là l'Sénateur J. J. tch'arrive, et toute l'assembliée a applaudi. Il a pâslé pour à-bein-près vingt-chinq minutes, et je crais tch'il éthait peut continué pour une autre dem'iethe sans s'dêrangi. Sans autchune doute, il a la langue bein pendue, notre Jack, et y n'a pas d'peux de dithe chein tch'y pense."
"Ch'est un Saint-Ouennais," ou s'fit. "Y sont tous d'même. A-t'y pâslé du Service National?"
"Pas pûs qu'chonna," j'l'y dit, "mais y nos a dit tchèsqu'y pense des Députés d'la Ville. Damme! Merrienne, y n'les aime pas. Et y maintchein que si les campagnards ne r'gardent pas a yeux, chutte dgaingue-là d'la Ville ruin'na l'Ile."
"Ch'est hardi dithe," ou s'fit. "Y n'peuvent pas être tous si mauvais, mais dans un temps d'êléction y'a bein des choses dé dites que nou r'oublie après. Enfin, Ph'lip, n'en v'là assez pour assêsé. J'en r'pâsl'lons la s'maine tchi veint."
Ph'lip
20/2/1954
Viyiz étout: