|
Ch'fut en 911 qu'les anchêtres à la Reine, not' Duc, d'vîntent Ducs dé Nouormandie mais l's Îles d'la Manche n'taient încliues dans l'Duché qu'en 988.
D'vièrs 1030, lé Duc Robert I vînt en Jèrri.
En 1066, not' Duc, Dgilliaume lé Contchéthant contchéthit l'Angliétèrre et d'vînt Rouai d'Angliétèrre, mais lé Rouai Jean Sans-Tèrre pèrdit la Nouormandie continentale. La Nouormandie însulaithe restit louoyale au Duc, et ch'fut en 1204 qué j'èrchévînmes not' Constitution - la Constitution du Rouai Jean tchi garantit nos louais, not' gouvèrnément et nos couôteunmes. Lé Rouai nos vîsitit au mais d'Août 1213, et san fis Henri III vînt en 1230.
Quand l's Angliais exétchutit lé Rouai Charles I, not' Duc, ch'tait en Jèrri qu'san fis, lé Prînce Charles (pus tard lé Rouai Charles II, not' Duc) trouvait un lieu d'èrfuge. Et ch'fut en Jèrri, à Saint Hélyi dans lé Vièr Marchi qu'i' fut procliâmé Rouai pouor la preunmié fais.
Ch'tait don pouor èrmèrcier l'Île pouor l'aîgue tchi lî fut donnée qu'lé Rouai Charles II nos donnit la Mâsse qu'nou peut vaie ès Êtats d'Jèrri ou dans la Cour Rouoyale.
En 1846, la Reine Victoria, not' Duc, vînt en Jèrri. Oulle arrivit lé trais d'Septembre.
La s'gonde vîsite d'la Reine Victoria fut en 1859 quand oulle arrivit lé treize d'Août et vîsitit lé Collège Victoria tchi fut fondé pouor ramémouaither sa preunmié vîsite.
Lé Rouai George V vîsitit Jèrri en 1921, et la Cour d'Héthitage eut lieu en présence du Duc en Jèrri. Les Seigneurs fîtent honmage à lus Duc. Ch'tait pouor chutte vîsite qu'les êtchussons des douze Pâraîsses fûtent faits et qu'la banniéthe auve les trais léopards fut attatchie au d'ssus du siège du Bailli dans la Chambre des Êtats.
Auprès l'Otchupâtion, lé Rouai George VI, not' Duc, et la Reine vîntent vaie les gens d'Jèrri en Juîn 1945 auprès les longues années souos l's Allémands.
La Reine Lizabé II avait dêjà vîsité Jèrri en Juîn 1949 coumme Prîncesse, ma sa preunmié vîsite coumme Duc et Reine fut en Juilet 1957. Ou dêvouailit l'êtchusson d'san péthe sus l'bâtisse des Êtats pouor mèrtchi la vîsite du Rouai en 1945.
Ou r'vînt en Juîn 1978, quand ou vit la Crouaix d'la Reine à Charing Cross tchi ramémouaithe san Jubilé d'1977, et pis ou r'vînt acouo eune fais en Mai 1989. Oulle ouvrit lé neu bâtisse d'la Bibliothèque d'Jèrri et lé Port Elizabeth.
La Reine vînt acouo eune fais lé 13 dé Juilet 2001, au c'menchement d'eune séthie d'touônnées d'ses tèrritouaithes pouor mèrtchi san Jubilé en 2002.
La Reine, not' Duc, à èrchéver l'honmage des Seigneurs dans l'Par Howard Davis, lé 13 dé Juilet 2001.
L'Avenue de la Reine, à St. Pièrre, et La Route du Port Elizabeth, à St. Hélyi, 'taient nommées pouor lyi.
La Reine fut née en 1926. Ou mathyit l'Prînce Ph'lippe en 1947 et san fis, l'prînce héthitchi, l'Prînce Charles fut né en 1948. La Prîncesse Rouoyale, la Prîncesse Anne, fut née en 1950.
En 1952, san péthe, lé Rouai George VI, not' Duc, mouothit et ou vînt au trône. La Coronâtion eut lieu en 1953.
Oulle eut acouo deux fis: André, en 1960, et Êdouard, en 1964.
Dgieu sauve la Reine!
Viyiz étout:
