Les Pages Jèrriaises

Eune lettre dé 1890

 

Moussieu,

Com j'sis iun des lecteurs de vot Gazette j'vos r'mercie de gran tcheu pour vos bouans souhaits. J'enne peux pon m'empêchi en maime temps qu'd'admiré vos opinions entouorr nos respectables Ministres. Tchi ma ès tchil ont janmais fait dans l'Etâts, chès poares gens! Ah Moussieu l'Editeu, tchi noble articlle d'fond qu'ou avez en raiponse à chut échervelle de D'pûté et au viairr papi tchi'l saoustchein.

J'espairr qu'nos Messieurs dans l's Etats li en bâdront du fi a errteurtre et qu'l's électeurs s'en rassouvaindront de chute abominable proposition.

Qu'nou change, com ou l'dites, Moussieu, la loué sur le Quorum et qu'nou nos baille Siez Députés en Ville, iun par Vingtaine, et j'errons à peu près, ché tchi nos faôut.

Si ou viiis Jan d'la Maze, faites li bain mes complimans et enseigniis li, en s'crait, oùeque ma cabane est pitchie et si fait bé j'l'attendrons le Vier Noué, et Janneton L'Amiêtchi aitou.

Le Mousse
rue de la Rainne, en Jèrri,
chu 26 Déc, nonante

Nouvelle Chronique de Jersey 27/12/1890  

 

Viyiz étout:

 

Les Pages Jèrriaises