V'là l'Election Générale qu'appréche et v'là-t-il pas la Marie Hibou qui r'est à faithe san train. Tchiqu'uns li ont dit que Mrs. Trachy s'en va y arriver, et ou n'vait pas pourtchi qu'ou ne s'sait pas Député ettou lyi.
Oulle en avait touchi tchiques patholes, i'y a tchique temps à des gens ichin en ville, mais ou vint bain vite à vaie qu'ou n'tait pas trop gouotée dans l'district, les gens sont v'nus à la connaître ou viyiz, mais ou n'a pas perdu couothage pour chenna.
Ou pâle acheteu d'opposer tchiqu'un des Députés d'la campagne, car, comme ou dit, i'n'est pas absolûment nécessaithe de d'meuther dans la pâraisse; oulle a deustrais précédents qu'ou peut citer.
Je n'sais pas sus tchi pâraisse qu'oulle a idée de s'imposer, mais i'y a une chose tréjous, mes chiers lecteurs, si ch'est la vôtre, je vos en prie d'aver un mio d'considéthation pour le pouore vier Caouain, qu'a tréjous fait d'san mus pour vous, et he vos supplie de n'baîlli pas le moindre encouothagement à Marie Hibou, et si ch'est qu'oulle est minse en avant, votez tous contre lyi.
Viyons tchi pité qu'i y aithait sieznous si jamais ou v'nait à réaliser s'n ambition!
Oulle est gentiment populaithe avec certains des membres d's Etats et ou s'sait bain seuthe d'être nommée sus une masse du Comités. Ou ne s'sait jamais sieznous, sapresti!
Che s'sait mé qui s'sais obligi de coutchi les r'pas et de r'graie les cauches ès p'tits caouains, et je vos asseuthe que j'tremblye d'appréhension, raique d'y penser!
C'est pourtchi, mes chiers lecteurs, s'ou'voulez faithe pliaisi au pouore Caouain, votez contre Marie Hibou.
Caouain
Cs 18/11/1922
Viyiz étout: