Moussieu L'Rédacteu,

La gâzette dé Jèrri du 31 de mar, 1983, est bein intérêssante. À c'menchi, en l'ouvrant nou vait un articl'ye tchi nouos dit qu' un boutitchi est en train d'actionner d's hommes d'affaithes, les atchusant dé l'aver mal consilyi dans eune affaithe d'atchêt. Ch'n'est pon souvent qu' nou vait tchiquechose dé même. Ch'est l'contraithe dé l'ordinnaithe, car l'avis d'l'homme d'affaithes est généralement la base d'un procès dévant la Cour Rouoyale.

La gâzette nouos montre, étout, lé portrait du nouvieau Chef dé la Police Salariée tchi s'en va c'menchi sa gestion lé preunmyi d'juilet. Sus l'portrait d'li et du Sénateu Ellis, si j'avais ieu à dêcliather, sans vaie les noms, létché des deux tch'allait êt' Chef dé Police, j'éthais tout d'suite chouaîsi Moussieu Ellis!

J'vai qué l'înnondâtion d'La Vallée des Moulîns (mênommée "Queen's Valley") n'est pon 'couo en allant viyant qué lé "National Trust" est forchi d'contester l'avèrti d'acat oblyigatouaithe d'la part d's États pouor tâchi dé protégi sa constitution.

La tchestchion d'fourni des beusses pour porter les mousses à l'êcole au matîn m'fait penser à man janne temps. Dans chu temps-là, tch'était lé c'menchement du siècl'ye, à bein près touos les cheins tchi d'meuthaient (j'pâle du côté ouest d'l'Île) au nord dé Bieau Mont marchaient à l'êcole. Les cheins tch'allaient à l'êcole et ès collèges en Ville prannaient lé train dé huit heuthes dé La Corbiéthe en Ville. Les cordonnièrs dé chu temp-là avaient tout pliein d'travas! Dans l'cas des beusses d'au jour d'aniet, jé s'sais en faveur dé n'aver pon d'mousses d'êcole dans les cheinnes portant des grand's pèrsonnes, car la condite des mousses quand j'prannais la beusse en Ville ches dreines années 'tait mal polie et même abominnabl'ye.

Mais la "pièce de résistance" dans la gâzette est l'annonce qué l'Sénateu Shenton veurt aboli la présence des douze Connêtabl'yes dans L's États. Vouot' articl'ye d'fond au sujet est bein à propos.

J'ai sieu la carriéthe politique du Sénateu avau l's années, car il est un raide bouan travailleux dans L's États. I' n'a pon peux d'sa peine et il est tréjous prêt à v'nîn à l'aîgue d'autcheune pèrsonne. Né v'là d'bouannes qualités, et j'ai admithé un tas d'ses projets. Mais il est d'la nouvelle êcole et j'sis acouo d'la vielle école et consèrvateur dans l'âme. Dans ma lettre du 4 dé mai, 1974, j'vouos disais qué j'èrgrettais l'abandon d'la vielle couôteunme d'aver les Chefs dé Police des pâraisses èrprésenter l'Connêtabl'ye dans L's États quand il avait empêchement d'siéger li même. Et dans chutte lettre-là ch'est assez èrmèrquabl'ye qué j'disais: "I' faut et' èrconnaîssants qu' les champions d'changement n'ont même pon êprouvé à aboli la présence des Connêtabl'yes dans la Chambre Législative"! Et dans ma lettre du 26 d'avri, 1975, en pâlant d'changements considêthés d'sithabl'yes par cèrtains membres d's Êtats, j'disais: "J'sis intérêssi d'vaie qué l'Sénateu Shenton a d's idées d'chu côté-là étout."

Dans ma lettre du 28 dé févri, 1976, j'li souhaitais jouaie dans san nouvieau poste du IDC en lî disant tch'il avait eune tache bein îngrate l'avant à li. Et dans ma lettre du 22 d'mai, 1976, j'disais qué l'IDC 'tait en train d'proposer des changements pour faithe ses règl'yes pus pliabl'yes. J'viyais s'n înfluence en travas, probabliément pour lé mus.

Mais jé n'sis pon dé s'n avis qué L's Etats pouôrraient fonctionner mus sans les Connêtabl'yes. Ch'est vrai qu' un tas d'ieux n'sont pon orateurs hors lîngne, mais il' ont eune connaîssance des bésoins et conditions dans toutes les pâraisses dé l'Île tchi dait êt' d'utilité dans les délibéthâtions des conmités d's États. Et il' ont du paids dans lus manches tchi peut ét' c'mode au bésoin pour balanchi l's idées, trop progressives dans des temps, manque d'expéthience, des jannes et ambitieux Députés.

Enfin, j'pense bein qué jé c'menche à êt' tout seu d'ma sorte dans mes vièrs jours. J'sis contre les changements, et ches jours ch'est changement d'tout, changement d'temps, changement d'habits, changement d'idées, même changement d'femme, et sustout d'la valeu des choses du point d'veue d'la moralité et d'l'întégrité. Mais nou n'peut pon empêchi la mé d'monter!