Jêrri, not'e pays, touos les treis z-ans.
En Dézembre,
Chouaîsis touos ses représentants,
Aux Etats.
N'v'là qu'est v'nu l'grand moment,
Cèrtainement,
Des députâtions, touos l's'embarras,
Qui plieuve ou qui vente,
Au Parish Hall nou s'rend,
Formé députâtion,
Pour passé l'compyîment
Au vièr représentant.
Enfin, nou s'met en route,
Et nou peut les vaie patte-à-coue:

Le Connaîtablle et le Recteur,
Les Surveillants, les Collecteurs,
Les Principaux, les p'tits ouasseurs,
Les Chentenièrs, les Vingtenièrs,
L'enregistraeux, les Apprécieurs,
Les Inspecteurs, les Officièrs,
Les Procureurs du Bein Public!
Ah! que ch'est bé et magnifique!

Siez-li, pllien d'ordji, l'Député,
Enervè,
Prépathe san bieau speech, destinè,
Comme d'amor,
A dithe qui pensait d's'ertithé,
Dans l'privé,
Tandi qui veur la poste occouo!
Madame pendant chu temps,
Ermèrque à la sèrvante:
As-tu bein êpoussetè
Toute la malpropretè:
Souogne que tout sait rangi,
I' faout vite en fini,
D'pit que bétôt i' s'en vont v'nir.

Le Connaîtablle et le Recteur,
Les Surveillants, les Collecteurs,
Les Principaux, les p'tits ouasseurs,
Les Chentenièrs, les Vingtenièrs,
L'enregistraeux, les Apprécieurs,
Les Inspecteurs, les Officièrs,
Les Procureurs du Bein Public!
Ah! que ch'est bé et magnifique!

Les v'là arrivés près le d'vant,
D'la maison,
Achteu i' faout pathaître content,
Ch'est le moment,
Même quand nou souhaitte qui dise Non
En raîponse.
I' faout l'i faithe chu compyîment,
Nou z-entre dans l'parlaeux,
Nou s'assièd comme nou peut.
L'sien qu'est le porte-vouaix
S'avanche dans l'mitan du bel appartément,
Et tch'est qu'est bein content
De vaie parmi les cheins présents:

Le Connaîtablle et le Recteur,
Les Surveillants, les Collecteurs,
Les Principaux, les p'tits ouasseurs,
Les Chentenièrs, les Vingtenièrs,
L'enregistraeux, les Apprécieurs,
Les Inspecteurs, les Officièrs,
Les Procureurs du Bein Public!
Ah! que ch'est bé et magnifique!

Achteu, si d'visé ès Etats,
I n'fit pas,
Sans doute du bouan bor' i' vota,
Sans tracas.
Es Coumitis i' prins part
Au travâs,
Qui y-est fait sans embarrâs.
Ne v'là chein qu'nou raconte,
Tréjous l'même p'tit conte,
Qui fait hardi d'pliaisi.
Pis de whiskey verre rempyi,
Touos les verres bein nettis,
Pour bèthe à la santè
Du Député, des gros bonnets,

Le Connaîtablle et le Recteur,
Les Surveillants, les Collecteurs,
Les Principaux, les p'tits ouasseurs,
Les Chentenièrs, les Vingtenièrs,
L'enregistraeux, les Apprécieurs,
Les Inspecteurs, les Officièrs,
Les Procureurs du Bein Public!
Ah! que ch'est bé et magnifique!

Ne v'là le moment du départ,
Dêjà tard,
Allons, garçons, vite daeux p'tits d'gouts,
Unne cigâre,
Devant de vos remèttre en route.
Prennez garde
D'avé fraid et de l'influenza.
Oprès la châquethie d'main
Avec touos ses vièrs z-anmins,
Freumme l'hûs pour s'erpôsé,
Rentre vite dans sa chambre,
Et quand il est couochi,
Qui ronflye, i' faout l'entendre,
Ch'est qu'i' vait alentou d'san lièt:

Le Connaîtablle et le Recteur,
Les Surveillants, les Collecteurs,
Les Principaux, les p'tits ouasseurs,
Les Chentenièrs, les Vingtenièrs,
L'enregistraeux, les Apprécieurs,
Les Inspecteurs, les Officièrs,
Les Procureurs du Bein Public!
Ah! que ch'est bé et magnifique!