"Et bein! Tch'est qu'tu crai d'l'êlection?" Piteur Toutseu mé d'mandit l'aut' sé.
"Tch'il êlection?" j'li dis:
"L'êlection pour Sénateur, sans doute!" i' m'rêponnit:
"Oh! Chette-là? J'criyais p't'êt' qué t'entendais la cheinne pour Président d'l'Améthique," j'lî dis: "En v'là ieune tchi m'a fait dêpié, man bouanhomme, - j'en n'tais quâsi malade! Le seul gâs que j'connais tch'à des p'tits boudîns dans la tête tch'en n'tait content est man fréthe du Canada. Il est d'avis qu'Truman est du côté des pouorres dgiablyes tch'ont a gagni lus vie, et qu'Dewey 'tait du côté des grosses têtes tch'ont dêjà trop d'hèrpîns!"
"Bah! té et t'n'Améthique!" Pîteur mé dit: "Tchi dgiâtre qué j'm'en fiche, mé, tch'est qu'i' gagne dans chu pays-là tch'est à maîntchi sauvage, - ch'est d'l'êlection en Jèrri, que j'té pâle! Crai-tu qu'j'allons faithe des sou sus nos tonmates ach't'eu qu'j'avons des Sénateurs? Et craitu qu'j'avons êlu les mêssieux tchi nouos f'thont l'pus d'bein?"
"L'affaithe éthait bein peut êt' piéthe, Pîteur!" j'lî dis: "Quant ès tonmates, - prie l'Bouan Dgieu d'nouos env'yier d'bieau temps quant i' s'sont à craître, et tu f'thas des sous d'sus. L'Agritchultuthe a deux bouans apôtres dans l'nouvieau Sénat, - les Sénateurs Le Feuvre et Edwards, - et i' faut complyimenter l's'êlecteurs de l'Ile dé l's'aver mîns parmi les chîn' preunmièrs. L'Sénateur Le Gallais dév'thait êt' dé lus côté étou, li, tch'êlève dé sis belles vaques!"
"Mais, crai-tu qu'la ville en a gagni sus la campagne?" Pîteur mé d'mandit:
"Quant à ch'là, Pîteur, j'lî dis: "Je n'crai pon qu'la balanche a changi fort d'en par ichîn. I' n'y'à qu'deux Sénateurs d'êlus tchi n'taient pas dêjà dans l's'Etats, et j'crai tchi'i' sont touos les deux d'bouans Jèrriais. Quant nou veint à y penser, ch'est r'mèrquablye de vaie tant d'vièrs noms Jèrriais parmi nos nouvieaux Sénateurs, - nou dithait qu'y'à pus d'Jèrriais dans l's'Etats qu'i' n'y'à dans la campagne dé nos jours!"
"Tch'est qu'tu crai d'l'idée d'un campagnard à s'met' sus les rangs pour empêchi un villais d'gangni?" Pîteur mé d'mandit:
"Autcheune pèrsonne qui s'met sus les rangs comme candidat pour Sénateur en Jèrri, ou pour Juge," j'lî rêponnis: "dév'thait aver un seul intéthêt, - l'intéthêt du peuplye dé toute l'île! A m'n'idée, si un candidat a un intétêt partitchu'yi, il est bête dé s'en vânter! J'ai un vièr anmîn tch'est malîn dans la politique, et i' m'a tréjous dit: "Si tu'as tchique plian dans la tête que tu crai êt' pour tan bein ou pour le bein d'tan parti, la preunmié chose à faithe est d'travailli trantchil'ment et d'n'en dithe rein à pèrsonne!"
"Quant à la campangne, - si nos Connêtablyes et Députés campagnards avaient l'avis d'être d'la "Même Opinion" quand s'n'intéthêt est sus l'tapis, j'n'éthions pon bésouain d'aver d'peux des villais, viyant qu'y'à assez d'aut' membres dans l's'Etats tch'ont assez de p'tits boudîns dans la tête pour saver qu'l'intéthêt d'la campagne et l'intéthêt d'la ville étou, pour env'yier la balanche de not' côté!"
"Mais n'crai-tu pon tch'i' dev'thaient voter des sou pour acater des bâtons-à-tonmates pour les fermyièrs a la pliaiche d'les dêpenser sus un tas d'bâtisses en ville?" Pîteur mé d'mandit:
"P't'êt' bein qu'oui, Pîteur," j'lî dis: "Mais pourtchi qu'tu n'prends pas pour Député d'St. Ou témême, et lus dithe chen'na dans l's'Etats?"
"A m'n'âge?" i' m'rêponnit: "Et mé tchi n'sait pon l'Angliais! Ch'est eune belle affaithe quant i' faut saver eune langue êtrangiéthe pour pâler dans l's'Etats! Et pis, jé n'voudrais pas opposer Jean L'Mèrquand. J'espéthe tchi lus ditha tch'est qu'i' pense en Jèrriais!"
George d'La Forge
8/1/1949
Viyiz étout: