|
Yeun des autres jours, devant les Etats, Y l'y eu un muochai d'mauvais travas, Y s'agissait de passai une Loié Pour savai comment qu'nou devai votai. Le Connêtable, le sien d'la Ville, Devait éprouvé à passé le Bill; Y prins bain de la peine à montré Le bain grand avantage qui yéthé, Car dans plusieurs Elections derniethement Y savait qui y'avait yeu tout boun'ment Un tas de choses qui ne devthaient pon Avai lieu dans auqune Election. Des p'tits oeux, à la sortie des nids, Se vendaient au tout bas prix, quatre louis; Et de tuous petits viaux, qui se vendaient Deux et trais fais pus de chain qui valaient; Le beurre se vendait à un prix fo, Car les gens en demandaient biaucou tro, N'ou ne l'acatai que par la livre, Autrement n'ou n'éthai peu y suffith'. Des vielles bottes 'taient vendues bain chi, Le chiffre quotai était trente-huit ; Même neuves ou pouvais bain pensai Patheille somme y n'peuvent valai. Des gens maugrai yeux étaieut emportaies, Y 'taient des jours avant d'être trouvaies ; A d'autres gens nou donnai un muoché D'sous pour oubliai à v'nin déjuné Le jour de l'Election, n'y pensant pas Y s'n'allaient du matin à lus travas; Et pis y'avait des voteurs qui prenaient Un tas de sous de tuous les deux côtés. Ne vela, dit Monsieu BAUDAINS, un mal Qui demande un remède radical, Car tout le monde sont tenus d'avoué Que la chose ne peut pus continué. Che fut Monsieu LE SUEUX, le Député, Qui eu le piaisi de sécondé, Pour li-même, il éthai préféthai N'avai pon yeu récours a rain ditai, Mais plusieurs des Electeurs ne pouvaient Voté librement comme y voulaient, Et de pis que chest de même Faut changhi notre système. Le Connétable, le sien de Sain Sauveux Pour quant à li, il avait grand peux De vais une telle révolution Dans notre système d'Election, Et que l'auteur avait assommai Les voteurs, y n'criait pon ditai, Et estche viant que les Anghiais S'en trouvent bain ; et bain les Jerriais N'en veulent pon, et chest sans raison Qu'nou veurs changhi la constitution, Y ne veurs pon vais rain de changhi, (Che fut la qui fut bain aplaudi), Avec une telle Loié, nou za peine a craithe Tout le travas que les Connétables éthaient à faithe, Et dans sa paraisse y n'avaient pon voulu donné Pour aydghi à faithe le travas, un Secretary, Et il ne l'y restai pus qu'à proposé Le reget du préambule de la Loié, Et pis le Connêtable d'Sain Martin Avait veu avec biaucou de chagrin, Car il éthai de biaucou, préféthai Ne vais pon un tel projet proposai. Dans une Election les siens qui perdaient . Pouvaient devant la Cour faithe un procès, Et que dans les Elections tout dernieth'ment Les choses s'étaient passaies tranquillement. Mousieu NICOLLE, quant a li, Y l'tai pour vais la Loié changhie. En Angiéterre, d'vant le chang'ment, y dit Que les Candidats étaient peltaies d'oeux puouries, Et que che n'étai pon d'même dutout acheteu, Chétait tranquillement que l'affaith' avai l'hieu. En Jèrri avec le chang'ment, il espéthai Que la chose ne manquethai pon d'amendai. Mousieu l'Député DURELL, avait tout lieu de craith' Que les Etats étaient vingt-ching ans en arrieth. En Angiéterre dépis pus d'vingt ans, Chest par l'Scrutin, qui font voté les gens. De l'autre côtai, chest d'même aitou, Et devrai, chest d'même presque partout. Y dit es Estats un mio en riant, L's' hommes de Saint Ouen sont indépendant, Et pour des Electeurs Chétai un vrai bonheur. Chétai bain difféthent à Saint Hélié, Pour plusieurs n'y avait pon de liberté Tenus de voté pour des gens qui n'aiment pas On bain resté avec tuous lus esfants sur les bras. Des hommes quavaient des esfants, chétai séthieux, Et y l'taient bain oblighis de pensai à hieux. Che fut en expliquant qui se servi des mots : Qu'ils 'taient comme un geva avec quiq un sus l'dos. Et qu'ils étaient de même guidaies Comme des gévaux qu'étaient menaies, Y trouve le chang'ment excellent Et y donne san assentiment. Mousieu FALLE fit bain rithe de la compathaizon D'un electeur de même tormentai, à un Anon; Y dit que chu système la étai bon en Turquie, En Russie, et dans bain d'autres ditaies payis, En Angiéterre et en France y pouvaient Passai aitou une telle Loié si voulaient, Mais en Jerri les choses n'avaient pon bezoin D'êtres poussaies, pas même la maintchi aussi lien; Y n'voulait pon vais la hache du bûch'ron Sapé d'même l'arbre de la Constitution; Pour li, y voulait la laissi à ses esfans Comme y l'avait trouvaie dans le buoun vier temps. Quand au Connétable BENEST, Y ne pouvait dutout vais Car comment que nou vaindrai Not' système à gardé. Un Connétable ne devthai pon ergardé Les Electeurs quant y venaient pour voté, Y'en a qui n'éthaient pon la forche d'esprit De venin votai librement endrait li; Y dit, adoptais la Loié et ou verraies Que tuous les Electeurs séthont libéthaies. Quant à Mousieu MESSERVY, il appuiait Le préambule de la nouvelle Loié, Car y savait bain que parmi les Trin'tais De pus d'une sorte de choses se passaient. Y s'en allai lus en dithe Qui les féthai bain en rithe. Y'avait dghix ans il 'tai candidat, et bain Ses adversaithes n'arraitirent a rain Che ne fut qu'avec biaucou d'peine qui réussi A mettre fin au gaspiliag' des sous du pubhi Chutte administration n'éthai pon continuai Si non z'avait bien, dans chu temps la, l'vote sécrai, Ou n'éthai pon peu dutout se maintenin En présence de la Loié sus le scrutin, Mais Y l'en firent de pus d'une sorte Pour empêchi d'être mins a la porte Yeun de nos homm', il avait 'tai droghi Es Landes, à Saint-Ouen, y fut drochi, Et pis chest qu'il en coûti bel et bain A porté notre homme a Saint-Ouen; De pus, y avait aitou la bille A payi, car il en avait coutai Siez HARRIS, au Moulin de la Ville Pour la prumièthe partie de la gnait. Deux ou bain trais jours devant l'Election Nou disait que Charles, d'la Poudrettie S'étai vantai qu'il avait l'intention D'allai a la païq', faith' une partie Es Ecréhos ; Y devait emporté Une douzaine de nos hommes de Rozé. Dans un cas deux vétuthes s'entre suivaient de près, Y s'en allaient pour le même homme, tout exprès; Che fut Mess CABO qui nos raconti la scêne Qui s'étai passaie a quicq chose près, de même “J'prends Jo par l'bras, li par le fonds d'ses brès" “Je tins bon, je hali tout en cratchi" “J'pensais que la prinze allait m'anchi" “Je fis un effort, je tchi sur l'dos " “Dans le fond du Cab avec Mait' Jo." Che n'est pas là une manièthe D'attrappé les gens par drièthe Et Mait' Jo s'en piengni hardi Après que l'Election fut fini. Mait Jo dit, “ il a 'tai indélica” Il Y n'éthai pon deu m'attrapai par la." “Mes brès étaient bouonnes, j'en étais bain,” “Le morcai a presq' restai dans sa main." “Le Chant'gni m'a fait grand ma, je créthais” Qui y'a laissi, la merque de ses daigts." Et pis y'avai le cas de PH'LIP LE COCQ Dans l'Election de JEAN DANIÉ CABOT. Y dit ne v'la le mal, chest à vous De trouvé un r'miède, votais tous Pour changhi la Loié, et nou trouvtha Chest seux, que l'affaithe amendea. Les gens devthaient voté librement, Sans lus faithe auqun compliment. L'Deputé RENOUF, voulait aitou adopté La Loié que san Connêtable proposait, Car depis longtemps les buounnes gens Voulaient vais quicq chose fait dans chu sens. Et pour acheteu, y demandai comment Les Electeurs peuvent-y voté tranquil'ment, Y connait li-même plusieurs cas, S'y le faizaient, y perdraient lus travas, De même pour plusieurs d'hieux, Chétai quicq'chose de séthieux Et si ou zavais a choisi, Mettaies les tuous bain à l'abri D'toutes sortes de tentations Dans les préchaines Elections. Le Connêtable de Saint-Jean Ne pouvait pon bain vais comment Qui fallai auqun changement, Si l's Electeurs 'taient consultaies Y se s'éthaient tuous prononcaies Raide contre, ch'était d'même qu'il 'tai cherghi Par les siens, et y votait pour ne rain changhi. Le Connêtable de Saint-Pierre ne criait pon Es siens qui criaient tant pour la Constitution. Faut bain taillhi l'arbre, et pis Y portétha de mihieurs fruits, Et qu'il étai temps que dans bain des Paraisses Que l'influence de certains dispathaissent; Pour quand à li, y li sembiait qui pouvait vais Dans l'opposition que certains hommes faisaient, Certaine crainte, plusieurs l'ont prétendu, A la préchaine fais d'n'être pon ré-êlu. Et pour quand es autres qu'avaient aitou cherchi A dithe que v'la qui tuethai l'espri d'parti, Chétai du gnolin, quand à li y l'appuiait Avec bain du piaizi le chang'ment demandé. Car fallait oquo certains chang'ments Pour allai un mio avec le temps. Mousieu LE NEVEU, le Recteur de Saint-Martin, Etait pour adopté le vote par scrutin, Car il avait 'tai li-même assujetti A être perséqutai par esprit d'parti Y voulait vais les hommes voté librement, Allai et v'nin au Poll tout tranquillement Et pis y dit es Etats, depis quicq' annaies Bain des changements ont 'tai adoptaies, Et fallait pon craith' les siens qui disaient Que tuous nos privilèges s'en allaient, Car nou se trompait et bain grandément En ne voulant faithe auqun changement. Le Proquleux Généthal dit, en quémanchant, Que le débat 'tait fortement intéthessant, Y pâli hardi en faveur, y l'espéthai Qu'les Etats l'adoptéthaient sans diffiqulté Y dit, car y faut bain protègi Le sien qui n'peut pon soigni de li, Pouvait on appélé un poltron Un Electeur qui ne votai pon Comme y voulait, quand y savait Qu'nou cherchéthai a le ruiné, Nou le, créthai a maintchi bête Si faisait d'même a sa tête, Chetai biaucou mus de pézé La chose avant d'allé voté, Les Etats féthaient un pas dans la buounne direction Si montraient dans chu moment, un p'tit de rézolution En adoptant la Loié, y verraient De suite, qu'les choses amend'aient Che fut Monsieu LE GALLAIS qui quemanchi A répliqui a chain qu'avait étai dit, Y n'avait pon grand'chose a ajouté A chain qu'il avait dêja conté, Et en finisant y prétendit Que nou voulait s'moqui du publhi. Monsieu BAUDAINS en répondant A tuous les bain longs arguments, Surtout au Connêtable de Saint-Sauveux Y montri qui n'avait pon hieu peux, Che fut la, pour n'en dithe pon trop Qu'il en donni, sans se dêranghi du tout, a THÉO, Les Electeurs de Saint Helié, avaient 'tai consultaies Chétai contre l'vier système, qui s'étaient prononcaies. Les Etats après se mirent a voté, Y r'fusirent d'adopté la nouvelle Loié En ergardant nou vint a vais Qu'ou l'tai perdue par treize voies. MEN IDAIE SUS LA QUESTION.
|
Viyiz étout: