Nou n'peu pus se fié en personne,
Les gens sont bons tant q'nou lus donne,
Tant qui goudalent tout es bain,
Mais sont-ti là dans vot' besoin?
Vos aidedont-ti même un p'tit miot?
D'mandais à l'anmin Jean Cabot,
Car las, man doux, il a apprins
Q'nou n'peu pus s'fié sus ses anmins;
Hélas! zèlas! que l'diâtre sait
Et des Trin'tais et d'la Trintait.

Je n'en ments pon, j'étale yun d'cheux
Qui avaient promins sans mie d'peux,
Yun des preumiers j'avais votait,
Pies j'fu cherchi une couerte d'vrait;
Mais le sé, quand je r'vins siès nous,
La maison était chan d'sus d'sous,
J'cru q'ma femme avait la brelue
Et j'men fu couozant dans la rue.
Hèlas! zélas! que l'diâtre sait
Et des Trin'tais et d'la Trin'tait.

Nenai criyi: Ouêque tu t'en vas,
Et j'ly dis: Ma fé, je n'sai pas,
Je cré que j'yzait jusquès Vaux,
Mais j'filli tout drait ès Camps-Raux,
Car, entre nous, j'avais d'vinnait
Chen qui nos était arrivait.
Quand j'vins là, je n'en pouvais pus,
Et j'qui à raid-brache au pi d'lus.
Hélas! zélas! que l'diâtre sait
Et des Trin'tais et d'la Trin'tait.

Maite Jean d'dans dit: Quès quès qués?
Chest mé, que j'dis, et j'em teurtais.
Qui pataware j'em donni!
La haizèque du dos m'en craqui!
Je m'tais donnait une bouistre d'van,
Et j'vos asseuze y gnia pas d'fan
A v'nin s'êtruêlé comme chonna.
Dans un moment j'navais pu d'ma,
Hélas! zélas! que l'diâtre sait
Et des Trin'tais et d'la Trin'tait.

J'antri tout drait sans dize un mo,
Et je m'assis oprès du tro,
Et pies je m'acouti dessus
Et dis: en v'la-ti des écus
Fliambais pour rain, ô mes bouonnes gens!
Mais qu'il attendent encouo deux ans.
Craient-ti que j'nos allons flinchi
Quand j'sommes bain seux de les slingui?
Hélas! zélas! que l'diâtre sait
Et des Trin'tais et de la Trin'tait.

J'nos mînmes à nos entre ergardé,
Et j'nos angroutîmes à plieuzé.
Nos lermes quiyaient m'nu comme grille;
J'em touoni, et une garce d'fille
Etait là dans un coin à rize,
Et scie seux que j'lentendi dize,
Ou l'dit tout haut, j'lentendi bain:
En v'la-ti deux grands abapain!
Hélas! zélas! que l'diâtre sait
Et des Trin'tais et d'la Trin'tait.

Je resti là une heuze ou deux,
Petête bain trais, j'nen sies pas seux,
Mais je pâlîmes jantiment
D'la Trin'tait et du dévouêment
Q'Maite Jean a tréjous seu môtré
Pour le p'tit hâvre du Bouëlé,
Dont y pâli dans les Etats,
Et mins un grand laiduze à bas
Hélas! zélas! que l'diâtre Sait
Et des Trin'tais et d'la Trin'tait.

Enfin y n'faut pas en pâlé,
Maite Jean ne sça pas député
Depis qu'les Trin'tais ont choisi
A sa plièche Mess Le Boutilli.
Devant bain longtemps nou verra
Qui diviguldoize il éza;
Je n'cré pas, à sa filomie,
Qui sait jamais fort sus le d'vie.
Hélas! zélas! que l'diâtre sait
Et des Trin'tais et d'la Trin'tait.

L' ANMIN FLIP.