À Portinfé,
Saint Ou.
Moussieu l'Editeu,
La Merrienne n'était pas de trop bouonne humeur hier au sé. Je n'sais pas pourtchi, mais j'n'ai pas besoin d'vos dithe que ch'est souvent d'même avec les femmes. I' n'ont autchune stabilité, et i' faut craithe que ch'est lûs natuthe.
Ou qu'menchit par m'attatchi pour aver prédit que l'préchain Connêtablye d'Saint Hélyi se nomm'thait Richardson. "Vraiement, Ph'lip," ou dit, "j'crais tch'il est temps que tu'aille vaie un docteu pour aver la tête examinée. Chein tchi m'fait ma ch'est que j'avais gagi douze sous sûs li avec la Liza et oulle est seuze dé v'nin ichin d'main pour que j'la paie. J'n'éthais jamais creu que m'n homme 'tait si imbécile."
"Je n'si pas l'seul tch'a 'té trompé," j'li dis "et la vraie raison pour la défaite de John Richardson ch'est que si p'tit des êlecteurs d'la pâraisse dêshallitent. Il est vrai étout tch'il éthait peut aver des réunions, comme lé Sieur Ryan, mais après tout, i'savaient que ch'tait un homme tch'avait fait dé raide bouon travas comme Chantgni, et sûs tchi nou pouvait s'fier. Ch'est une disgrâce pour la pâraisse qué, hors de pûs d'jais mille électeurs, mains de trais mille se dêrangitent de voter pour le poste de Connêtablye."
"J'en ai r'gret, quand-même, pour lé Sieur Richardson," ou dit, "car ch'est bein seux tch'i's'fier d'aver la djobbe."
"Sûs un sens, vèthe," j'li dis "mais sûs un autre je n'sais pas. Ch'n'est pas à ch'teu comme dans l'temps dé Johnny Piné, tchi faisait comme i'voulait, et n'se fichait pas mal chein qu'les êlecteurs en pensaient ou même quand, y'a tchiques années le Connêtablye Clarke installit chais "traffic lights" et laissi l's Etats à péyi pour Y'avait à toute appathence, tout-plein d'sous à chu moment-là mais ch'n'est pas d'même à ch'teu, car nos Etats ont fait banq'route et n'savent pas comment s'en déshaller."
"Mais Ph'lip," ou dit "i'faudra bein tchi trouvent chais immenses sommes que l's Etats se sont accordés d'péyi."
"Tchique jour, p't'être," j'li dis "mais pas ocquo. J'allons être en dette pour des années, et par les chiffres que nou-s-a veu dans la "Post", l'av'nin n'est pas brilliant. Il est vrai que hardi des D'mandes Extraordinaithes s'en vont être abondonnées pour à ch'teu, mais l'déficit dans l'Aperchu est ocquo ênorme, grâce ès bêtises qu'l's Etats ont fait, et ch'n'est pas la présente généthâtion tchi pouôrra restaurer la balanche."
"La grande route souos l'Fort Régent n'a pas 'té creûsi," ou dit "ou au mains nou n'en a pas rouï pasler. Et tchèsque en est pour les grandes boutiques et l'grand hôtel, les concerts et tout l'restant qu'nou's'en allait vaie sûs l'Fort?"
"Tout chonna et bein d'autres choses sont des rêves de gens tch'ont perdu la tête," j'li dis "Ch'est comme le plian grandiose de chu Sieur Barrett. Le fait tchi faut que Jérri r'connaisse au jour d'agniet ch'est qu'l's Etats sont sans sous, même pour satisfaithe les besoins ordinaithes."
"Ch'est bein triste," ou s'fit. "Tchèsque éthait jamais creu que notre p'tit Jêrri éthait peut s'trouver dans une telle position?."
"Tchèsque éthait jamais creu" j'li d'mandis, "que y'avait tant d'membres dans l's Etats tchi n'savaient pas tchèsqu'i' faisaient? Mais enfin, i' faut les féliciter d'aver fait une raide bouonne chose chutte semaine. Nou n'peut pas y penser sans rithe, mais la chose est qu'après aver pâssé un vote de non-confiance dans l'Comité d'la D'fense de l'Ile, qu'avait forchi lé président, lé Sénateur George Troy de résigner, ils eûtent lé bouon sens lé préchain jour d'les r'mettre en bloc à former le nouvieau comité, et d'garder le George Troy comme président. Ch'tait lé long discours du Sénateur John Lé Mèrquand tch'avait 'té responsablye pour lé vote adverse, et quand l'comité fut ré-élu en bloc lé préchain jour, i' n'avait rein à dithe, mais nou viyait bein par sa mine tch'i'n'aimait pas chonna."
"Les Lé Mèrquands sont tous d'même," ou s'fit. "Tandis tch'i'peuvent aver lûs volonté tout va bein, mais autrement ch'est l'contraithe."
"Vèthe," j'li dis "i' sont tous ambitieux, et même lé "J.J.", tchi n'est pas d'la même fanmille, sé mârissait pour un rein. Le p'tit John, tch'avait 'té Connêtablye dé Saint Louothains pour des années, mais tch'eut à résigner parsque les pâraissiens en avaient yeu assez, était ambitieux et têtu comme un mule, et l'John d'à ch'teu est d'la même trempe. Lé Cyril en tcheint étout, mais i' peut être pus raisonnablye par bordée. I' n'reste qu'chais deux-là à ch'teu, et y'en a tchi craient que ch'est bein assez."
Ph'lip
2/12/1961
Viyiz étout: