Moussieu, - Je n'ai pon 'tai êtounnai de lièthe la lettre du buoun houmme "des Landes," dans votre numétho de Sam'di dergni, v'la qui m'avait dêjà frappai que chest tréjous un tas de jeunes gens qui voudraient chaghi tout; après qu'ils ont 'tai quicq' jours à êcrithe, chest tout d'un coup, y font la merque de lus g'veux au mitan, après ils acatent le fond de quicq' suous-tasse en verre, y perchent un creux et l'mettent à l'hy droiete, v'la qui lus sert de chein que les Français appellent unne loupe, quant y r'gardent l'monde, v'la qu'à l'êffet de grossi les d'fauts des gens, et y vennent à vais tout de travers.
Hélas, man puoure Mess le Feuvre, ouest qu'est not' jeune temps, car je sis de quicques annaies pus vi que vous, quand j'tais contremaitre dans unne pétite "Berque" que nou zapplai la "Constitution," oulle tai dêjà ben vieille et quémenchait à être hors de classe, je vos viyais quicq' fais à êpié par sus l'quai, (dans la prumièthe copie de chutte lettre ichain, j'avais êcri, "a êpié par sus l'hé!" si j'en l'avais pon changhi, je tais capable de vos dounné un mauvais caractèthe sans l'méthité, et même sans l'voulé de ma part, je vos l'asseuthe ben), dans chu temps là, nou se contentait de faithe sen fore-top avec ses g'veux, drait sus l'haut du front, et persounne n'étheai pensai à faithe servi des lunettes devant qu'en avait grand besoin, nou quemanchait par être mousse l'avant du mât, pour quicques annaies, et p'tit à p'tit nou montait, mais achteu les jeunes gens veulent quémanchi de l'aut' but, et sans avait 'tai un dog-watch en mé, y voudraient cherchi à condithe la "Berque," mé je lus dit qui verront des breakers-ahead! et le grand danghi est qui f'thont naufrage ben vite sus quicq' roqui et toute la bastreingue séthea enviée en dêroute.
Chest la même chose dans les affaithes de l'Ile, les jeunes gens craient qu'avec le vieir système les affaithes vont trop duouch'ment, y voudraient quemanchi par la fin; être ben payis pour deuse trais heuthes de travas, pour avé tout pien de temps pour allé ès carres des rues de la ville faithe des clieins ès jeunes démoiêzelles - ne v'la chein qui voudraient, mais chest à nous, les Anciens, de tâchi d'gardé oquo pour un temps le systême suous tchi l'Ile a prospétheai. Je savons ben qu'est que j'avons, mais j'en savons pas qu'est que j'éthons; quicq' fais j'en sis ben gênai; quand je fais unne tuounnaie par la fontaine "des Mites" et jusque sus "Belle-Hougue," et quand je contemple de chutte hauteur là, tout l'pays d'Egypte, je pense que not' petit Jerri puourrait ben venin un pays de servitude. Ah! si faut faithe dispathaitre toutes nos vieilles institutions, ouest que nou zithea pêtchi tuous les sous pour pouvé rempiéchi les administrasions des paraisses, chest la ruinne pour toute la propriétai de l'Ile; pour quant à mé, je cré "que rein-qui-vaille que nou connait, vaut mus que rein-qui-vaille que nou n'counnait pas!"
Nou dit que l'histoithe se répète, eh ben, man puoure Mess Le Feuvre, yia unne trentaine d'annaies la même chose eut lieu; un tas de jeunes Messieux se minrent à crié tuout d'un temps, et se minrent à en dithe de pus d'unne sorte sus not' "Vieille Constitution," y voulaient l'abattre aitou, y nia pas! Ch'tai de même; bah, après quicq' temps, les siens qui avaient criai l'pus haut, étaient les prumiers à s'offri pour servi le pays suous le systême qu'ils avaient tant dênigrai, car y yieu dans chu temps là, unne Ligue des Réformateurs. Eh ben, qu'est que je vions acheteu, le Captaine de la Ligue actuelle s'est trouvai plieichi, il est content, si j'avais un avis a dounné, je ditheais de promettre ès cheins qui paullent tant, unne pièche à la prumièthe vacance, et tout 'éstheai fini pour longtemps; les autres méjiants se trouv'theaient les gambes (le reste suivrait) entre deux selles; car tout chonchin n'est que, coumme dit l'Angiais, "A question of £ s. d.," l'amour de la patrie n'yiest pour rein du tout. Un poet Améthiquain a peint la position d'unne mannièthe frappante:
| "I du believe in bein' this Or thet, ez it may happen, One way or t'other hendiest is To ketch the people nappin'; I aint by princerples nor men My preudent course is steadied, I scent wich way pays the best, an' then Go into it baldheaded." |
Viyiz étout: