Eh bein, s'fit la Merrienne, l's'êlections sont finis à la fin. Ach'teu nou pouôrra s'méttre à prépathé pour Nouë.
Arrête un mio, Merrienne, j'l'y dit, y'a ocquo l'êléction pour Connêtablye à Grouville.
Ah, ch'est vrai. Et tchèsque-en est là? As-tu veu tchique Grouvillais?
J'en vit deux à la vendue l'autre jour, j'l'y dit. Yun tait seux que l'Sieur Le Cras en remportethait, mais l'autre voulait m'gagi quatre sous que l'Sieur Brée ne s'sait pas battu. Par chein qu'j'en vais, n'y étha pas grand'chose d'un bord ou d'l'autre.
Le Sieur Le Cras, ou d'mandit, le connais-tu?
J'n'ai pas ch't'honneur'là, j'l'y dit, 'mais ch'est l'fis du gros Gus Le Cras, d'Saint-Louothains et du Coin Vathin aut'fais. J'ai une idée que j'sommes pathents du bord de sa méthe.
Et ouèsque il a tait chu temps, que nou n'en a pas ouï pâslé, si nou drainement?
Hors l'Ile, j'l'y dit, au service de san pays dans plusieurs capacités. Nou m'dit que ch'est un charmant corps, et il a l'support de prèsque touos les membres de la Police.
Si ch'est d'même, ou s'fit, le Sieur Brée n'pathaitrait pas avé d'chance, et pourtant il est membre d'une famillye r'nommée dans la pâraisse, et avait-y pon tait Chantgni?
Oui, j'l'y dit, et il avait otchupé d'autres postes. Il est fils du Juge Touzel Brée, et sans doute il est pathent de chu grand homme, l'ex-Juré-Justicier, Ph'lip Ernest Brée, tch'y ne s'sa jamais r'oublié par les méthodistes. Même à l'age tch'il a, y monte ocquo dans la tchaise et si yun d'chais Dimanches y v'nait à Saint-Ou, la chapelle s'sait hardi pûs remplyie que d'couôtume.
Bein seux, ou dit, quant à mé je s'sais-là, si j'avais à travérsé un pid d'né. Mais Ph'lip, je n'comprends pas pourtchi qu'y'a d'l'oppôsition à san jeune pathent.
Sans doute, j'l'y dit, nous en entend de toutes les sortes, mais s'il fait tchiques bêtises dans l'pâssée, ouèsque'est l'homme tch'y n'en a jamais fait. Et si l'autre candidat a prèsque touos les grands d'san bord, le brit couort que touos les p'tits voteurs sont pour Brée.
Ah! ou dit, et bein mais dans une êlection une vouaix vaut une vouaix. Le gratteux-d'routes, quand veint l'jour est aussi grand et a autant d'pouvé comme le Seigneur, et même le Récteur. Nous a veu chonna ichin à Saint-Ou."
"Damme vèthe, tu peux l'dithe," je m'fit, "épis ach'teu qu'les femmes s'en mêlent, nou n'sait pas ouèsque nous en est. Pâslant d'autre chose, as-tu veu qu'en Ville, l's'êlecteurs du deuxième district n'ont pas ré-êlu la dame tch'ils avaient mint au haut d'la liste y'a trais ans? Chutte fais y n'en ont pas voulu, et j'me d'mande pourtchi."
"Pour mé étout," ou dit, "ch'est un mystèthe, car j'avais tréjous comprint qu'ou faisait d'bouon travas dans l's'Etats, et surtout dans les Comités. Y m'semblye que ch'est une sale farce tch'y y'ont jouë, mais j'ai tréjous r'mertchi qu'en Ville nou n'peut pas s'fié sûs l's'êlecteurs, car y n'sont pas d'la même idée d'un jour à l'autre. Ch'est bein seux que ch'tait dans la Ville que fut dit pour la preumié fais que quand nou sert la publyic, nou sert un ingrat. Y'en a un autre étout, le Sieur Swinnerton, dans l'traisième district. Tchèsqu'il avait fait étout l'y, pour être fichi à la porte."
"Et mé étout, Merrienne," j'l'y dit, "et comme la Missis Forster, il a tait mal sérvi, mais quand nou s'mêle dans la politique, y faut s'attendre. Ach'teu, Merrienne, y faut que j'te diche que j'ai idée d'allé à chutte êlection à Grouville."
"Bon!" ou s'fit, "j'ithons ensemblye, man Ph'lip, chu s'sa ocquo une p'tite bordée d'vant Nouë."
Ph'lip.
1954
Viyiz étout: