À Portinfé,
Saint Ou.
Moussieu l'Editeu,
A la fin j'avons des nouvelles concernant l'êlection pour Sénateurs, mais d'vant pâsler d'chonna i' faut que j'vos diche que la Merrienne et mé j'sommes dégoutés dé chein tchi s'pâsse ichîn à Saint Ou.
Comme ou l'savez, Moussieu nous avait ouï qué pour la djobbe de Député, lé Mâjeur d'Gruchy était seux d'être oppôsé au mais d'Décembre, et que y'éthait une femme bein connue sûs les rangs et étout un fermyi bein respecté dé l'autre but d'la pâraisse. Ch'n'est pas que j'avons rein contre lé Mâjeur, mais j'tiomes touos les deux d'opinion qu'en matièthe politique la pâraisse avait dormi trop longtemps et qu'une êlection contestée pouôrrait p't'être ram'ner à la mémouaithe des êlecteurs les êlections du temps pâssé, quand nou-s'avait une chance de s'dêfaithe d'une vielle chivièthe-à-bras, un batchu ou même un bidet tch'avait d'la peine à s't'nin sûs ses gambes, à bouon prix. J'me si tréjous r'souv'nu d'une bricole dé g'niche plienne que j'vendis pour quatre fais chein qu'ou valait dans les deux heuthes du matin lé jour d'une êlection. Hélas, les bouons vièrs temps!
Mais à ch'teu, Moussieu, j'avons prèsque perdu toute espéthance. La dame, i' pathait, éthait 'te prête à prendre s'oulle avait yeu une dêputation, et ch'est la même chose avec lé fermyi. Mais voul'ous craithe, Moussieu, qué dans la pûs grande pâraisse dé l'Ile nou n'peut pas trouver un seul homme tch'est prêt à aidgi à former une dêputâtion. La raison, sans doute, est que l's hommes tchi dév'thaient et pouôrraient l'faithe voudraient yeux-memes la djobbe dé Député! J'avions ouï pâsler, y'a tchiques jours, dé notre Recteur, tch'est justement l'homme tchi nos faudrait dans l's Etats, mais i'n'en veur rein, et ch'est grand dommage. I' dit que san travas est dans sa pâraisse, et tch'i' n'est pas intérêssi dans la politique, mais j'n'avons autchune doute, la bouonnefemme et mé, qu'un bouon jour i' s'trouv'tha dans l's Etats comme Doyen de l'Ile dé Jèrri.
(Ph'lip a êcrit sa lettre lé jour dé d'vant les nouvelles que l'Mâjeur s'en allait être oppôser par l'Arthu Tchéthée, du Vau d'la Mathe – Éd)
A ch'teu, pour r'venin à nos Sénateurs, y'a p'tit-d'temps nous avait bouonne espéthance que y'éthait chinq ou six candidats, mais à ch'teu, accordant à la "Post" et chein qu'nou ouait ichîn et là, i' semblye tchi pouôrrait y'en aver une multitude. La Merrienne dit tant pûs tant mûs, mais quant à mé j'ai grand r'gret que dans l'nombre i'n'se trouve pas un seul vrai Saint Ouennais de la trempe du bouonhomme Jean Priaulx tchi fut dans l's Etats siez ans sans dithe un mot sinon quand i' tait forchi d'voter et tchi disait "Contre"! Nou n'les trouve pas chais hommes-là à ch'teu, tchi n'avaient pas d'peux dé faithe les sous cirtchuler dans la paraisse pour être seux d'y v'nin.
Mais à ch'teu, pour r'venin à nos candidats pour Sénateur, Y'en a tchitchuns tchi m'intérrêssent hardi; par exemplye lé Sieur Krichefski. Chein tch'est important ouèsqu'il est concerné, ch'est que s'i' n'est pas yun des quatre chouaisis quand veindra l'jour il est hors des Etats compliétement. S'i' 'tait Député i' pouôrrait r'prendre pour Député pûs tard, mais s'il est battu chutte fais, ch'est fini et nou-s-a d'la peine à envisagi chonna, car le travas d's Etats et des comités ch'est sa vie. Y'a siez mais j'éthais dit que sa ré-élection 'tait certaine, mais il a perdu hardi d'sa popularité dans la Campagne, et i' faut qu'i s'fie sûs l's êlecteurs d'la Ville. J'peux m'tromper, mais ch'est d'même que j'vais la situâtion.
Quand j'dis chonna à la Merrienne ou murmuthit tchiquechose, et pis: "Et tchèsque tu crais d'la chance du Sieur Farley?"
"Ah, Merrienne," j'li dis, "quant à li, ch'n'est pas la même chose car s'i' perd il est ocquo dans l's Etats comme Député. J'n'ai autchune doute tch'il a peux que sa chance dans l'District Numétho 3 à Saint Hélyi n'est pas trop brillante, car y'éthait hardi d'préjudice là contre li pour lé moment. Ch'est un jeune homme bein capablye, et s'il a fait des bêtises et des mêprînses, ouèsqu'est l'homme de tchi qu'nou n'pouôrrait pas en dithe autant? I' faut admettre quand-même que je s'sais un mio surprint s'il y veint au mais d'Novembre."
"Y'a l'Sieur Perchard étout," ou dit. "I' dév'thait aver hardi d'vouaix parmi les Méthodistes, car y'a longtemps tch'il est prédicateur. Etout il est bein connu parmi touos les fermiers dé l'Ile. I' m'semblye tch'i dév'thait aver une raide bouonne chance."
La chose tchi y'a contre li," j'li dis, "ch'est tch'i n'a jamais fait rein dans la pâraisse, et tch'i' n'a autchune expéthience du travas d's Etats. Y'en a tch'i disent tch'i veur monter trop vite et tch'il éthait deu qu'menchi pûs près du bas d'l'êtchelle, mais il a hardi d'amins et il est supporté par lé Député Gaudin, et chonna li vaudra tchiquechose. Chein qu'y'a en sa faveur ch'est tch'il est un bouon campagnard, et nou n'peut pas en aver trop d'chais-là dans l's Etats comme les choses vont au jour d'agniet. Je n'peux pas t'en dithe pûs."
"Y'en a ocquo une demie-douzaine ou d'même," ou dit. "Aime-tu la chance de l'Avocat Crill?"
"Il est yun des mistèthes de l'êlection," j'li dis "J'voudrais l'vaie là, quand ch'ne s'sait qu'pour l'amour de san pèthe, mais je, n'si pas seux si l's êlecteurs li donn'nont l'support nécessaithe. Il a tout-pliein d'capacité, mais nou n'a pas peu tréjous l'comprendre. S'il avait resté parmi l's Indépendants, i' 'tait fichu sans autchune doute, mais il a abandonné tout chu gniolin-là et j'n'éthais autchune crainte de li à l'av'nin. Mais i' faudra tch'i' travaille dans l'entretemps, car i' peut être seux que l's autres candidats n's'en vont pas rester assis dans lûs grand'tchaises dans les siez s'maines ou d'même d'vant l'êlection. J'espèthe que j'vêrrons les candidats ichîn à Saint Ou dans la Salle Parouâissiale, pour vaie chein tch'ils éthont à nos dithe, et nos donner une chance d'les tchestchionner."
"Damme vèthe," ou s'fit. 'Je n'manqu'thait pas d'être là bein en d'vant, car j'ai pûs d'une tchestchion à pôser à yun ou deux d'yeux. Mais, Ph'lip, y'a ocquo l'John Lé Mèrquand, lé Sieur Maillard, lé Sieur Norman, lé Député Cronshaw et p't'être yun ou deux autres que j'n'avons pas mentionné."
"I' peuvent arrêté jusqu'à la s'maine-tchi-veint," j'li dis. "Baille-nous un mio d'soupé, et j'ithons nos couochi."
Ph'lip
1/10/1960
Viyiz étout: