Les Pages Jèrriaises

Les candidats

Une drole du dgaingue, dit Merrienne

Moussieu l'Editeu,

Quand je r'vint Lundi arlevée d'l'Hotel de Ville, j'avais à peine ôté man chapé que ne v'la la Merrienne à tchèstchonné. Eh bein,, ou s'fit, tchèsqu'en est? Combain qu'y'a d'candidats?

Baillye-mé l'temps d'avalé une tasse de tais, Merrienne, j'l'y dit. J'ai la gorge sèque, après touos les discours que j'ai entendu. Mais, pour te gardé tranchille pour unr minute, y'en a huit.

J'avalit une gorgie d'tais, épis la v'la tch'y s'y r'met. Et tchesqu'y sont, chais huit? ou d'mandit. "Y'a des campagnards, sans doute.

Vethe,j'l'y dit, y'a l'Tom Le Marinel, de Saint-Jean, et tan couôsin, le Fred Dorey, d'Saint-Martin.

Et l'restant? ou d'mandit.

"Y'a l'bouonhomme Richardson," je qu'menchit.

Mais, ou dit, tch'il âge qu'il a?

Je crai tch'il a quatre-vingts, j'l'y dit, et nous éthait creu, qu'sûs un sens, y n'éthait yeu assez. Mais nou dit tch'il est ocquo solide.

Solide ou pas , ou dit, un homme de ch't'âge-là dév'thait donné une chance à tchique moussieu tch'est ocquo jeune assez pour n'avait pas trop d'idées fixes. Enfin, ch'est pour les êlecteurs de décidé. Ach'teu, tchèsqu'y sont l's autres?

Le Sieur Collas j'l'y dit, Il est Colonel, et, comme le Sieur Richardson, il est actuéllement Sénateur. J'comprends tch'il est bein avanchi dans les septantes. J'n'ai pas l'honneur de l'connaître, mais nou dit qu'ch'est un vrai moussieu.

Ch'là fait quatre, ou dit. Continue

Le Député Morrison, d'Saint Brelade, j'i'y dit, et trais Députés d'la ville, Les Sieurs Rumfitt, Troy et Cyril Le Mérquand.

La Merrienne réfliéchit pour tchiques instants, épis dit: Y m'semblye que ch'est une assez drôle de dgaingue, nos candidats. Y'a tchiquechose a considéthé, mais, quant à mé, j'm'en vais voté pour quatre. Ch'n'est pas la peine d'avé quatre vouaix si nou n's'en fait pas servi. Mais dis-mé, les propôsants et les s'condants, ont-y fait d'bouon discours?

Damme, oui, j'l'y dit. Si nou pouvait craithe la maintchi de chein tchitchuns d'yeux on dit d'lûs candidats, j'avons d's'hommes dans l'Ile si parfaits que tout ch'qui lûs manque ch'est d's'ailes. Ils ont touos les vértus et pas un seul défaut. Et chein tch'est assez drôle, ch'est qu'nou n'avait jamais soupçonné chonna. Mé j'avais tréjous creu que ch'tait des gens ordinaithe, comme nous, mais quand j'en rencontretait yun ach'teu, j'ly hall'lait ma tunette, en faisant un grand salut.

Si tu fais chonna à tan couôsin, ou dit, ou à Tom Le Marinel, tu peux t'faithe seux d'attrapé un co-d'pid ouèsque-y te f'tha ma, car y craithont qu'tu-ès à t'fichi d'yeux.

Tu'as p't'être raison, j'l'y dit. Je f'thais mûs de m'contenté avec un p'tit salut. Mais, pour dithe vrai, à chais reunions, pourtchi tâchi d'peindre les candidats dans d'si belles couleurs? Pourtchi n'avoué pas franchement tch'ils ont des d'fauts, comme tout l'restant?

Vethe, ou dit. Y'a bein d's'années j'entendit un propôsant faithe tant de louanges de san candidat qu'nous éthait peut craithe tch'il avait san passe-port tout prêt pour le Paradis. Et pourtant nou savait tch'il avait battu sa femme des doûzaine de fais, et qu'une bordée il avait couothou après sa belle-mèthe avec une hache. Avec chonna, y s'nallait en ville yunne ou deux fais la s'maine, et nou savait bein pourtchi. Y gâgnit s'n'êlection quand-même, mais ch'tait parsque dans chu temps-là les femmes n'avaient pas l'drouait d'vouaix. Si ch'tait ach'teu, la sé d'l'êlection il éthait fichi san camp siéz-ly comme un tchan fouôté.

J'm'en doute pas, j'l'y dit, car les femmes sont droles. Mais as ouï les noms des candidats, tchèsqu'y sont tes quatre?

Mêle-té d'tes affaithes, ou dit, mais té, tchèsque tu t'en vas faithe?

Mêle-té d'tes affaithes! j'l'y dit.

Ph'lip
1954
 

Viyiz étout:

 

Les Pages Jèrriaises