Ouais donc qu'ou s'tiez Jeudi au sé?
J'vos attendi toute l'arlévaie;
J'pensais qu'ou séthiez v'nu ov' mé
Au Parish Hall, à l'assembliaie.

Y s'agissait d'une êlection,
Le temos d'not chef étant fini;
Jé n'craignaîmes pas d'opposition,
Car St. Pierre n'en veur d'autre qué li.

A sept heuthes juste, le Président
Lut l'acte de la Cour d'une vouaie sonore,
J'vos asseûthe bain, pour tchiques moments,
Nou s'aithait oui une couothie couore.

Un homme s'avanche au près d'la table,
Qu'est taîlli comme un gros Cap'taine;
Ch'est yun d'nos anciens Connaîtables,
Not grand ammin, James J. Ballaine.

"Eh bein, messieux, j'men vais vos dithe
L'fond d'mes pensées en un seul mot.
Jé propose qui faut ré-êlithe
Not' chef actuel, François Le Bro'."

Le Chantnyi "Flip," d'la Caroline,
S'condi d'une manièthe bein affable.
(En v'la yun qui sans faithe la mîne
Ess'a tchique jour not' Connaîtable).

Toute l'assembiaie sé mint à faithe
Des hourras, qu'tout n'avait qu'd'abbattre,
Car quand nos gens veulent lus êbraithe,
Nou les ouait du moulin d'Gargatte.

Jé fûmes forchis de rester là,
Vingt minutes prescrited par la louai,
Pour si y'avait d'autre candidat,
"Chest bein longtemps, quand nous a sai!!"

Y'en avait pour se passer l'temps,
Qui s'amusaient à raconter
Des scènes qu'ont peut-être pus d'chent ans
Es siens qui voulaient l's'êcouter.

Les autres qui n'taient pas si frivoles,
Pâlaient d'Milice pour sé d'sennier.
Tandis qu'les messieux agricoles,
Disaient: "Nou va bein vite touâner."

A la fin, l'ev'la l'temps êchu.
Personne n'était v'nu en avant,
Not' Connaîtable est ré-êlu!
Nos v'la "right" pour oquo treis ans!!

Ah! qué St. Pierre est bein heutheux,
D'avé obtint ch'qui désithait;
Pour mé j'en sis bein orgyeux,
Piaisse t'i jamais sé rétither!

Jé m'trouv'thait bein seux à la Cour,
Lé jour qui s'a assermentai.
Li souhaittant l'restant d'ses jours,
Tout bonheur et prospéthitai.

St. Pierrais
8/11/1898