à Portinfé, St. Ou
Moussieu l'Editeu
J'sis bein lâssé à ces sé et pas sans bouonne raison comme j'm'en vais vos démontrer.
La s'maine qu'menchit mal, car Dimanche matin, quand j'dèshallis, j'trouvis que deux d'mes bêtes avaient sauté pardéssus l'fôssé du clios dans la niet et avaient fichi lûs camp. J'fus forchi d'aller cherchi pour, et au but d'une heuthe ou d'même, j'les trouvis tout près de l'Eglyîse d'Saint George à mangi des chrysanthèmes dans un gardîn appartenant à un moussieu angliais tchi n'tait pas ocquo l'vé. J'happis mes deux bricoles et je l's entrainis siez-mé, epis j'mé mîns a r'pathé l'fôssé, de tchi qu'la Merrienne mé dit que ch'n'tait pas d'tchi faithe au Dimanche.
Quand mes vaques se r'êcapp'thont, Moussieu qu' ché s'sait Dimanche ou sûs s'maine, ou pouôrra couôrre souotre, quand ché s'sait jusqu'au bas d'l'Etâ ou du Creux Baillot.
J'dév'thais vos dithe que l'vendrédi j'avais 'té au p'tit 'show' de la Société Agricole dé Saint Hélyi, ouèsque j'avais veu tchiques bouonnes bêtes et rencontré hardi d'mes vièrs amîns. Je n'pu pas aller au diné l'sé mais nou m'a dit que l'Wilfred Le Brun, tchi présidait, d'livrit une raide bouonne adresse en Jèrriais. J'espèthe que y'en étha d'autres tchi suivthont san bouon examplye.
Mardi, j'fus au 'show' d'Saint Louothains et Saint Jean et j'vi la une raide bouonne vielle vacque appartenant au Sieur Eric Vibert. Y'avait d'tchi bouon dans presque toutes les clâsses, mais chein tchi m'surprînt un mio ch'tait qué hardi des fermiers pathaissaient pûs intérêssis dans l'êlection pour Sénateurs que dans les bêtes.
Ach'teu, Moussieu, quant à l'êlection, j'veur offri les apolgies â la Merrienne pour aver dit la s'maine pâssée que l'Sieur Perchard n'avait jamais fait rein dans la pâraisse dé Saint Martin. Ch'tait pas vrai car il avait 'té Vingtgni pour tchiques années et au jour d'agniet est yun des Experts. Etout, il a fait hardi d'bouon travas pour les fermiers de l'Ile dans pusieurs capacités. I'sembliéthait tch'il a une bouonne chance d'être yun des quatre tchi réussithont le préchain mais.
Lé Sieur Maillard, par chein qu'j'ai ouï et par chein qu'j'en vais, a une aussi bouonne chance comme autchun, car i' n'y'a rein contre li et il a d's amîns pas seulement dans la campagne mais dans la ville étout.
Le Député John Le Mèrquand né dait pas s'gèner, car il est seux de réussi, autrement je m'trompe hardi. Il est vrai tch'il est dêpenseux sûs l'éducation mais, après tout, i' n'peut pas dêpenser un sou que l's Etats n'li ont pas accordé. Y'en a tchi voudraient l'vais Président du Comité d'Agritchultuthe, car i' disent que s'il avait la djobbe les fermiers s'saient fortement souot'nus et éthaient pûs d'support et pûs d'pouvé dans l's Etats.
Je crai, Moussieu, que j'en ai dit assez pour les Sénateurs agniet. J'espèthe d'aver tchique-chose de nouvé pour la s'maine tchi veint. La grande chose ch'est de rêvillyi les êlecteurs et d'les faithe dêshaller dans toutes les parties d'l'Ile quand veindra l'grand jour. J'vais bein que la campagne est dêjà intérêssie, et j'espèthe que la ville étout prendra la peine d'aller voter. Si les villais f'thont pas pûs d'ûsage d'lus vouaix tch'ils ont fait dans l's êlections pour Député chais draines années, i'dév'thaient perdre lûs drouait d'vote pour au mains djais ans.
Mais, après tout, Moussieu, chein tchi intérêsse, la Merrienne et mé, même pus qu'les Sénateurs, ch'est l'êlection pour Député ichîn à Saint Ou. J'avions cru, par les rumeurs tchi cirtchulaient dans la pâraisse la s'maine passée que l'Màjeur d'Gruchy n'éthait pas l'support nécessaithe pour battre le Sieur Tchéthée, mais achteu que notre 'J.J.' est à travaillyi pour li, autchune chose pouôrrait s'arriver. Mé-même, Moussieu, je n'crais pas que l' 'J.J.' à l'influence dans la pâraisse tch'il éthait yeu y'a tchiques années, mais la Merrienne est convaintchue tch'i' n'est pas r'oublié et que l'Mâjeur s'en va profiter pour l'aver a son dos.
“Fait comme tu voudras Ph'lip” ou dit “mais j'té donn'nais en avis de penser un mio d'vant mettre tes sous contre lé Mâjeur.”
“Oh!” j'li dis, 'mais v'là veur-t'i dithe que tu t'en vas voter pour lî?”
Ou n'raiponnit pas, Moussieu, et don j'n'en fus pas pûs savant. Hélas, tchi bêtise que d'aver donné la vouaix ès femmes!
Pour fini avec 'J.J.' et ses intentions, Moussieu, nou's-entend même qu'à la dernié minute i' pouôrrait changi d'idée et s'mettre candidat pour Sénateur. Pus qu'probablye ch'est du gniolîn, mais avec chenna nou n'peut pas en être seux, car i'n'y a qu'li tchi sait tchèsque il a dans la tête; en un mot il est inprédictablye.
Pâslant d'autre chose, le juge Vouaisîn, comme tout l'restant, peut faithe des bêtises, mais nou's-éthait creu qu'àch'teu, ayant 'té à la P'tite Cour si longtemps, il éthait deu savé que s'il enviyait lé pouôre balloque en d'vant d'li en prîson pour tchînze jours, i'n'avait pas l'drouait étout de l'mettre à l'amende.
J'n'ai pas l'temps agniet d'vos pâsler du 'show' d'Saint Martîn et la Trin'té, mais i'faut que j'vos diche que l'Jack Rondé avait une vaque la tchi pouôrrait châtchi la sienne au Sieur Vibert pour lé championnat d'l'ile. Nou's-entend étout de tchiquechose d'extra à notre 'show' des Trais Pâraisses et j'espèthe que ch'est vrai, car ch'né s'sait pas juste de vaie l'Est remporter toutes les honneurs.
Ph'lip
Viyiz étout: