Les Pages Jèrriaises

A Mousieu l'Editeu d'la "Nouvelle Chronique."

Mousieu, - Ou pathaissis ravi du résultat de not' Assembliaie de Jeudi passé, pour chu Scrutin. Ou n'avez qu'fèthe de yêtre. A Ste.-Mathie, bein d'saffèthes et bein d'sèlecteurs vont yiou et comme nou les mène.

Des Messieux fidrent une partie de tout lus jour, Jeudi, à cuorre la paraisse et à "whippé up" un tas d'camarades qui n'vont pon souvent ès réunions et qui sont à peu près autant gênais du Scrutin comme de lus premièthes cauches, pour là simple raison qui n'y comprenne rein.

Les Messieux didrent qui n'fallait pas manqui de s'trouvé qu Parish Hall le sé, et de suogni de voté contre, - chein q'nou fit. Ou viyis bein, Mousieu, que les Ste.-Mathiais n'sont pas un tas d'indifféthents, y savent s'ent'suotenin, et n'sont pas pour laissi tout allé.

Les quicques patholes que nout' Ministre et nout' Conêtable didrent n'taient pon d'ov le projet. et nout' Député "hinti" que pour adapté la salle às changements nécessaithes y faudrait ou hauchi le rât de treis ou quat' sous, ou p't'être même en bâti une neuve!

Criyous, Moussieu, que j'alions voté pour un projet qui m'nichait d'nos coullé dans ditais frais. N'ya pas d'dangi. Enfin oprès la bordée, nou fut bèthe un fais... ou deux p'têtre, sans qu'il en cuotisse fort, - pas à mé, tréjous. Etes-ous oquo ravi?

Je sis, en vous r'merciant,
Yun qu'y fit et qu'en a yeu r'gret.

Nouvelle Chronique de Jersey 6/2/1889

 

Viyiz étout:

 

Les Pages Jèrriaises