|
En Septante-ching l'Assembièe nommi Pour Surveilllants, PICOT et MESSERVI; Le prumi, par le Recteu y fut mins, Le dergni, par VESCONT' et ses hammins, Y fut mins Surveillant par yieux, Pensant qui, se montrerait quérelleux Avec Mousieu DU HEAUME, pour yenviai bill' Ils avaient dêpensai Six Chants Louis En frais de Cour, y voulaient fini par mill', Y fallait l'ôpôsé à tout prix. En l'annaie Mil Huit Chant Septante-sept Les Surveillants êconomie avaient fait, Y demandirent à Mousieu l'Connêtable Permission d'met' en êtat conv'nable L'entraie du Chimtchieth; fallait demandai Au Comité des Ch'mins qu'il présidai. Pour d'mandai y furent trais fais siez li, Y di oui, si faut des pipes, allais les q'si Siez l'Inspecteur, Maître RICHARD BIAMPI, Au Pont, Ville-à-l'Evêque, y'en à Pus qu'in vos en faut pour faithe chonna. Trais pierres furent qu'mandais, de Sept Louis, Ils 'taient belles et bain fin'ment pitchies. Quand les membres du Comité virent Tout de suite y l'i demandirent, Mousieu LE VESCONT' dis, pour de mai J'vos dit y l'ont fait tout sans men pàlai. Jo, du Nord, depis longtemps avait dit Qu'il 'tait grand temps de les arrêtai, Car ils n'avaient oquo yeu auqun bri Ni quérel' avec Mousieu le Recteu. Les pierres v'naient comme par exprès, In' fallait pon les manchi, ch'tait ach'teu Qui fallait lus tâpai du sus les dais; Fallait bain lus montrai qu'in fallait pon Changhi, suivre la vieille tradition. En cherchant chican', avé des procès, Dêpensai des sous, faith' des tas de frais, Y fallait faith' battre la grosse caisse Aux frais de la minzethab' paraisse. Hi dit: MESSERVI, y faut sacrifié, Sans tapage, pas moyen d'nos gardé. Hardi de gens crient dêjà bain haut Pour un muochai de ramasscies ; y faut Faith' un effort, car y faut les calmé, Car si v'la qui n'est pon fait, pour de mé J'abandonn' tout; je n'sai pon Proquleux, Car tu sai je quémanch' à avai peux. Man garçon Philip, allons, pas d'tue-tue, Si tu les manque je sommes perdus; I' faut que tu montre a MESSERVI Que tout ne dépend pas tout-à-fait d'li ; Ils ont était de maison en maison Pour une Orgue qui n'vaut pas une chanson. Pour des annais j'les avaimes empêchis D'en avait ieùne dans l'Eglis' plièchie. Ne v'la un homm', a-ti chitai la mé Y vain cherchi à nos faithe la Loi ; L'autre jour y m'disait que pour li Il voulait vais une hauluoug' dans l'clochi Man biaufraith, y'a quiq' temps me disait: Les Captain' sont p'tits du côtai d'Rozai, Pour de mé je trouv' tou bain comm'il est, Ph'lip, les manque port, tap' dû sus lus dais. Pour venin ès pierres, le Comité Décidi, de là, on devait l'sôté. Les Surveillants demandent d'être entendus, Disant, j'en tenons pas ès pierres, j'aimons mus Que tout' la véthitai en enthi sait connue, Que Mousieu LE VESCONTE dise Oui ou Non Nos a-ti donnai ou refusai permission ? Le Comité vint, y lus fut expliqui Qu'les Surveillants n'avaient en rain manqui, Que le Connêtable lus avait dit Oui Par trais fais: "Oui ou pouvais les plièchi, “En permettant un libre cours pour lhiau “Par en d'sous, j'ai des pipes si 'vos en faut. Le Comité, après muth considéthation, Décidèrent que, 'ils ne pouvaient pon Les laissi, fallait de suit' les ôté De là, y fallait les faith' transporté. Pour VESCONT' ch'tait un glothieux moment, Il avait, a l'aide d'une mentie, Cherchi à faith' deux hommes petits; Car san vaisin Jo avait dit: tu sai Y' faut : il avait dit, oui je le f'thai. Les Surveillants, au contraith, offraient (Car ils 'taient seux de tout chain qui 'disaient) D'appuihié chain qu'ils avaient dit par lus serment. De suite les pierres furent enl'vais Et pièchies tranquil'ment dans le Chimthièth; Nou les mins pour un temps à servi de dégrais; Ils n'étaient là qu'attendre la prumieth Occasion d'allé de la qui venaient; Y en avait qui s'faisaient seux de les y vais. Tout chonchin quémanchi à êmochi De l'opposition, et pis l'vier parti Vit MESSERVI, li demandant d'être candidat, Afin de quierghi la paraisse de tout chonna, L'y disant que si voulait dithe oui Il éthai tout lieu de se contentai, Car avec tout chain qui f'thaient pour li Y pouvait se faith' seux d'y arrivai. MESSERVI, mâri comme il 'tai, N'u pas grand peine à dithe oui, Car quand j'en 'devthais pon arrivai, I' dit, j'em 'fichrais oquo de li. Nou s'en dizait de pus d'une sorte, Biaucou des râts restaient à la Porte; D'autres disaient chest la pierre cassaie ; Que dans ses comptes nou n'viait qu'fumaie. Les siens qui voulaient, y payaient lus rât, Quant es autres, ils n'les actionnait pas. Chest vrai qu'il était venu à se faith Des amins à l'aid' des râts en arrièth; Nou savait que pour des semain' en enthi Les routhiers siez li allaient travâyi Sus sa ferme, faith' toutes ses affaith'; NICOLAS l'Samdi payait lus salaith. NICOLAS 'tait cordongni d'profession, I' r'griait tuous les souhiers dans la maison; L'chui 'tait acatai par l'gros, les piètain' Il les acatai par la douzaine. Tuous les matins y viéghait l'êtable A la pièch' de Mousieu le Connêtable Qui, jusqu'à huit heuze restai au hiet Dans l'hivai, comme dans le haut d'lêtai. Y avait les hardelles, et lus souhiers Jamais hin les trouvais assais bain grès, Ils ne les trouvaient jamais à lus goût, Pour chonna ils le picangnaient tréjous. Il avait biau chinai, tuous les èsfans Le grommachaient tréjous en dessandant ; Tuous les matins il allumai le feu, Apraitai l'dêjeuné, criait à Mousieu; Le monde, pour des annais, savait chonchin, Y vinrent déterminais d'y met' fin. Alors MESSERVI fut mins sus les rangs, Y s'en moquaient, ils l'disaient frais venant Qui ne pourait jamais s'en dêhalai, J'en 'tai pus à qu'mandai navith en mé. Ils 'taient tréjous prêt à s'mochi de li, Y riaient et l'pointaient tout clai au dé Disant: v'la notre Connêtable manqui. Y prenait chonna biaucou mueux que mé, Quand nou y'en palai hi disait tréjous: He has play'd me one, I will play him two. Es autres qui riaient il, lus disait: Y rira bain qui rira le derniait. Nou qu'manchi en Janvi, et pour sept mais, Nou quothi partout à cherchi des voiès; Tout chu temps-là nou fut de port' en port', Nous 'en entendait de pus d'une sorte; Chaqun vantai et louai san candidat, Sus l'aut' nou disait tout chain qu'nou savait d'ma. Dans un' maison il n'valait qu'à brûlai, Dans la prechain' nou faisait que de l'louai. De MESSERVI nou se bornait à craith' Quin' pourait pon se tithé bain d'affaith'. Quant à VESCONT' nou s'en disait un tas, Nou disait qui gardait biaucou des râts ; Sus les Grandes Routes, nou disait, dam Ch'tait la qui faisait l'miheu de sa gamm. San quozin, quiq' temps devant Fêlection, Dis que j' m'en allais avai une action, J'éthais à payi domag'-intéthais, En outre à la Cour des tas de frais; Que j'avais dit chain qui n'était pon vrai, Il en 'tait prêt à capuchi sus me. J'li rêpondi, si je l'ai di j'l'crai. Quicq' mais après, y vint me demandai Chain qui m'avait dit, fallait l'oubliai, Me disant que pour li il éthai creu Qu'tout était dans l'état qu'il éthai deu; V'la qui y'avait fait d'la pein' à pensé Q'san quozin avait des sous à r'tounné. Il dit que la chose n'avait qu'un nom, Pour li ch'tait une restitution. Deux ou trais jours devant l'êlection, Nou disait que CHARLES, de la Poudrettie, S'étai vantai qu'il avait l'intention D'allai à la paiq', faithe une partie Es Ecrehos ; il devait emportai Une douzaine de nos hommes de Rozai. Il en soiennai, y n'lus mancq'thai d'rain, Et r'vaindraient en Jerri le lendemain Pour trouvai VESCONT', rê'lu avec trais Voiès de majoritai, l'affaith' 'tait près. Mais comme j'navaimes pon 'tai consultais J'nos décidimes d'usé tuous les moyens D'empêchi nos hom' d'être emportais. Pour un' chose aussi importante, au mains Y devaient nos l'dith', j'éthions consenti, Pourvu que le choix des hommes, y nos ethaient laissi, J'en éthaimes trouvai, pour les pilotai J'aithaimes mins Jo et san biaufrèth d'Rozai ; Mais de faithe tout chonna sans nos l'dith' J'dimes Non! faut pon les laissi en rith'. J'envimes à Rozai, avaut la gnait, Sus l'matin du vingt-neu du ruais d'Juillet, Une douzaine de buouns et forts garçons, Ils 'taient tuous de buouns et gros lurons, Prêt à restai sus l'carrai au bezoin Pour accomphi chain qu'ils avaient dessain; Après avait étai longtemps au ghiait Nou dis qu'CHARLES 'tait quochi à son liet. Y pathais que quand CHARLES fut prêt à s'en halai S'n'homme dit, y sont là Pour vos arrêtai; CHARLES dit, depis qu'chest de même je n'ithai pon Me faithe assomme par yeux à coups d'bâton. Y s'en vinrent, excepté Mess CABOT, Qui resta pour soigni Mait' Tom PALLOT, Car Maître Tom ne viyiait pon trop cliai, Une vetuth' d'vait allai pour lus criai A neuf heuze, ils 'taient en train d'montai Quand le Chant'gni dans un' autre d'sendai Au galop ; y venait pour l'emporté Et prendre au haut du Mont, Mait' JOSUÉ. Le Chant'gni avait les miyeu ch'vaux, Y nos passi en arrivant à haut. Il était bain pressi, et voulait vais Si d'la maison, il 'tait bétôt auprès. En regardant, l'chapai tchi dans la rue, Un cli'va eu l'malheur de pilé d'sus; Il s'mins à criai tout haut - Stop, stop her, Que je l'ramasse man buoan bell-topper. Il 'tait tout neu, y criai de l'avai gâgni, Car sus l'êlection le prix il avait gagi. L'accident au chapai nos permins de l'passai; J'trouvimes Mait' Jo à sa hèche à s'erposai. Le Chant'gni dans sa vetuth nos suivait de près, J'prends Jo par l'bras, li par le fond de ses brès, Je tins bon, je hali, tout en cratchi, J'pensais que la prinze allait m'anchi. Je fis un effort, je tchi suis le dos Dans le fond du Cab avec Mait' Jo. Le Cocher qui viait, pars au galo, Laissant le Chantgni seul sans san balo. Y prins san chapai, pensant pon qu'les fiers Du ch'va avaient passai à travers; Y n'éthai jamais pensai le vais sacaghi Par les baloques de ch'vaux à MESSERVI. Pour un' autre fais y se promins bain Qui n'arrêtrai pour absolument rain. Mait' Jo dit, il a 'tai indelica, Y n'éthai pon deu m'atrapai par là; Mes brès étaient bouannes, j'en étais bain, Le morcai à presq' restai dans sa main; Le Chant'gni ma fait grand ma, je créthais Qui y'a laissi la merque de ses dais. Hier au sai ils vinrent m'vais en passant, Mettant, maugrai me, sus ma table chent francs En me demandant de ne sorti pon; Ma femme, hou l'était la, et MANON Dit prenais les, j'n'en avons pas bezoin Car hou pouvais contai qu'il'itha demain; Il a promis d'voté pour MESSERVI, Il l'itha, car pour mé j'y tchains hardi. Maître JEAN LE RICHE est venu à matin, Il est venu de buoun 'heuze pour sa rente En riant, car y voulait faithe le malin, Prenant ses sous il a dit: produit de la vente? Manon y'a dit, nou fai, vos amins sont venus la veille Je pensi en vous, v'la qui féthai à merveille Hou s'avais fait bain, et hou pouvais les prendre V'la qui nos sauvtha la peine d'les lus rendre. Pus d'une fais je l'ai entendue racontai J'lapp'lons l'histoith de Mess CABOT et Mait' JOSUÉ. Yiun de nos homm', il avait 'tai droghi Es Landes, à Saint-Ouen, y fut drochi Avant la gnait, à la carre d'un kios, Disant: “Attends-là que l'recuil sait clos.” La rousaie eu un buoun effet sus li, Le solai fini par le revilli ; Y se l'vi, s'mins à marchi sans savai Du tout dans qui partie de l'Ile qu'il 'tai. Après avai étai deux heuz' en ch'min Y se trouvi tout au près du Moulin Des trais paraiss'; il eu à s'dêpêchi, Y vint en temps pour crier MESSERVI. Y nos en raconti toute l'histoith, Pour un temps nous' avait peine à l'craith, Quand non vins à savai que chetai vrai Plusieurs de nous n'avaient que d'lus paumai Quand non pensait à tuous nos buonnes gens Qu'en étaient que pour tuous lus dêpens, Car il en avait coûtai bel et bain A porter notre homme à Saint-Ouen. Et pis y avait aitou la bille A payi, car il en avait contai Siez HARRIS, au Moulin-de-la-Ville, Pour la prumiethe partie de la gnait, Et la farce n'ayant pas réussi Y n' s'trouvait personn' qui voulut payi; Tellement que quiq' temps après l'êlection Nou s'entendait qu'ils allaient envié action. A neuv' heuth non s'min à dêjuné; Y avait tout chain qu'nou pouvai voulai; Le pus dificil pouvait s'rassasié. Y avait la Band à McKee qui jouai, Ils étaient tuous là, y tappaient bain du. A l'auberge de bas, les Allemands Jouaient haitou pour amusai lus gens Avec le bri d'la prumieth, rain n'tait entendu. Après nou s'mins à voté, n'sachant pon Qu'est qui résultethai de l'êlection ; Y avait du bri, ils s'entre bousqu'laient, Les Juges furent obligis d'dithe un' fais, Si v'la qui continuait, y s'en hithaient Et féthaient rapport à la Cour. Valait mus Etre tranquill', ou les deux s'thais perdus. Chonchin à tuous lus fit grand peux, Car y criaient bain gagni tuous les deux. MESSERVI vint quarant' en avant; VESCONT' en eu, y vint à un' voix près, Et pis MESSERVI erprins le devant Et finit avec chent trente-deux voies; VESCONT' en eu qu' chent vingt-six; ne v'là L'êlection finie, v'là san résultat. Nou pale d'êlection, ch'en était hieun' Comme nou n'en avait de longtemps veu; Nou pâle de haine et de ranqune, Y'en avait comm' y'en a jamais yeu. J'espeth' que de notre vie non n'verra Une autre êlection comme chetla. |
|
Après l'êlection j'nos mimes à criai houras, De MESSERVI j'pensais qui l'y hallaient les bras, Chétai à qui chaquethai de main avec li, Je le vi pour un temps, j'en avais grand pitchi. Tuous les siens qu'avaient perdu étaient bain mâris, Ils eurent d'la peine à s'consolai, et pis Y s'minrent à criai dans lus mârison, tout haut, Que tuous les gagnants n'étaient qu'un muochai de viaux. Chais chin retorquaient et lus disaient attendais A Sam'di qui-vain, hou s'thais d'la pierre cassaie; Attendais mes gaillards, on vos en fich'ais pas, Car bon s'éthais à les payi, tuous vos viers râts. Y avait deux Philip, un Jean et un Jo, D'avait perdu, ils en avaient l'choeur tout gros; Ils avaient de la peine, ils en pieuthaient, Y faisaient de la peine vraiement à vais, Ils en lairmaient, chétai comme des esfans; Ch'tai tan mus que v'la qu'in restit pon en 'dans. Si n'avaient pon pieuthai, je sis seux que v'la Qu'étai assais pour en avai bain dit ma. Ma grand-tante Nancy pus d'un' fais ma dit De la peine qui sort, y'n'ia auqun dangi. Tandi qu'les gagnants étaient à lus amusai Les autres quémanchirent tuous à compiotai Y dirent, y'a ti auqun moyen d'arrivé A empaichi l'Penfaicq d'être assermenté. Yen à pas yeun des siens qui ont votai pour li Qui la fait sans avai tai, ma fé, bain payi. Chest seux, hou pouvais quémanchi par le Recteu, Et fini par Mait' JEAN DE GRUCHY, le Lecteu. Se mins à dith' Mousieu PHILIP LE VESCONTE, Pour de mé j'ai tréjous bain agi, j'ai honte Ditai travas, je n'en éthais pon ma fé, fait; Je n'éthais pon voulu avai raicours à ditai. Après avait 'tait neuf annais, j'en voulais pon Havai une aussi terrible êlection. J'ai quicq' fais entendu dith', l'pubhi est ingrat, Si ou n'en avais jamais yeu la preuv', la v'la, Mais si ou voulais je le contestethai bain, A une condition, chest qu'in m'en cuoûtai rain, Et comme je sis tout à fait seux d'en gagni, Les frais s'éthaient payis par ALFRED MESSERVI. Yeun se mins à dith', mettais mé pour au mains six, Un autre pour sept, et pis yeun pour quinze louis; Ils étaient tuous décidais que dans auqun cas Y'n sethai pon assermantai, y'n sethai pas Connêtable, un contest pouvait duthai dghix ans, Quant Mousieu NORMAN de ses trais ans s'thai fini, Y nomthaient Mousieu LE VESCONTE prumi chantgni, Car y fallait que MESSERVI fut fichi 'dans. Les siens qu'avaient laissi lus sous siez Mait' Josué Se firent un cliun, disant allons à Rozai, Siez Mait' Jo, y faut qui nos donne les sous, et Si n'veurs pon j'li f'thons peux; ergas le pistolet, Se fit John à George, les sous je les éthons, Car je m'nichons d'la tithé, la vieille Manon. Manon ne faisait que d'arrivai just' siez l'y, Nou l'entendait criai: MESSERVI a gagni. Nos hommes tapent du, et Manon couors à lue, Se fis John, chais pour les sous que je sommes v'nus. Hou dit, et bain pour vos dithe la véthitai J'vos dis hier d'les prendre, j'en faisaimes pon ditai Mait' Jean Le Riche, de la bas notre vaisin Est venu nos vais en passant de buoun matin Je les y'ai donnais tous, je ne les ai pas Allais vit li demandai, là? le v'la la bas. Manon lus dis tous chonna, d'un air tout sethieux Yn ne pensaient guèthe qu'on se moquait d'ieux Y s'en furent, y prenaient tout à la buonn' fouai Yn criaient pon qu'Manon pouvait les atrapai. Y virent Mait' Jean, y dit, mais oui chest vrai J'y ai tai, et hou m'a payi chain qu'ou me devait Ch'tai d'la rente, ch'tai a matin qu'ou m'a payi J'pensais tréjours que ch'tai des sous à MESSERVI Vethghia, tout me portait à l'craith, j'en pensais pon Qu'VESCON'T' avait dêpensai rain sus s'n'election. Y s'en furent siez BROWN, a fini lus bordaie Y 'restirent la tout' la gnait, la matinaie Y s'en furent par la vallaie et par l'moulin, George eut de la peine près le ponterrin, Y n'était pon fort, les gambes pliaient suous li, Avec peine y descendi le moulin Gargni. Pour dith toute la véthitai, Ils étaient entre vert et set. Le Sam'di vint et MESSERVI se présenti A la Cour, car le Juge Gruchy y'avait dit D'y allai pour y prêtai serment, Je l'vi y m'avait l'air tout content. Yn' criait ghieth qu'est ki l'atendait. Ils s'étaient décidais de le contrecarrai. Monsieu LE VESCONT' avec longue pétition Ecrite, s'présent' pour contestai l'êlection Dans ses raisons y quémanchi par ataqui Des personnes beaucou pus honnête que li, Y disait qu'il avait 'tai Connêtable neuv ans, Qu'il avait tréjous bain agi, que tout le temps Les affaithes étaient menais comme y faut. Ses neuv ans avaient 'tai, hi pouvait l'dith tout haut “Eclatant a tous égards," je l'dis en français Y s'parlochait, j'aime mus stichi au jerriais, Et bain quand j'pense a san gros mot “êquiatant” Je dis, vethghia, et pis j'en êquiate de rith', Biaucou de gens m'ont dit qu'ils en ont fait autant “Equiatant" a ma fé veth, si fallait tout dith! La Cour décidi que des temoins s'éthaient entendus, Que les siens qu'avaient connaissance s'éthaient convenus. Le Sam'di au sai, a l'auberge, un' reunion Eut lieu, ils avaient empruntai d'Jo san canon, Ils étaient tuous contents, y s'mmirent a tithé, Les vitres des f'naitres n'avaient que d'en cassai. Les Gazettes en firent du fun, y criaient Q'chtai une atacq' au Buolai, par les français. Je n'étai que hieun de la Ville-ès-Normans, Qui prenait les affaithes de la paraisse pour trais ans, Car Mousieu NORMAN était le prumi Chantgni, Y s'thai Connêtable, avec l'ancien a yiaghi. Et comme chonna y s'éthaient oquo maitre, MESSERVI lie puouvait pon lus tenin tête. Une semaine ou deux après qu'Mousieu NORMAN Fut Chef y'eu une Assembiée, il 'tai président Car après qu'il eu prêtai serment, y s'trouvait A la tête, ch'était li qui devait présidait, Un Comité 'tai nommai pour vais les comptes De l'ancien Connêtable, Mousieu LE VESCONTE. Comme d'habitud', dem'-hieuth' devant l'Assembièe, Pour examinai et vais les comptes passais. Mousieu ne vint pon, hardi s'en faut, le prumi, Si j'ai tai bain informai, y vint le dergni Pour dithe la véthitai, y ne voulait pon Un' trop longue ni séveth' examination. Et ses comptes n'étaient pon du tout balanchis; Ichain et là non s'en trouvait partie Ecrite avec san crahion de pion. Ch'tai pus facil' quand y' avait de la correction. Mousieu CHARLES FRANÇOIS DORAI voulut qu'manchi A faith' l'adition, faith' les comptes balanchi; Mais Mousieu LE VESCONTE lis dit, fallait pon Allait si vite, fallait pon faith' l'adition, Car il avait une demande à faithe, Qui s'thai accordaie, il avait tout lieu de craith'. Qu'est que ch'est dis Charl' François; j'en vos dithai pas, Rêpond Ph'lip, je la f'thai à l'Assembièe la bas. Quicq'un, après chonna, d'mandi si produithai La list' des Râts, y dit ou l'est siez TOM GODFRAY. Après lectuth des comptes, VESCONT' quemanche - Avant qu'Mousieu NORMAN eut trouvai la balanch' - A dithe (y pathaissait faith' du sentiment Y savait bain qu'il les atrapthai joliment) Que quand la Joint Stock manchi, y a quatre ans, Y avait une somme de chent louis dedans, Ils 'taient en son nom, mais chétai à vous, et pus Il avait perdu pas mains de quarant' louis d'sus. Y demand' à l'Assembièe d'en tenin compte Après chain qu'il avait fait, j's'thai une honte Qu'il les perdrait. MESSERVI dit, les intethais. Y dit, yen avait pon, d'mandais à Mess BENEST, Qui dit, j'ai yen un compte, et en véthitai, Nia pon d'intéthais, n'y en a pon sus ditai. MESSERVI erdit qu'il avait tout lieu de craith' Que les choses étaient tout a fait du contraith. Y dit, si j'en payons, pour de mé je créthais Qui faut, au tout fins mains deduith les intéthais VESCONT' se l'vi, disant qu'in voulait pon menti, Que pour intethais hien avait pon un dégni. L'Assembliée voti tout, maugrai la minoritai Qu'in s'en tint pas la, fut à la Bancq', trouv' san livret Y firent l'addition des intéthais, et pis Y s'en trouvait just', a siez sous mains de Vingt Louis. Mousieu NAIS, pour chonna fit un procès Y perdi sa cause, VESCONT' fut dêcherghi, Et pis mousieu NAIS eu a payi tuous les frais, Les Juges 'taient divisais, le Bailli voti Pour le quierghi, car pour li yn' criai pon Qui y' avait yeu fausse réprésentation. L'Act' de la Cour Royal' disait que la chause Etait votaie en connaissance de cause. J'en 'tai pon du tout de même, chest mé qui vos l'dis Qu'il a yen chais sous la, à l'aide d'un' mentie. Le Coup étai montai, il avait 'tai bain jouai. Yen avait que trais ou quatre dans le segrai Quant es autres y votaient par admithation. Pour un homme qu'avait fait tant dans sa gestion, Quand j'y pense les g'veux m'en draich't sus la tête. Quand je pense, de combain de sorte de gens Qui y'a, y y'en a qui ne s'craient pas bête Mais qui s'laissent ménai tranquil'ment par des lians. Dans l'assembiée quant le chentgni levai la main, Les autres suivaient, comme si n'sagissait d'rain. Car quant a mé, sans menti du tout, je cré'thais Si j'avais votai pour donnai les intéthais Que quand je s'thais quochi a man hiet, J'y r'pensais de temps en temps la gnait. Le conteste étai en allant, y qu'manchi A tout l'monde, lus caractaith a ataqui. Mousieu DU HEAUME en eu sans lot, quant a li, Il éthai deu votai pour li, par hammiètchi, Hin pouvait pon craith qui devait faith 'autrement, Si la votai pour MESSERVY, chest pour d'l'argent. Ataqui l'Eglise, dans le temps passai Pour mains, il éthai t'ai excommuniai, Mousieu DU HEAUME ne s'en tint pas la Y l'fis payi Quinze Louis pour chonna, Il les payi comm' domag-intethais Et oquo il eu a payi les frais. A Mousieu NICOLLE, Député, d'la "Fontaine," VESCONT' cherchi à lis faithe biaucou d'peine. Quant a PHILIP AUBIN,(1) il avait distribuai "Du solide" ou quicq chose comme ditai. JOSUÉ DUOTHAI, le sien d'auprès de Dhiélament Avait fait quicq' chose de grave autrement, Miss DE GRUCHY, sa tante, avait réussi, A faithe peux a chu puour Maitre JEAN BIAMPI; Il étai san locataith, hou dis, ergardais Mait' Jean, dans la préchaine élection chain qu'on f'thais, Mousieu NICOLLE, du Haut d'l'Orme, avait dit, Quicq' chose, au pus jeune DANIÉ CHEVAILHI, Et pis y'avait oquo FRANCOIS CHARLES LE SUEUX, A deux ou trais il avait cherchi a faith' peux! Et bain d'autres qui n'y avaient pon fait piaizi Hi criait que tous éthaient deu votai pour li. Y demeuthai dans une maison de verre, Et il était le prumi à rué la pierre. Il est évident qu'il oubliait tuous les siens Qui s'étaient servi de toutes sortes d'moyens. Y'avait le chantgni et san biaufraith, JO DUOTHAI, De pus d'une sorte en avaient aitou fait. Et pis JOHN ERNON, PH'LIP et GEORGE LE QUAÎNE, Avaient aitou agi quicq' chose de même ; Ils avaient étai jusqu'au point de m'nichi De faith quicq' dro à Mait' GEORGE DE GRUCHI. Ils en firent de pus d'une sorte, y n'arraitaient à rain Ils emportirent un homme jusqu'ès landes de Saint Ouen. Le contest' continuait, Ph'lip qu'manchi à pensai Tout chain qu'il avait dit, y n'puourait rain prouvai. La Cour était dêterminaie de copai cour Le procès, en donnant es deux tout pien de jours. L'parti à VESCONT' se mins à pensai es frais, L'affaithe n'allai pon comme ils entendaient, Y séthaient bain oblighis d'abandonnai tout. De yiou qui s'en allaient ramassai tuous les sous, Car tuous les siens qui avaient promins d'en fourni, En viant les affaithes, avaient tuous changhi D'opinion, et y fallait mus abandonnai, Et enfin 'laissi après tout assermenté. Ils étaient après tout, maîtres dans l'Assembièe; Y y'en donnaient là, à la prumiethe bordaie, Car yn manqu'éthaient pon de li faithe grand peux; Dans mains d'siez mais, y voudrait être avec yeux. Un jour DURELL vint vais si y avait moyen Que VESCONT' et MESSERVI s'verraient le lend'main, Pour arranghi afin d'arraîté le procès, Afin de mettre un arrêt à tuous les frais. Mousieu Le Bailli lus avait fixai trais jours Pour la semaine en venant, et les daibours S'éthaient bain grand, chetait biaucoup mus d'êprouvai Par tuous les moyens, fallai tachi d'les sauvai. Ainchi fut, VESCONT' et MESSERVI, L'Avocat DURELL et pis le Chentgni, S'trouvent à l'Hotel, au haut du Buoulai Pour de toutes les affaithes pâlai, VESCONT' était prêt a abandonnai Le fichu contest', il était tout prêt A payi tuous les frais de chu procès A une autre condition, chetai Que l'Avocat Durell continuethai Le célèbre procès des intéthais (Qu'avaient 'tai joliment escarmoutais En mentant bain du devant l'Assembiée) D'après les instructions qu'Mousieu NORMAN Venait de lis donnai, tout récemment. Pour MESSERVI, au contraith, y voulait Vais les intéthais payis à la paraisse, Car y voulait les vais rentrai dans la caisse. Mousieu DU HEAUME avait dit qui préféthai A chut' condition san procès abandonnai. VESCONT' ne vouli pon, car y préféthi Les dghise-neu Louis et Chelins d'intéthais gagni. Avec mousieu DU HEAUME, il en perdit Il eu a payi dommag'-intéthais, Il eu a payi aitou un mouchai d'frais. Y dirent que le contest' s'thai abandonnai Que MESSERVI s'thai le lendemain assermentai Y fut assermentai, et pis quand vint le sai Nou ne savait pon trop bain, ou'est que non s'en 'tai, De fire-works la paraisse 'tai illuminaie, Le canon tithai, nou n'en viait que fumaie. Hils en firent de pus d'une sorte, y voulaient vais Si pouvaient faithe comme les autres, y 'avait trais mais. V'la MESSERVI Connêtable, le v'la assermentai, V'la le procès fini sans avait rain prouvai, Les temoins a daichairg n'furent pon entendus, Chest seux si y 'avaient 'tai, la Cour ethai trouvai Que biaucou des autres voteurs s'étaient vendus. La n'est pas la question, je sai qu'in devthai pas Dans auchun êlection, y 'avai ditai travas Mais de tout chain qui y 'a oquo pus pithiable, Chest que pour met' les choses sur un pi stable. Et quand non sai que les choses ne vont pon bain, Nou est bain obligis de n'arraitai a rain. Ne v'la l'affaithe, chetait là la position, Fallai clouai pour changhi l'administration. Je crai en vethitai, que non peut dith, au mains Que dans chu cas, la fin justifie les moyens. Mousieu NORMAN avait 'tai Chef-de-Police, trais mais, Chest bain drôle me dit un homme, il éthai deu vais, Et bain nou fait, nous dit que la conscience fait peux, Qu'oul est la, comme un espaic de Proquleux. VESCONT' se trouvait acqusai, y n'voulait pon Donnai a NORMAN les pièches de conviction. Y gardi les livres, y disait j'en 'tai pas La peine d'les emportai, avait l'embarras, Pour avai la jabb' de les rapportai siez li, Car il 'tai dam' bain seux de ruoulai Y dit a Jo, au bezoin j'sis prêt a servi Oquoth une gestion la pièche de chantgni. Quicq' fais y disait tout bas, pour mé je crai, Que MESSERVI est tout prêt a abandonnai. Quand MESSERVI eu les livres de VESCONT', Y s'mins a faith' l'examen de tuous ses comptes. J'li dis, qui n'y verrait qu'fumaie “hi dit veth Et oquo chest seux, gen s'tha de la toute naith' Y fut oblighi d'faith ses comptes pour tout l'temps Qu'il avait étai Connêtable, dans les neuv' ans Y avait chinq-mil ching chents quartiers en arieth. Dans ses comptes y'avait en blocq erchu chent Louis De Tom GODFRAY, arrérages de rat, et pis Hil avait oubliai de dith' a qu'est chétai. Yn' faisait aucun mention si ch'tai d'vous ou d'mé, MESSERVI se trouvi basqui, yn' pouvait pas Continué à faithe le reste du travas, Car devant continué, y fallait bain savai, Car a qu'est que tout chu rât la appartenait. Alors MESSERVI pensi à VESCONT', y l'vi Et li demandi pour le compte daitailli. Y répondit que non, ch'tai sa propriétai, Qui la gardethai, pour qu'est qui voulait ditai. Y s'avait bain que ch'tai la cliai de la position. Sans chela, pas moyen d'faith d'examination. MESSERVI s'trouve arraitai sans savai bain Si puourait procédai, si puourait allai pus hien. L'idaie li vint de demander a Tom GODFRAY De vais son livre et au bezoin en copié. Y demandi a Tom, y dit oui hou pouvais Examinai mes livres autant qu'ou voudrais, Et en ouvrant le livre MESSERVI trouvi Que mousieu GODFRAY d'pis longtemps avait payi A mousieu LE VESCONT', siez Louis et demi Pour la paraisse et il les avait gardais, Car dans ses comptes hin les avait pas portais MESSERVI dit, en viant 'livre, man vier renard, Je t'chains achteu, je trouvthai les râts en retard, Achteu je comprends tout a fait bain ta raison En ne voulant pon me donnai d'information. Je te comprends bain achteu, à vethghia, ma fé, Chais pour chonna qu'A, B, C ont votai pour tai. Siez Maitre ET GRUCHY chétai la même chose, Ils avaient aitou fait les affaithes de la paraisse pour une pose. Les montants là étaient la balanche, après Que les hommes d'affaith' avaient déduit les frais Des dghix procès que la paraisse avait yeu Avec plusieurs personnes, yeun ou deux avec le Recteu, D'même que le montant ne pouvait pas Representai le vrai montant du rât. Y pouvait y'en avait, à quicq' chose près Le même montant à payi les frais. MESSERVI continui, et des râts en retard Y'avait un' longue list, y fut siez JOHN PERCHARD, Pour onze louis quinze, nou li montri deux r'chus Du même jour, un' annaie avait 'tai portaie. Quand à l'autre oul avait étai bain gardaie. Y avait deux annais du sien de Mait' Josué, Il avait san rechu, yn voulait pon l'montrai, Il avait payi trais ans avec un seul 'r'chu. Un' annaie avait 'tai portaie, les deux autres Avaient 'tai gardais, pour gardai compagnie à l'aut'. A payait un an, manquait deux, avait payi depis B oubliait deux ans, en avait payi yeun, et pis Avait quittai à payi; JOHN NICOLLE, des Carrieth', En payi yeun, qu'avait 'tai laissi neuv ans en arrieth. Y juthi à MESSERVI qu'il avait dans sa maison Le r'chu, comme quthateu de Mess DE GRUCHI. Qui devait chu rât la, y ne le porti pon Dans ses comptes, car je le tcheins de l'héthiqui. Plusieurs personnes à qui nou s'avai d'mandai Furent siez VESCONT' pour avai l'rât ertuounnai; Y disaient qui fallait l'faith', par pitchi pour li. Y faillait mus y' allai que de l'dith à MESSERVI. Par ses comptes nou vit, malgrai chain qu'nou s'avait dit, Que tout étai vrai, nou n'en connaissait qu'la maintchi. Quand es Grandes Routes, une scaine s'était passaie Dans la carrièthe à JEAN DANIÉ DE SAINT CROIX, Par rapport à la mézuth' de pierre cassaie. Philip n'avait pon fuoi dans sa tape, quant ou muoyiait La minzéthiab' tape, tréjous oul aluongnait, Fallait mézuthai avec un court bâton d'bois, Multipliant par sa longueur, nou s'étai près, Pour longtemps à mézuthai non s'en 'tait servi. Heutheusement un jour nou vint à dêcouvri Que le bâton 'tait trop court, avait ti 'tai racourchi, N'oun' savait pon trop, un autre le rempièchi. Ch'tai en septante-trais, dans le mais de Févri, Ph'lip donn' un r'chu pour chent verges d'pierre cassaie Y devait les fourni après la Saint-Jean passaie. Ph'lip était très-content, y 'tait satisfait, Y fournit toute la pierre dans l'haut d'l'êtai ; Y s'mins en travas à carrié, y n'eut pon peux, Au lieu de chent, il en cassi chent soisante-deux. Le r'chu pour les chent verges, y fut rapportai Après du d'vis, dans sa quisine y fut brûlai. Chest tout vrai chain que j'vos dit, le sien qui le fis Me la dit, et il est oquo tout pien de vie. De même les Grandes Routes payaient Les mêmes verges de pierre deux fais Le prumi r'chu avait 'tai présentai Deux jours après qu'il avait 'tai donnai. Et pis les prumieth chent verges s'ertrouvaient dans Les comptes des Grandes Routes l'année en venant. Dans une autre carrièth' y'avait un autre mouchai De pierres cassaie, et MESSERVI le fit transportai Tel qu'il avait 'tai laissi, par l'homm' qui l'avait cassai. Avant de la transportai, MESSERVI l'eut mezuthai. Y le fit mezuthai par le chentgni JOSUÉ DOUTHAI. Y mezuthai de la pierre, Jo yest bain aufai, Le muochai de pierre ne contenait pas la mainthi De tout chain que les Grandes Routes en avaient payi, Y'en avait une fraction pus que l'quart dudit montant. Y'avait yeu sans auqun doute quicq gros erreur la 'dans. Un homme du cotai d'la Bouctethie, Pour votai y y'avaient offert dghix Louis, Mais le bachouard ne voulit pas dith' oui. Tout d'un coup l'v'la diminué d'un quarthi, Je le sûmes justement en buoun temps, Car je hien avaîmes offert tout autant. Ch'tai domage car il en avait bezoin. A sa famil' v'la qu'éthai fait du bain A ses esfans v'la qu'éthai acatai bain du pain. De chais cas la je m'bornâhai a en cité deux Y s'étaient vantes que Charles n'votai pon contr'hieux, Jo fut le vais, le jour devant l'êlection, Charles dit j'crai Qu'ou n'avais pas l'intention de me laissi votai. Jo dis, vote pour nous, man garson, comm' un homme, Et tu verras demain, que ta voie sétha buounne. Y dis j'ai l'intention de votai pour MESSERVI, L'lendemain, quand pour votai au poll y s'presenti, Le Juge GRUCHY, tout de suite y li dis, mais Je vai que par la Liste ou n'avais pas de voie. Quant sa chédule du rât fut examinaie, nou vis Que l'expertise de son gardin avait tai changhie, Car il avait pour des annais payi quatre quarthiers. Le quatre y'était, et avait 'tai changhi en un trais. L'expertise avait 'tai faite et après nou mins Sa terre à un louis mains qu'la sienne à ses vaisins; La terre au quozin Jean 'tait sus les trais côtés, Ou l'était evaluaie à un louis de pus par vergée. Y'avait Captaine LE GROS, le Chantgni LE SUEUX, Et le Chantgni GODGEAUX n'étaient pon d'avec yeux, Y furent aitou pinchis quant à lus fonci, Sus lus chédule le buoun chiffre 'tait croisi, Et un autre y avait étai substituai; Un nombre de quartchiers y'avait 'tai ajuoutai; D'autres, des hammins, chest vrai comme je vos l'dis, Du même montant ils avaient étai déduis Car fallai gâgni sus les prumiers Chain qu'étai perdu sur les derniers. De même pour la paraisse, y n'y avait rain De perdu, et tout finissait tout à fait bain. Y avait des gens, sans droit, nou lus en donnait; A d'autres, le droit qu'ils avaient, nou lus ôtai Nou disait, chest le Comité qu'a fait chela. Mé j'ai trejous dit, chest un autre qu'a passai par là, Car je sis seux, si j'avait 'tai le Comiti, Le buouan chiffre n'éthai pon 'tai corrigi. Quand n'ou me demande, qu'est qui la fait? j'dis j'en sai pon, V'la qui eu quasi l'effet d'changhi l'êlection. Y a des gens quand ils ont quicq' dro à faithe, Y n'vont pon cherchi des témoins, ni un notaith. Es Assembièes que MESSERVI présidait Y l'picangnaient, cherchant à l'faith' s'oubliai, Mais y n'y avait pas moyen, car MESSERVI Pour yeux était un tout petit mio trop vi. Quicq' fais en l'picangnant, y li demandaient. Y disait, sans faith' la mine de rain, faut vais Dans les comptes de Mousieu LE VESCONT Si v'la qui y'est, ils en avaient honte, Le Chentgni Palo lus dit de se taith, Car ils étaient seux d'en avai du pieth. Veuilles des Assemblées Fortement contestais. Une affiaith fut décidaie par une vois L'affaith 'tai venue diversement près Maitre Nicolas de la Bouctéthie, Vint une heuth 'tard, san vaisin le fis Dans la matinaie, il avait t'ai l'vais, Hil l'trouvi quochi sus l'sofa aupres De s'nauluouge, vite dans un clien dghi L'auluouge, d'une heuthe y r'targhi, Nicolas, frottant ses hiers, ergardant S'nauluoge, dit y n'est pas oquo temps S'erquoch', prend un nap et fini, par s'l'vai, Se chang', mins ses souhiers, et s'en allai Quand san vaisin l'rencontre, y r'venait, Y li dis, l'chentgni a cherchi pour tai. Pour nous l'affaith 'tait passaie, heutheus'ment, Notre homm' 'tai sauvai par la voie du Président. Y cherchaient sus tuous les sens a nos jouai, Je t'aimes bain d'avai MESSERVI, il les arrangai, Je t'aimes pour avai un Concert, et le Comiti,(2) Dans l' mais de Novembre, l'fixi pour Janvi. Tout était prêt les billets étaient vendus Y'en avait dans les trais chants ou même pus, Le bénific' du concert, le net produit, Etait pour les pauvres, pour les soulagi. Y'n s'en gênaient pon ils étaient décidais D'nos empèchi, en nommant Mess DE SAIN' CROIX, Pour de l'êcole en être I'Trésori, Pour remplêchi leancien Maît' JEAN DE GRUCHI, Et pis pour quand le jour du concert vendrai Jo lis dit, frume tout, prends la cliai siez tai. Fai d'ii-iên-ie, cliest d'même qui faut l'sarrêtai. Ch'tai dans l'école que l'concert devai se passai Et MESSERVI avait promins d'allai présidai. Dans le Comité (3) ils avaient un' majoritai De quatre, j'etions dans une grande minoritai. Y se vantaient dêja de lus coup, ne v'la ti pon Y vont vais mousieu le Recteu pour une reunion Du Comité, MESSERVI dit fallait ergardai Car ils étaient décidais de cherchi à nos jouai. Fallait attendre jusqu'au prumi jour de l'annaie Pour chti jour la, y lus promettait une bordaie. Par le Contrat d'l'êcole, tout personne qui payait Une contribution de pas mains d'un Louis dev'nait Du Comité pour l'annaie, hin fallait pas payi La contribution avant l'prumi jour de Janvi. Mousieu du Heaume lus dit que chetai MESSERVI Qui ne voulait pon vais le Comité reuni. Y demandent a MESSERVI la raison Qu'il avait, car pour chest qui ne voulait pon. Y dis, estu bachouard, si Mousieu voulait Y l'convocqthai bain, sans même m'en palai. Ma fé tu m'étonne, John, sai tu pon bain Si le Recteu voulait y narraitai pour rain. De même pour des semaines en enthi, Hil allaient d'un à l'autre, nou reussi. A gâgni du temps, le Comité fut convoqui Pour le traisième jour du mais d'Janvi, le prumi Jour de l'an, y hieu ching membres qui furent payi Un Louis tout rond pour lus annaie de contribution En faveur de l'Ecole, demandant que lus non Sait ajoutai au Comité, nou lus demandi De v'nin assistai le lendemain au Comiti. Le lendemain y vinrent un' heuth' devant l'temps, Y s'muchirent à haut dans yeun des appartements. A l'heuth' fixaie lus hommes arrive, Ils étaient contents, yn' faisaient qu'rithe. Dans la salle le Recten s'mins en train d'procédé, Y faisait grand frai, ch'tai dans le fond de l'hivé. MESSERVI dit, y faut allai de l'autre côtai, Car pour de li il était pus qu'à maintchi gélai Il avait fait allumai du feu. Mais en effet, Se fit Jo, y s'en furent, à la porte un arrait se fait. Y'avait chinq personnes à lus cauffai. Demandais! Se fit Jo, yien v'la ti une fichue êcauffaie, Nou li dit qu'ils avaient payi lus contribution, Et qu'ils étaient la à attendre la réunion Du Comité, pour nommé un nouveau Trésori, Et pour rempièchi l'ancien Mait' JEAN DE GRUCHI. Jo vit tout de suite comment qu'la chose allait Y dit de suite, y n'y a pas moyen d'l'en otai. Ils étaient venus pour nommai Mess DE SAIN'-CROIX, Yn' sattendaient gueth à une patheille bordaie; Y contaient pas mains de quatre de majorité, Et y s'y en trouvait chainq à les contre-carré. Chétai Philip qu'était diversement bain ermins, Car il avait prins des sous pour convié ses hammains Etaient ti mâris, et en sortant le piano Entrait, j'eu peux, je pensais qui y'éthaient fait quicq' dro. J'ai tréjous creu que si j'avait 'tait dans la gnait, Quicqu'uns de yeux en sortant y éthaient fait quicq' mêchait. Une autre fais il était question d'un vingtgni A rempièchi le sien d'la Vingtaine du Rondi ; J'aitaimes décidais que fallait y pièchi Le Petit Captaine Maitre Ph'lip DE GRUCHI, Sans opposition, car le Chantgni avait dit Je sommes pour le candidat a MESSERVI. L'Assembiée avait 'tai fixaie pour le Mardi, Le Lecteu eu un accident le Samedi, Y ne pouvait pas être, pous vais affiché L'annonce, et hin pouvait poil la récordé. Tout avait 'tait arranghi avec le Recteu, Qui promins de v'nin a la pièche du Lecteu. Le Mardi était le grand-dhau, j'tais au lanchon Du cotai de la Rocque près de l'Avathizon Hiuen de l'us hommes vint, cherchant a s'mochi de mé. Y me disait que j'allaimes en atrapé Car hou séthais bain arranghis à l'assembiée. J'avons fait toute la paraiss' la gnait passaie, Tuous nos principaux y se'thont, chest décidai Chest le jeune Tom CABO qui sétha nommai. A une distance je vi MESSERVI, qui grattait Avec son croquet, yn' pathaissait pon en atrapait. Je m'apraiche de li sans faithe la mine de rain, Je lis dis que j'allaimes en atrapai bel et bain. “Hi rêpondit qu'in criait pon." Y pensait que je faisais allusion A du lanchon. Je lis dis chest à l'assembiée Qu'on avais chutte arlevaie. Je fus quicqu' temps a l'expliqui Tout chain qui m'avait étai dit. Y dit, et bain je les jouothons oquo, Yn' nomthont pon le jeune Mess CABO. MESSERVI en arrivant siez li, êcrivi Au Recteu, li demandant d'li faith' un piaisi De venin siez Maith' Charles a la Mont Bilo. Fallait y restai, et pis s'montrai pas trop Restai là et yn' fallait pas sorti Que quand Nicolas veindra pour le qu'si, Quand il enverrait cherchi, y vaindrai Pour le billet d'convocation recordai. Devant l'heuth qu'avait éte fixaie pour l'assembiée Le chentgni arrive avec une armaie, Il 'tai sergent, y qu'mandait deux compagnies, Yeune de Rozai, l'autre de la Bouctéthie. Nos hommes arrivent aitou, mais pas comm'hieux. J'e n'en avaîmes pas même heun pour lus deux MESSERVI était séthieux, y l'criaient mari. Y cherchaient, un petit mio, a se fichi de li. Après quicqu' temps y dit qu'fallai procédai Tout le monde 'tai venu qui devai arrivai. Y lut le billet, et dis sam'di passai Le Lecteu tchi comme un mort, en ville, et De même y n'avait pas recordai le Billet, Y dit de son ton tout séthieux, j'éthais grand tort Si je procédais sur un billet sans record Par compagnies, ils 'taient venus tous, Mais y s'en ralaient tous pat-à-coue, Car le chentgni, Mait' JEAN PALO, Pour Mess CABO n'offrait pon d'frico; Chaqun s'en allait sièz li pour vais Sa buounne femme versai du thê, A l'exception de Mait' JEAN PALO et deux ou trais, Qui restirent tout' lu saithaie sièz Mess LE GALLAIS Pour savai qui faithe, la semaine en venant, Y dirent, n'y'à pas moyen, ils éthont tuous lus gens. La semaine en venant Mait' PH'LIP DE GRUCHY fut nommai Sans opposition, car par le Chentgni y fut secondai Et après quicq'temps, MESSERVI vint p'ti à p'ti. Dans l'assembiée y parvint à les maitrisi Longtemps avant la fin de sa prumieth gestion Y quemanchait à lus donnai satisfaction. Il élargissait les routes, le rât s'erchevait, Y brulai des billets et la dette diminuait. Après trais ans y fut mins à l'unanimité, Car personne n'éthaient ozai l'oposé. Après qui fut assermentai, y pensi Qu'il étai grand temps de pensai à pièchi L'auluoge, qu'il avait promins, dans le qiochi; Y fit une collecte, y réussi; Y demande à l'Assembièe, qui dit oui. PH'LIP BINET dit qu'oul a cuoutai quat' chents louis, Il a 'tai tréjous fort, y sait bain chiffré; A multiplier y est bain aufait, et pis Yn' sait pas du tout comment exagéthai, J'en veurs pon cherchi à changhi s'nopinion, Je sai bain que che séthai peine perdue; Mais pour l'empaîchi de dith' chain qui n'est pon, Je vos dithai tout chain qu'ou la 'tai vendue. Mousieu HOLLINGSHED a yeu chent-septante Louis, oul' a quoutai mains de trent' à pièchi, Chain qui la monte à deux chents; nonante Louis ont 'tait ramassais par MESSERVI. Il est facile, Ph'lip, tes calquls, déduis Nonante de deux chents, tu éthais le prix Exact de chain qu'a payi la paraisse. Ne cherche pon a tapai sus la grosse caisse Ne continue pon un si haut chiffre à dithe, Car les siens qui savent en bouff' de rithe. Ne continue pon, man Philip, je t'en prie; N'crie pon si haut, ne jette pon d'itais cris. Car, Philippe, sai tu bain que pour acheteu, Tu n' dev'thais pon être si du sus l'Recteu Tu t'en rappelle, chetai dans le chimtieth', Sus sa propriétai, chetai oquo pieth'. Allons, Philippe, ne dit pon rain, Ne te gaîne pon, tout va bain. Car v'la qui va biaucou mus que dans le temps Du buoun' homme, quand il était surveillant ; Il abatai les bois, trébuchai les bancs. Le lendemain en assembièe y faisait du bri, Les siens qui l'avaient fait y' voulait les ataqui Il oubliait tréjous de dithe que chétait li. Oquoth' un' fais tâche de cessi tan gnolin, Ne continue pon tréjous tan fichu bêtifien. Après siez ans, nou d'mand' à MESSERVI d'continué, Donnant une adresse que deux chents avaient signé ; Nou li donni un magnifique présent D'un set a thê et a café en argent. Y dit, et bain oui, pour oquothe un' fais, Après trais ans de pus faudra tâchi d'vos grais. Après que MESSERVI fut mins connêtable, Il eut soin de mettre en êtat convenable Le d'vant de l'Eghise; y fit mettre un pavet Jusqu'en d'vant de la maison à PHILIP DUOTHAI, Et les pierres y les r'pêchi tout-à-fait en drait L'entraie de l'Eghise, y y'avaient dêjà un' fais 'tai. Avec les pierres l'histoithe a quémanchi, Avec les pierres l'histoithe ou va fini. En allant jusqu'à l'Eghise, nou peut les vais, Y sont toutes là, but à but, toutes les trais, A l'entraie du chimtieth', et y sont la comme Monument muet de la perfidie d'un homme. FIN. |
Viyiz étout: