North Sydney, Cap Breton, Canada.
Décembre 18, 1888.
Moussieu l'Editeu, - Y'a un an qu'j'prends vot gazette et ou'me pliait si bain que jé dit à Mollé, ma femme, - (ou'l a nom Mary mais en Jerri chest tréjous Mollé; ou' n'aime pon être appelée Mollé, et tchiquefais ou'me paffe, mais bain duochement car ou' n'voudrai pon m'faithe du ma), - j'm'envais êcrithe daoux' trais mots à Moussieu l'Feuvre pour li dithe commaique 'les affaithes Jerriaise me parraisse après avé tai trent'-siex and hors du pays. Bah! s'fait-alle, vetan t'tauné, il est onze heuthe et tu n'puorras pas t'l'vé d'main o matin en temps pour être à l'office de buonne heuthe. Là-d'sus ou' s'nalli et je qu'menchi.
Jé tai bain êtonnai d'vaîs qu'ou's'taite oquo dans les vier temps, à propos du Scrutin Secret, je'n'criais pon qu'a leuthe d'achteu q'uo z'avaites des louais en Jerri qui de'v'thaits avé té enterrèz y'a chent ans; o'ué-t'chais l'indépendance du puore voteu suous une telle louai! Si'l es en travâs pour un candidat, ou pour y'un d'ses ammins, y' faut qui vote, pas comme sa conschience li dit, mais comme les aoutres l'y disent, ou bain s'nallé aillieurs cherchi du travas, et chounchin veut dithe en bain des cas, la pauvrétai et la minsère. Par ichen j'avons le Scrutin, et si un candidat nos d'mande, "allous voté pour mé," nous lu dit, oui, mais en sé même nou dit, si m'pliait, et ou viyiez nou n'dit pas d'men'ties, je n'crai pon qu'y'a autchune chose de malhonnête là d'dans, tchait qu'o's'en pensais? et pis ou's'alleiz à l'office et ou metteiz vot' morcé d'papi dans la boête, et, presto, tout est fini. Honneu, j'di, à Mousieu Baudains et l's'autres Messieurs tchi sont pour le progrès, et tchi voudrais vais Jerri en ligne avec les aoutres pays civilizées. J'vé qu'o's'aveiz y'eu un bain mauvais étai pour les fermiers, mais je n'crai pon qui dév'thais lu pllaindre, il on y'eu une vingtaine de bouannes années, et si l'buoan Dieu lus donne une mauvais saison chest p't'être pour lus péchés.
Mais pourtchi lus fié trop sus les patates! Y' soulaient envié 900,000 cabots d'pommes au marchi, mais acheteu j'entends qu'il ont coppai tuous les pommiers pour faire piaiche ès patates. Et les bestiaux tchest qu'en est dev'nu? Nou'n'pâle pon ach'teu des vacques Jerriaises, tout d'même j'connais un fermi ichen qu'en a une vingtaine, et y' ma di bain des feis qui' n'voudrai pas être sans pour autchune considération. Y' m'semblle qu'il ont y'eu tort à ristchi tout sus les patates, et j'cré qui k'menche à vais lus mesprinse.
J'sis bein aise d'vaie que P.-P. Guiton s'est bein déhallai, j'faisaine l'exercice ensemblle en chinquante, et j'ai tréjous pensai qu'il éthait une buonne poste, j'vé qu'il est Greffier et j'en sis bein fi, car il 'tai un charmant garçon, et j'espèthe d'l'vai oquo pus haout si' vit.
Jé 'llu avec biaucoup d'pllaisi les verset écrits par Mess Buesnel, j'en' puorrais pas vos dithe tchi bain q'v'la ma fait de lièthe un poème écrit par un Jerriais, et jé n'peut pon fini mus que dithe:
"Que j'aimerais à te revoir et tes beautés champêtres;
Les lieux où, sans chagrins, sans nulle méfiance
Je passais d'heureux jours, les jours de mon enfance;"
En vos souhaitans une buonne nouvelle année j'sis tréjous Jerriais.
R.
Viyiz étout: