Maît'e Cliément d'Caen était à s'rêjoui l'aut'e jour que la "strike" était finie et i' s'en fut tout dret siez san tâcheron li dithe qu'i' pouvait c'menchi à dêfoui dans son côti dès Mardi matin.

Il 'tait à dêhaller ses paniers à hagne et ses bathis Lundi au sé pour aver tout prêt pour le lendemain quand Laïesse Ernon passi dans la route. I' r'venait justement d'la ville et quand i' vit tch'est que le bouonhomme était à faithe, i' li dit comme chenna, "ou n'allez pas dêfoui d'main, allous ?"

"Si fait," s'fit Maît'e Cliém," i'y a tchinze jours que j'éthais starreté sinon pour la maudite "strike" !

"Mais tch'est qu'ous allez en faithe ?" Laïesse li d'mandi.

"J' m'en vais les vendre sus l'Weighbridge, sans doute, comme d'habitude."

Et i' r'gardi Laïesse de travers, car i' criyait qu'il avait bu quand i' l'ouï li d'mander une patheille tchestion. Mais l'autre li dit, "Ou n'gagniz pas rain de y êprouver car les marchands ont décidé qu'i' n's'en vont pas en acater d'vant la s'maine tchi vaint, ch'est-à-dithe pas d'vant Lundi le treis d'Mai."

Le bouonhomme criyait qu'il 'tait à s'fichi d'li et qu'il 'était jaloux car i' n'en avait pas oquo d'bouannes à dêfoui. "En r'véla oquo des blagues !" i'li dit, "et sus tchille acconte qu'i' n'en veulent pas chutte semaine ?",

"Ah dame, nou m'a dit que tout lus bisnesse a 'té bouleversé par la "strike" et qu'i' lus faut au mains une semaine à r'mettre tout en ordre devant que de c'menchi à s'otchuper des patates. Et oquothe au but d'tout ch'est bain aîsi à comprendre."

"Peut-être bain," s'fit l'vier de Caen, "mais tout chenna ne m'arrange pas, mé. J'ai des tomates qui devthaient être pliantées et j'n'ai pas de terre à les mettre dedans devant qu'man côti sait dêfoui."

"Oh ! Mess de Caen," s'fit Laïesse, "j'ai d'bouannes nouvelles pour vous. L'Union des fermiers et les marchands ont decidé, à ch'que j'ai ouï, qu'i' n's'en va pas y aver de "Box Money" ch'tte année. Ch'est une couôtume chenna, qui n'aithait jamais deu avé existé. Oulle a souvent 'té la cause de bain des vols dans les stores, i' n'se passe pas quâsiment d'saison que ches bouaîtes-là n'aient 'té rompues dans la nièt et touos les sous volés. Et pis i' y'a bain des fermiers qu'ont souvent donné un p'tit mio d'extra pour n'aver qu'un bathi d'moyennes de mertchi sus l'billet, quand ils avaient réelement trais ou quatre."

Quand l'bouonhomme le ouï dithe ch'la, i'changi d'couleur car i' prins chenna pour li, sa conscienche li disant qu'il 'tait bain liain d'être sans péché dans chutte direction-là.

"Et pis,"continui Laïesse, "ches ouaisiaux-là s'en vainnent avec la main tendue comme si ch'est qu'nou lus d'vait chenna légalement, mais sans doute, acheteu qu'i' s'en vont aver de si bouans gages i' n'aithaient absolument pas le toupet de s'attendre à des "tips" par sus l'marchi. Et pis d'ailleurs ch'est tout-à-fait contre les principes des "Dockers" d'accepter d'la charité. Selon ieux, un ouvriyi est supposé de donner "a fair day's work for a fair day's pay," et pis v'là."