Mait'e Cliément d'Caen est bain dêterminé de jamais n'craître d'aut'es tomates.
I'y a êprouvé ch'tte année pour la prumié feis et ch'n'a 'té que d'la minsèthe dès le tout c'menchement.
La prumié bordée qu'i' s'mi d'la graine i' n'en l'vi pas iune et i' fut obligi de r'quemenchi.
Il eut un mio pus d'chance la deuxième feis mais opprès aver picoté ses 'seedlings'' i' y en eut pus d'la maintchi qui s'en r'furent et finalement i' s'vi forchi d'acater la pus grand' partie d'ses pliantes.
Quand il eut plianté san bétcèht i' fallu, à cause du mauvais temps, sprayer deux ou treis feis la s'maine et le bouonhomme vouli faithe chenna li-même, car i' n'avait pas confiance dans son domestique.
Etant un mio asthmatique , chenna n'li fit pas d'bain d'être à humer d'la bliue pierre à longs jours et v'la tchi l'print sus l'estoma et le pouore Maît'e Cliem failli d'être empouaîsonné.
I' r'pathi tout-d'même de craître une assez bouanne récolte mais ses peines ne faisaient qu'de c'menchi.
Un biau matin v'là un moussieu qu'arrive siez-li sus une bike, un homme qui li était tout-à-fait êtrangi !
'I li dit qu'i' voulait vaie ses tomates.
Maît'e Cliem s'imagini que ch'tait p't-être un marchand qui voulait l's acater sus pied et i' s'mins à considéther combain qu'i' s'en allait li en demander.
'I s'mins à marchi entre les rangs d'tomates et n'avait pas 'té pus d'une perque amont l'bétchèt quand i' s'écriyi ''Chennechin n'peut pas faithe.
Maît'e Cliem ! I' sont perdues d'maladie ! Si ch'est qu'ou n'arrêtez pas chenna tout d'suite je m'en vais les condamner et ou s'sez obligi de l's airaichi !
Le bouonhomme s'emporti et c'menchi à faithe du traîn. I' d'mandi à l'Inspecteur si ch'est qu'un homme n'était pas maître siez-li et dépis quand qu'les fermiers étaient souos la tutelle d'un Comité d's Etats e ainsi d'suite.
Mais l'autre était dêjà bain accouôtumé à chute sorte de d'vislà et i' n'y fit pas grande attention.
''Ou f'thez comme vous voudrez Maît'e Cliem,'' i' li dit, ''mais je r'vaindrai dans tchinze jours et si je n'trouve pas vos tomates à man goût i' faudra l's airaichi !''
Mess d'Caen s'en fut trouver un amin qu'avait cru des tomates pour pus d'quarante ans et i' li d'mandi d's avis.
Ch'tis-chin li montri comment mêler san ''spray'' pour le mettre un mio pus fort et v'là qu'eut l'effet d'arrêter la maladie pour le temps.
Mais les aut'es jours quand l'bouonhomme avait c'menchi à tchillyi et qu'il 'tait dans san prinseu avec sa nièche à patchi san fruit dans des paniers, v'là le même Inspecteur qui r'arrivi et qui li dit. ''Je suis v'nu vaie tchi sorte de paquethie qu'ous êtes à faithe !''
Et sans même dithe ''Extchusez,'' i' happi un pagni que la nièche v'nait justement de fini d'arrangi et l'capsizi la tablye.
La hardelle li en chanti dja !
Ou li dit chein qu'ou pensait d'li et li d'mandi si ch'est qu'i' criyait qu'un individu qui n'avais jamais cru une tomate s'en allait li montrer comment qu'i' fallait les patchi.
I' n'ly raîponni pas mais i' s'mins à faithe un p'tit mouoché sus la tablye de tomates qu'il avait chouaîsi dans l'pagni.
I' y en avait des cratchies et d'autres qu'étaient toutes meurdries par aver frotté contre les batons.
D'autres étaient picotées par le ''spray''. Enfin il en r'butti au mains une douzaine de sus la pan'naie et d'fendi à Mess de Caen d'exporter ditèt, et pis de pus i' les fît dêpatchi tout l'lot.
Le vier de Caen faîlli en affoler et sinon qu'sa nièche l'en empêchi il aithait frappé l'Inspecteur.
Sus tout l'lot de huit ou neuf chents livres qu'ils avaient tchillyi chu jour là i' n'y en avait que treis chents chinquante qui pouvaient faithe.
Avec le mauvais temps et la pouorrituthe qui s'en suivie, Maît'e Cliem caltchule qu'i' s'en va perdre pus d'chent chinquante louis sus les tomates ch'est-en-tchi il est bain décidé de jamais n'en r'plianter iune.
Et pis comme i' dit : ''Puisque v'là l'temps arrivé qu'un fermi n'est pas maître siez-li et qu'i' n'peut pas faithe comme bouan li semblye avec ses récoltes il est grand temps de fliantchi tout hors bord et laissi ses fermes paître ès coucous!''
Caouain
1/10/1927
Viyiz étout: