Ch's'a pas oquo pour chutte fais! Tout bin pesé et considethé, et viyant que j'soulaimes r'cité des Pièches ensembye sus l'Stage, a l'Escole du Dinmanche dans not' jeunne temps; j'avons décidé que je n'f'thait pas opposition a Moussieu l'Boutillyi - qu'est un mio not' pathent du bord des Bigethieaux. Mais Lonore en est bin afflyigie! Ou s'viyait dèja dans la gal'lie des Visiteurs ès Etats, a r'gardé chès Messieux èscouté san pèthe faithe un Speech sus la Pêque au Lanchon. Et, dans la Cour, ou s'était prominse d'allé d'temps en temps, quand y'éthait Passation d'Contrats, pour poué dithe ès gens a l'entou d'lyi: "You see that Jedge? Him wid red ouisqueur an' black hands, talkin' to Sir William? Dat's Piteur Pain, Jurat - my papa!"
Laizé, lyi, etait assez portée d'chu bord là étout. Pas tant pour l'hounneu d'la chose; car, coumme ou dit: "Celui qui s'élève sera abaissé! et les Hounneurs de chu monde pérvèrs, ch'n'est qu'poussière. Tout est vanité et rong'ment d'esprit!" Mais, d'un autre coté, oul avait compté qu'eunne fais me Juge, je s'ais sans bras drou'et pour met' tout en r'pathe dans les r'paires des mechants. Nous éthait freunmé toutes les auberges les Dinmanches. Il éthait 'té d'fendu d'allé en carosse chu jour sinon pour allé d'eunne Chapelle a l'autre et cherchi l'vétérinaithe ou la sage-femme. Tout l'monde éthait yeu a allé au Tchulte au mains eunne fais par Dinmanche et prendre san tou d'prédicateu eunne fais par quart'd'an. Jommais mains d'douze sous a la collecte: un sh'ling par les bancs. Et chassé d'l'Isle - Laizé tchient hardi a cheun'chin - chassé d'l'Isle toutes les fausses r'ligions. Ils l'sont presque toutes, suivant ma femme; ch'est l'predicateu d'sa Chapelle qui y'a enseignyi cheunna!
Hé bin! Ch'ne s'a pas oquo chutte fais! Et d'un sens, ch'est quazi dommage!
Quand je m'vit dans l'parleux d'l'Hotel a Missis Couillard, l'aut' sé, vis-a-vis d'eunne Députation qui m'avait envié mendation de m'trouvé là a huit heuthes, pour affaithes importantes - Quand j'me vit là endret sept hoummes en blianches quéminzes, qui se l'vites tout d'un bond en chantant: "See the conq'rin Ero!" y'eut tchiq' chose qui rèsmouit souos man veste!
Après avé chatchi d'main et viedji des verres, nou s'mint a d'visé. Nou c'menchi par couêsi un motto pour not' 'flag': "Down with Tyrany!" Je n'sai trop ch'que ch'est que Tyrany, mais ils 'taient touos d'accord pour dithe que Jerri en 'tait plien, et que n'y'avait qu'mé qui pouvais y porter r'miede - viyant qu'javais 'té forgeux! Et j'fûmes pour les Suffragettes! Toutes les femmes mathiées pouorront voté du bord que lus hoummes lus dithont, et les vielles filles coumme i' s'adounna. N'y'en étha jommais deux du même avis!
L'affaithe allait rondement! L'Sounneux d'clioches dit qu'sen fils s'n'allait faithe eune touonée au Vaux-d'la-Mathe. La Maitresse d'Escole du Huthé avait promins a san gallant d'pâslé d'mé ès èsfants d'sa Classe. L'Forgeux des Hautes-Crouex s'en va pendre un "Vote for P.P." au d'sus de s'n'enclieume; et tout Saint Sauveux est "snug" contre tout l'monde - a ch'que nos dit l'Chantnyi. S'fimes le caltchul des siens sus tchi qu'nou poué s'fié en cas d'conteste - y'en a pus qui n'faut pour boulé bin des candidats.
L'Temps s'passi d'même; a contet a s'ent'dithe ch'que j'f'thais quand j'y s'ais. Et pis - après s'etre aperchu qu'n'y'avait pus rin dans les boutelles - l'Chantnyi dit: "A la préchenne, man vi!" (J'y'en bâdrai, du 'man vi'! eunne fais èslu) et s'en fut siez li. Y'un après l'autre, la Deputation qui m'avait invité a les rencontré là "pour affaithe importante" s'en fut s'couochi; et j'm'apprêtais a les siethe, après avé soigneusement ramessé les papiers sus tchi nous avait cartchulé mes chances, quand l'ouaiteur criyi: "Old ard"! ole man, (J'y'en bâdrai des 'ole man' quand je s'ai juge) et s'en vint m'présenté un compte de djux-sept sh'lings et huit sous pour les raffraichissement! Les pend'loques; les bigres de peûles!
"Ah! Ch'est d'même!" s'fit Laizé, quand j'lis conti la scène. "Hé bin! Man fiston: tu ne s'as pas Candidat! Qui' s'dèspieauquent coumme i' pouôront a trouvé un candidat - les peûles! Djix-sept sh'lings et hui sous en litcheu, a nos frais! Pus qu'i n'en faut pour dounné un pic-nic a eunne vennée d'Mothors-Union! Les badléthans!"
Piteur Pain
The Morning News 10/7/1913
Viyiz étout: