Le Ménage ès Feuvres,
St. Ouën.
Lé preunmyi d'octobre, 1977.
Moussieu l'Rédacteu,
Ch'est vrai qu' nou n'sait d'en par iou qu' nou-s-en est en Jèrri ches jours. Né v'là-t-i' pon qu' la gâzette nouos annonce qué les femmes veulent êt' Juges! Les viy-ous sus l'Banc d'Justice, les femmes? Ch'n'est pon tch'i' manquent d'întelligence, Mon Doue, il' en ont à gogo. Et i' faut qu' j'èrgarde tch'est qué j'dis au sujet, car jé n'veurs pon êt' atchûsé d'en aver contre ieux. Au contraithe, jé l's tréjous admithées. J'm'èrsouveins qué quand j'tais janne homme un anmîn soulait m'dithe dé m'en mêfier, et i' mé r'citait tréjous un p'tit rînme qué, si ma mémouaithe né m'trompe pon, allait tchiquechose comme chennechîn:-
|
La femme est comme la catte, Ou rit quand nou la fliatte, Et s'frot'ta contre vous En faîsant patte dé v'lous; Mais quand l'affaithe né lî liaît pon Ou ronne bein, mais sus an aut' ton! |
Mais r'vénant au sujet du Banc d'Justice. I' n'y a pon d'doute tchi'i' ya' des femmes tchi f'thaient d'fanmeuses Juges et tch'i' y'en a tch'en f'thaient d'faillies. Ch'est la même boutique auve les hommes. Mais y'a l'dangi que l's hommes Juges es'saient tentés d'lus battre pour vaie létché tchi s'assiéthait à côté d'la belle femme sus l'Banc d'Justice. Et pis, si Madanme Juge est femme mathiée, y'a l'dangi qué s'n homme d'veindrait jaloux d'vaie touos ches Mêssieux d'Justice là faithe des doux yeux à sa femme! Et y'a l'dangi qué Madanme Juge, tch'a acaté eune neuve robe pour l'assèrmentâtion, n's'en va pon êt' heutheuse d'aver à la muchi souos la rouoge robe tch'est l'sŷmbole dé Justice quand oulle est en Cour.
Et pis, ou n'aimetha pon l'idée d'mett' la même robe pour siégi dans La Cour du Sanm'di (au vendredi à ch't heu), La Cour du Nombre Inférieur, La Cour du Nombre Supérieur, La Cour d'Assise et La Cour d'Héritage. Etant femme dé goût, ou voudra acater eune neuve robe pour châque occâsion, et v'la tchi f'tha san bouanhomme dêhaler sa bourse toutes les fais pour y suffithe.
V'la tchi pouôrrait l'faithe vouler êt' Juge li-même pour êviter des frais, car, pour li, lé même fa d'habits peut faithe pour toutes occâsions, et s'il est vièr Jèrriais comme mé i' s'en va vouler couoyer, et ch'est dans l'sang dé n'vouler pon dêpenser mal à propos. Eune aut' chose à considéther est l'titre. Ché s'sa-t-i' Madanme la Jurée Justicièthe?
Eh bein, à rithe et à badinner ou n'sé câsse pon les dents, mais à m'n idée ch'n'est pon tant la tchestchion du méthite entre homme et femme tch'est en jeu, ch'est l'changement tch'est tréjous sus l'tapis d'nouos jours. Ch'est l'changement en toutes choses tch'est à dêtruithe nouot' vièr Jèrri, et pour les vièrs Jèrriais comme mé, et bein d'autres, sans doute, touos ches changements r'présentent l'entèrrement du temps jadis. Et même lé sèrvice d'entèrrement quand j'y pense, a changi.
Quand j'tais mousse, j'tais tréjous împressionné par lé supèrbe langage dé la Preunmiéthe Êpitre ès Corîntchiens, chapitre tchînze et vèrset vîngt, tchi nouos dit, net et cliai, tch'est qu'en est auprès l'trépas. Ch'tait solonnel dé ouï Moussieu Pépîn la liéthe en Français ès entèrrements. I' montait tréjous dans la tchaithe dans l'églyise pour la liéthe. À ch't heu, les Minnistres liêsent des p'tits buts sentimentals d'ichîn et là dans la Bibl'ye à la pliaiche, et ch'est en Angliais, sans doute.
Mais nou n's'y r'connaît pus, en Jèrri. Quand nou fait eune promenade dans la campangne ch'n'est pon comme dans l'temps pâssé quand nou l'faîsait à s'n aîse et en trantchilité. Ch'est au péthi d'sa vie, à ch't heu, à cause des motos. Et pis nou vait des neuves maîsons d'architectuthe modèrne partout, et les belles vielles propriêtés des fanmiles Jèrriaises dé tout vièr temps sont entre les mains d'êtrangièrs. Nou sé d'mande s'i' y'a des Jèrriais d'restant dans la contrée, et quand nou r'fliéchit, i' y'en a bein p'tit. Même un tas d'nouos belles pétites vaques ont pèrdu lus cornes tch'étaient si bein alîngnies et partie d'lus bieauté. J'sis forchi dé v'nîn à la conclusion qué Jèrri a compliètement changi dans l'couothant d'ma huiptantaine. Tch'est tch'éthait pensé que d'ité 'tait possibl'ye? Fallait-i' qué nouot' bouan vièr poète Wace fûsse prophétique quand i' nouos dît:-
|
Tute rien se turne en declin, Tut chiet, tut muert, tut vait a fin! |
Est-ch' tout pour lé mus? J'en doute, mais La fîn du temps f'tha tout vaie!
George d'La Forge
Viyiz étout: