à Portînfé, St. Ouen.
Vendrédi au sé.
Moussieu l'Editeu,
Nou-s-avait ouï qu'à Saint Pièrre y'éthait de l'oppôsition au présent Chef, mais i' pathait qu'i' n'peuvent pon trouver un candidat capablye de battre le Sieur Le Mèrquand. Mais à la Trin'té y'a tout prospect d'une élection contestée, car si l'présent Connêtablye abandonne, le Charles Cabot et l'Edgar Mouothant sont prèsque seux de s'trouver en oppôsition. Le r'sultat est încertain au moment, car si l'Charles est membre d'la fameuse famille des Cabots, Edgar a 'té bein populaithe comme Chantgni. Un pâraissien que j'rencontris l'autre jour me dit que dans san opinion qu' n'y éthait pas hardi d'vouaix entre les deux. I' n'faut pas oublier étout qu'à Saint Sauveux le Tom Mouothant n'a ocquo rein d'un bord ou d'l'autre.
Un moussieu tchi dév'thait saver tchèsqu'i' dit m'a asseûthé que l'projet du Senateu Venables n'a pas pûs d'chance de pâsser qu'une balle de né a de rester solide en Enfé, ch'est-à-dithe, tch'i' n's'en va pas gâgni une mâjorité dans l's Etats. Je n'sais vraiement pas, Moussieu, tchèsqu'i' l'a poussé à propôser une m'suthe si drastique et révolutionnaithe. Après la dernié grande dguêrre, quand la Commission Royale vîsitit l'Ile, j'fûmes bêtes assez d'expédier les Juges et les Recteurs des Etats: si ch'tait agniet n'ou n'le f'thait pas, mais dans chu moment-là i' sembliait que nos grands mêssieux criyaient que ch'tait la Providence tchi nos avait envié la Commission. Si ch'tait à ch'teu' nou crithait l'contraithe.
Assez pour agniet, Moussieu, car j'si bein lâssé, et il est temps que je m'mette souos les lincheurs.
Ph'lip
Evening Post 1/2/1964
Viyiz étout: