Nan, les Trin'tais n'sont pas ingrats!
Y vont l'môtré à tout Jêrri,
Y vont envie dans les Etats
Maîte Jean Cabot, lus vier Chantgni.
J'ai galvauchi toute la pâraisse,
D'la Bouctezie jusqu'au Bouëlé,
Partout nou crie: J'en sies bain aise,
Viv' Jean Cabot pour député!!!

Je fus l'aut'jour oprès l'église,
Et là j'entri siès Mess de Caen;
Yiavait du monde, et pas d' bêtisse,
Y vont tous voté pour Maîte Jean.
Ma fé! Maîte Jean est un bouan homme,
Y n'a seu jamais s'acconté;
Y m'paiyi un p'tit verre de romme
Viv' Jean Cabot pour député!!!

Si quiqu'autre veut y prétendre,
Y sca battu coumme un sictin.
En un d'mié jour y peut l'apprendre;
Qu'il aille se traîné dans l'Rondin,
Et qui r'venne, sait par la Croiserie,
Ville-à-l'Evêque, Augrès, Rozé;
Et y verra qu' partout nous crie:
Viv' Jean Cabot pour député!!!

Je sai bain qui yia des jaloux,
Des gens qui vont par chin par là
Bailli d'lus goule et même en d'sous
Disent: Allous voté pour chounna?
Onhon, ma fingre! en v'là d'une belle!
D'Maîte Jean il osent mal pâlé;
Y faut n'avé pas grand chervelle.
Viv' Jean Cabot pour député!!!

Ches gens là veulent la loi angliaiche;
Et y savent bain qu'dans les Etats
Maîte Jean lus dit tout haut commèche
Que nous Jêrriais n'en voulous pas.
Nou n'peut pas l'faize perdre la boule:
Un jour y corrompi Godfray;
Y na pas d'peux d'un bat d'la goule.
Viv' Jean Cabot pour député!!!

J'nos allons avé un sonneux
Le sé même de l'élection:
Y verront qu'Maîte Jean n'a pas d'peux;
Yièza un fameux rigodon,
Un tas d'filles de la Bouctezie
Ont promins d'y v'nin gigotté;
Y yien aiza une racachie:
Viv' Jean Cabot pour député!!!