La Fichue Pièrre du Play-Ground!

His eyebrow dark, and eye of fire
Shewed Spirit proud, and prompt to ire;
MARMION.

Che n'est pas là du travas,
Et chest qu'Mousieu n'en dort pas,
Chest ben seux que la pierre,
Le condithea en terre!
Quand nou li dît qu'oul 'tai la
" Y n'y viait pas tant d'ma,"
Mais chest qui n'criait gièthe!
Qu'oul 'tai si mensongièthe!
Et Mousieu dit, "que vethghia,
Devant longtemps hou saûtea;
Chétai l'aut' jour, un Sam'di,
Que Mousieu, l'dît au chantgni;
Et, che n'est pas en dithe rein de trop,
En disant, qu'il en est à maintchi fo!!
Y dounne à entendre, par tout san devis,
Que j'à 'tai li-même qui la payie,
(Pas la pierre! nen, mais la considétheation,
Qu'a 'tai payie pour le terrain d'récréation)
Coumme Counnêtable (pas en sen nom).
Y payi Chinquante louis à JEAN L'BRETON,
Et pis après, y dit, que MESSERVI,
Dit (sus la fichue pierre) que chest li!
L'affaith' n'peut pas resté là, dit Mousieu,
"Quand pour l'ôté, y s'ceai a sen tout seu"!
Et y sé ben, que PH'LIP AUBIN
Y'aîdea, car chest achteu s'n'anmin.
Il a tout à fait oubliai
L'affaith' du gardin d'Olivet.
Maîte PH'LIP yiaidea aitou, car pour li
Il l'à noummai dernièth'ment san Banqui!!
Quand'il a trop d'sous
Chest qui sé ben hiou
Et a tchi qui faut les porté,
Pour qui n'en ait pon a gardé,
V'la qui ôte de la responsabilité;
Car chest ben souvent, y n'manque
Pon l'besoin d'avé unne Banque!
Et pis Maître Philippe en est damme ben fi
Quant chest l'annaie, qu'les patates n'ont pon payi!!
Mais pour les Billes, chest unne autre affaith',
Car chest entre Maitre CHARLES et san frèthe,
Qui ont jusq' ichain soiengni,
Tréjous, de les y changhi. . . .

Tout chein que je m'en vains vos conté
Se passi: ch'tai un Sam'di au sé,
Ch'tai siez Mester VADE, que j'entendais
Trais ou quatre des jeunes Trintais.
Des avers! y dis-qutaient, ma fé!!
Just' coumme si la Trintai lus appartenait,
Et juste coumme, si coumprennaient
La maintchi de chain qui disqutaient.
Quant ils ont un buoun verre de grog devant hieux,
Chest qui sont tuous braves coumme deux;
D'la Trintai, yia plusieurs jeunes gens,
Qu'y passent unne partie d'lus temps;
Les Samedis, a mié l'arlevaie,
Ou z'en verrais la unne tappaie,
Qui sont là, coumme s'ils 'taient ancraie;
Nou za d'la peine de vais ditai,
A oqupé d'même tout l'pavet....
Après les avé entendus, je m'appréchi,
Et prins part sus chain qu'ils avaient dit;
Je lus dis que j'avais hieu tout bein expliqui,
Que ch'tai Mousieu MESSERVI qui avait payi!
Pour la terre, et pis le contrat
Devait lus expliqui bein tout chela;
Plusieurs de hieux avaient hieu lus tête,
Mais y n'étaient qu'un tas d'fichues bêtes!!
Et Mousieu MESSERVI
Faisait bein d'sen moqui.
Y vos a fait un biau présent!! mais ou vihies
Chest avec vos sous qu'la terre a tai payie!!
Et la pierre était tout buounnement
De lus bêtise, un biau monûment!!
Car Mousieu MESSERVI
Avait mins là, de tchi
Pour la "Postérité"
A s'en rappelé.
Hieun dît, "Mais Mousieu
La fethea ôté, si peu,
Qu'oul avait pézait hardi,
Dernièthement sus s'n'esprit. -
Je rêpondit, halte là;
Si yiêprouve, y verra
Qui n'a rein à faithe à chounna;
Le Counnêtable, si ou m'criyies,
"N'a pas 'tai noummai yieun des Trustees."
Et pas unne pierre, pas un mio de gravi,
Dans le nouviau play-ground, ne peut être buoughi,
Sans que les "trais Trustees" aient unanimement,
Devant y touchi', dounnai lus consentement!!

Viyiz étout:

Ouras pour Messervi!

La Trinneté