Venais à l'Ecole de la Trin'tai,
Venais vais chain que MESSERVI a fait.
Je n'éthaimes pon de play-ground sans li,
Faut criai tous: Ouras pour MESSERVI!!

Ouras, Ouras pour MESSERVI, devrai
Hi nos a arranghi la de tchi bé.
Les autres criaient bain de s'en moqui,
Faut criai haut. Ouras pour MESSERVI!!

Veth Ouras pour MESSERVI; quant à me
Je l'criethai autant comme je puourai,
Car maugrai tous hieux il a réussi.
Veth, tous d'un temps. Ouras pour MESSERVI!!

Oquo, ouras pour MESSERVI, acheteu
Chest bain a li que revain tout l'honneu
Criais bain haut, v'la qui fetha mari
Le Captaine. Ouras pour MESSERVI!!

Le Captainé voulait nos vais muoyies
Jusqu'au haut de la quéville des pids.
Mais MESSERVI en a hieu le gangni
Pour ch'la criais. Ouras pour MESSERVI!!

Captaine éthai voulu nos envié
Daus l'prai au Colonel a vathoté,
Pour une fais il a étai baschi.
Criais oquo. Ouras pour MESSERVI!!

Venais tous sus l'play-ground, pour le nommé
D'après l'année, l'play-ground du Jubilé,
V'la qui f'tha le Captaine enragi
Oquo pus haut. Ouras pour MESSERVI!!

Ouras, Ouras pour MESSERVI, de pus
Je ne séthons pas tuais dans la rue,
Chest la un service qui n'est pas p'tit,
Criais tout haut. Ouras pour MESSERVI!!

Venais sus l'play-ground, venais y jouai,
MESSERVI a dit que nou peut y'allai.
Et pis chest qui ne faudra pas mantchi
De criai haut. Ouras pour MESSERVI!!

Venais tous, venais garçons hieun a hieun,
Venais tous, car y yia tout pien de run
Ponr jouai, venais aitou pour m'aidghi
A criai haut. Ouras pour MESSERVI!!

Venais à l'Ecole de la Trin'tai,
Venais vais chain que MESSERVI a fait.
Je n'éthaimes pon de play-ground sans li,
Ouras, Ouras, Ouras pour MESSERVI!!

P'TIT GARSON.