À Portinfé,
Saint Ou.
Moussieu l'Editeu,
Hier au sé, j'tiomes ocquo à pâsler, la Merrienne et mé, des êlections, et dans l'couothant d'notre convèrsâtion ou m'dit qu'ou n'comprenait pas pourtchi que, dans la Ville, les êlecteurs avaient fichi lé bouonhomme Hettich à la porte. "Sans doute", ou s'fit, "ch'tait s'n âge, mais, quand-même, j'éthais creu qu'après l'bouon travas tch'il avait fait pour tant d'années, i' li'éthaient ocquo donné un autre trais ans."
"Nouffé, Merrienne," j'li dis, "ch'n'tait pas s'n âge. Y'en avait, bein seux, parmi l's êlecteurs tch'i' n'lé r'voulaient pas à cause de chonna, mais la seule et vraie raison tchi perdit s'n êlection ch'tait tch'i' s'faisait si seux d'être ré-élu tch'i' n'se gênit pas aller d'mander à autchun êlecteur d'li donner une vouaix. S'il avait dêshallé un couplye d'fais et fait une p'tite touônnée, il éthait battu le Député Smale sans autchune diffitchulté. Chein qu'ch'est que de s'faithe trop seux. S'i' n'y vint pas ch'tait d'sa faute, et sans doute i' l'sait à ch'teu, quand il est trop tard".
"Pourtant", ou dit, "la 'Post' l'avait supporté."
"Vèthe", j'li dis, "et chonna l'encouothagit à craithe tch'i' n'avait pas à s'gêner. Ch'est dommage, car, pour s'n âge, ch'est un homme r'merquablye. À ch'teu, Merrienne, oublions l's êlections, et chein qu'j'ai à t'dithe là-d'sûs ch'est que si tu m'révillye chutte niet, comme tu'as fait la niet pâssée, pour mé d'mander tchèsqu'i' s'pâsse à Saint Piêrre chais jours, je s'sais capablye de t'êtouffer avec t'n ouothillyi".
"J'n'ai pas grand peux d'chonna", ou dit, "mais une tchestchion, Ph'lip, tandis qu'j'y sommes. Peux-tu m'dithe pourtchi qu'y'a tant d'hommes, tchi n'pathaissent pas aver la tête cratchie, tchi veulent être membres d's Etats? Ch'est une chose que je n'comprends pas, et j'y ai pensé hardi pourtant".
"Ah bein, ma vielle", j'li raiponnis, "y'en a tchi sont poussés par l'ambition. I' craient qu'un membre d's Etats est tchiquechose, et i' sont prêts à sacrifier lûs temps parsqu'i' s'imaginent, les pouores achocres, tch'i'peuvent être utiles dans l's Etats. Hardi d'yeux, quand ils ont 'té là pour trais mais, voudraient n'y'aver jamais pensé, et ocquo, à la fin d'lûs terme, i' sont prêts à r'prendre pour un autre trais ans. À maintchi du temps ch'est lûs femmes tchi les poussent, car, au jour d'agniet, quand un membre d's Etats est invité à un diné, une danse ou autchune occâsion sociale, y'a une invitâtion pour sa femme étout, et madame prend bouon soin d'être là avec san bouonhomme. En un mot, Merrienne, ch'est certain que y'a un bouon nombre d'membres tch'ont 'té poussés là par lûs femmes".
"Nous a souvent ouï pâslé d'hommes tchi sont pûs bêtes qu'lûs pids," ou s'fit, "et à ch'teu, après chein, qu'tu m'as dit, si ch'est la véthité, y'en a pûs que je n'criyais. Il est vrai qu'nou dait respecter un Connêtablye, un Député, et même un Chantgni, mais avec chonna, ch'n'est pas agniet comme aut'fais. Les gens n'ont pas la haute opinion de ches mêssieux que nous avait quand j'tais jeune."
"Quand j'tais jeune garçon, Merrienne," j'li dis, "nou hallait san chapé à un Recteur, un Connêtablye, un Député et même un Chantgni. Mais quand j'fus en Ville sam'di j'vis une rencontre dans l'Vièr Marchi entre un Connêtablye et yun d'ses pâraissiens, tchi li dit: "Hallo, man vièr pend'loque: convie-tu? Un Recteur pâssit et i' n'li dites pas seulement "bonjour". Nou n'aime pas à l'dithe, mais ch'est d'même au jour d'agniet."
"Mais absolûment, Ph'lip", ou dit, "i' dait y'aver dans l's Etats des membres tchi sont dévoués au service public."
"Vèthe", j'li dis, "y'en a ocquo tchitchuns, mais l'nombre n'est pas si grand comme dans l'pâssé quand j'avions les Jurés-Justiciers et les Recteurs. J'ai dit pûs d'une fais que ch'tait une fichue bêtise de l's envier à lûs prom'né."
"Même opinion," ou s'accordit, "mais la s'maine tchi veint j'comprends tchi s'sa tchestchion de nommer touos les présidents d'comité. Crais-tu qu'y'étha hardi d'changements?"
"Pas hardi," j'li dis, "mais à ch'teu que l'Sieur Hettich est hors, i' faudra un nouvieau président pour lé Comité des Travaux Publics."
"Et l'Comité des Louogements?" ou d'mandit, "Crais-tu que l'Sieur Gaudin tcheindra don?"
J'li dis qué par chein que j'avais oui "Ernie" Gaudin avait décidé de former un nouvieau comité avec l'Avocat Sowden, lé "Bill" Perchard et les Sénateurs George Troy et Ralph Vibert parmi les membres, mais tch'i' n'avait pas l'intention d'abandonner l'affaithe comme président. Y'avait, étout, une rumeur que l'John Lé Mèrquand pouôrrait abondonner l'Comité d'Instruction Publique en faveur du Comité d'Agritchultuthe, mais j'avais bein d'la peine à craithe chonna. I' pathait, j'ajouôtis, que la grande majorité des fermiers s'saient contents de l'vaie à la tête.
"Che s'sait un r'nouvé, que d'vaie les fermiers sachant tchèsqu'i' veulent," ou s'fit. "Nou perd patience avec de pathelles gens. Ils ont r'fûsé d'êtablyi chu 'Marketing Board', mais à ch'teu tch'i' s'vaient entre les mains des marchands i' voudraient aver décidé autrement. Enfin, tch'i' s'ramâssent, car s'i sont dans l'pité i' n'ont que yeux-mêmes à bliaumer. Mais, Ph'lip, tu n'm'as pas dit tchèsqu'i' s'en va arriver à Saint Piêrre".
"Je n'sais pas," j'li dis.
"Crais-tu que y'étha une autre êlection?"
"Je n'sais pas," j'li dis. "Tais ta becque!"
"Mais," ou dit, "tout l'monde en'pâslent."
"Pas mé," j'li dis "J'n'y connais rein, et j'te dis ocquo dé taithe ta becque."
Et là-d'sûs, Moussieu, ou s'boudit et s'en fut s'couochi.
PH'LIP
17/12/1960
Viyiz étout: