Les Pages Jèrriaises

How Both Sides Shall Win

J'sis en allant a Saint Cliément yun d'ches jours. J'ai dans l'idée que j'peux m'rendre utile ès deux candidats; ch'est-tan-tchi, j'm'en vais offri mes services a chatchun d'yeux. N'y'en étha qu'yun pour gagnyi, au bu du compte, j'sais bin; mais ch'qué j'ai dans l'idée ch'est de m'faithe bin v'nin par chatchun d'yeux. L'Chantnyi Gruchy est "rouoge" a ch'que j'en comprends; tandi qu'Mess Pallot prétend qu'n'y'a qu'du "bliu" qui peut conv'nin ès St. Cliémentais. Bliu ou rouoge, rouoge ou bliu, ch'est "all one" pour de mé; mais coumme i' pathaitrait qu'les gens d'par là n'pouoraient pon s'dèshallé souos d'autres couleurs, j'm'en vais ètre "sky-blue" les jours que j'traval'lai dans l's envithons d'la Betchet'tie, et "blood-red" a l'entou d'l'Eglyise.

J'ai dèja prins mes plians pour quand vindra l'temps. Preumièth'ment j'ai fait m'n'idée d'allé siez l'Chantnyi. Chose seuthe qui s'a dans san prînseu, et quand la servante lis ditha qu'ch'est Piteur Pain, du "Post," i' s'en vindra tcheuthan a ma rencontre. "Entrez, entrez!" qui m'ditha. "Entrez par ichin! Passez dans l'parleux! Assiév'ous dans l'fauteuil - pas sus l'sofa, les 'springs' sont pus-ou-mains en desroute. Merienne! Apporte nous des mérvelles et la jougue qu'est sus l'ais d'la côniethe! ou bin, aimthaites-ous mus du cidre? J'en avons d'bon, caplyi et frais-tchan, maintchi par maintchi - nou dithait du champanne!" Nou d'vîs'a d'choses et d'autres en beuvant. J'lis d'mand'ai s'il est avanchit d'plianté, si ses vaques ont yeu des Certificats, et tchès qu'i' pense d'la Loué sus la Margarine. et pis j'lis dithai que j'comprends qu'il est sus les rangs pour Député. Nou d'vîs'sa la d'sus pour eunne pôse, tout en brinottant des mérvelles, et i' deshal'la un Livre de Rât de d'souos les couossins du sofa, pour me montré touos les "blius" sus tchi nou peut s'fié. Tout compte fait, y'en étha a peine assez pour capsaizé les "rouoges" sans l'aide des siens qui hoptchinnent des deux côtés.

Ché s'a ichin - après qu'il etha dèsbouchi eunne autre boutelle - que j'lis dithai man plian - un plian qu'j'avons inventé entre Laïzé et mé et de tchi persounne n'avait ocquo yeu idée. "Gas-déouelle!" qui ditha, en pouffant d'rithe, "tchès qu'éthait jommais rêvé a ditet! Mais, j'soummes seux d'rouôlé les "rouoges"! Merienne! As tu ocquo des mérvelles?"

D'viers un quart d'heuthe après, j'sortithai d'la maison en suffliant, coumme si j'avais justément entré pour pâslé d'eunne souscription a la gazette, et après qu'Mess Gruchy étha prins sérment sus l'Livre de Rât de n'en sufflié mot a corps-d'âme.

Deus-très jours après, la même scene a pé près, s'pas'sa a la Betchet'tie. J'm'attends l'trouvé a râpé les cones de san boeu. Y'étha étou du cidre et des mérvelles - ou offuche d'la litcheu et d'la gâche. Nou pâl'la d'lanchon, d'la djaime au Recteu, des basses terres qui sont souôs l'ieau - et pis d'l'Election! Mess Pallot îtha cherchi un Livre de Rât et eunne fielle de papi dans san scritore, et j'nos mettrons a cartchullé. Tant d'blius - du péltas! Tant d'rouoges - la creme de la Paraisse! La creme est pour nous; l'péltas est "bliu"; reste un p'tit fliotchet qui n'a ni couleu ni opinion - ch'est-là qu'est l'danji!

Ichin, j'appréch'ai ma tchaise du bord droette d'la sienne a Mess Pallot, et j'lis bourdoun'nai tchiq' patholles dans l'ouothelle gauche. "Sem-n'âge!" qui ditha, en s'èsgouffant d'rithe, "J'soummes gagnyis! et les 'blius' n'y verront qu'bliu! Piteur, m'n amin, tu-es un raide bouan corps - passe tan verre! Le jour que j'prendrai serment a la Cour, si tu t'adounnes a être dans l's envithons, tu pouorras m'démandé ch'qué tu voudras, quand bin même ché s'ait la maintchi d'man royaume!"

J'nai qu'faithe des royaumes, sustout par les temps qui tcheuthent. Mais coumme i' n'peut y'en avé qu'yun d'èslu, en fait d'compte - j'm'en vais vaie a m'faithe rèscompensé pour ma trouvâlle, dévant l'Election!

Piteur Pain
 

Viyiz étout:

 

Les Pages Jèrriaises