Si ch'est la volonté du Bouan Djeu, coumme j'l'espéthe, j'éthons eunne éléction. Les gazettes nos paslent dèja de quat' ou chinq candidats, et tout m'fait créthe qu'il en r'sourda bin deus-très autres d'ichin huit jours. "The more the merrier," coumme disent les Anglyais pour un enter'ment.
Ch'que j'voudrais vaie, ché s'ait eunne election contéstée. Deux candidats! très candidats! tout plien d'candidats! a seule fin qu'nous aie du ji pour eunne tchinzainne.
"Je r'grette de constaté qu'ou n'avez pas l'air de prendre l'affaithe au sérieux," m'dit l'Chef, a tchi qu'j'en pal'lais. "Nou n'det pon d'vîzé l'ji et d'fonne quand i' s'ajit d'chouèsi un houmme pour en faithe un Juge frais pounnu. A l'âge qu'ous avez," qu'i' m'dit, en me r'gardant, "ou dévthaites comprendre qu'un Juge est tchiq'chose d'éxtrèmemt important! Riez et badinnez tant qu'ou voulez quand ch'est d'un Counnètablye ou d'un Député qu'i' s'agit! Mais souv'n'ous qu'i' n'faut pon faithe la minne de chouèsi un Jerriais pour en faithe un Juré. Pensez ch'qu'en advindrait si nous s'adounnait a chouèsi un rin-tchi vâlle!"
Pour quand a ch'la, je n'sis pas gêné. L'Ile ne s'trompe jommais dans san chouèx. Ou n'avez qu'a allé ès Estats ou quand la Court (levez vous, messieurs!) est au grand compliét pour vaie pour vous mêmes la qualité d'la marchandise. Ch'est d'la creme; ch'est des toppeurs; ch'est la fine flieur de tout ch'que nous a pu trouvé d'mus pour la djob!
Mais pour en r'venin a l'election - j'éspethe qu'ou s'a contéstée. Pas qu'j'aie rin a dithe contre autchun des candidats. Ah, nan! Chatchun d'yeux est tout ch'qu'i' y'a d'pus Numetho Yun en èsfet d'comprentuthe, d'bouan-vier-Jerriais, etc., etc. - tous, ils ont toutes les qualitées; et pas yun d'yeux n'comprend rin sus la Loué. "Wot more do you want?" pour faithe un Magistrat de preumié classe? Touos les siens qu'y sont dèja ont 'té chouèsis d'chute moniéthe la, et tout l'monde sait coumme not' bérque a 'té bin gouvernée jusqu'ichin.
Touos les candidats de tchi qu'nous a oui pâslé jusqu'ichin sont capablyes de jugi a la mode de Jerri, j'l'éspéthe; et je s'ais bin au m'zéspé d'avé a vos dithe man chouaix. J'les préféthe tous! s'ou voulez que j'vos dise.
Mais ayons eunne election. Ayons des "speech"! Tchi fonne que je s'a d'les entendre, y'un après l'authe, les mêmes choses de difféthentes moniéthes, et nos proumettre monts et merveilles! Coumme touos les candidats disent tréjous a toutes les éléctions. Et pis, quand j'éthons èscouté et applaudi a raide-brache, j'îthons voté, set pour yun ou pour l'autre, n'y'a pas eunne mie d'soin l'tchét, et n'y'étha rin d'changi en rin. Tout marchétha coumme d'amor; y'étha des pendards qu'en rèscapthont; y'éthat des sous gazouollyis coumme de d'vant; et y'étha des Loués que l'Gouvernément Anglyais renvièthe en d'mandant tchès qu'est l'bachouard qu'a inventé cheunna.
Mais dites tous ès Counnétables, bouonnes-gens, d'avé a en chouèsi pus d'y'un. Que j'ayons au mains la chance d'un mio d'éxitation; v'la tchi ne f'tha d'ma a persounne, et nou n'peut pon mal adounné en chouèsissant yun or l'autre; l'affaithe îtha tréjous san p'tit boulant, nimporte coumment. Dites que j'vos l'dit.
Piteur Pain
Viyiz étout: