Ch'èst vraiment domage de vaie coumme nos gens sont tréjous a s'ent' nadji et hèrtchinné dans l's Etats; nou dithait eunne vraie tchéthue à tchans, et j'sis d'avis qu'i' devent sé motchi d'nous en Angliéterre. Tchit bouonne slîndjeuse nou lus doun'nait si ch'tait un troupé d'escoliers! Coumme le maître ne s'ait pas long a lus dithe: "Portez r'pos, tas d'buzards!"
I' n'sont d'accord sus rin! Ch'est nâgue ichin, hèrtchinne là, halle a r'tchullons d'un bord, paque au gallo' d'l'autre! Not' pouôre berque est fîchtrement mal gouvernée! et tandi que l'Cap'taine et les Contrémaîtres sont a baillyi d'lus bec dans la Chambre, l'èstchipage - ch'est vous et mé - est endanji d'être èstrueûllé dans l'pité. Persounne né semblye savé dans par ou-ès qu'nous en est sus rin.
Parmi toute chutte confusion, j'avons au mains rèscapé d'l'affaithe qui s'n'allait nos couôté dans les chinq a siez chents louis. L'affaithe Krudwige est laissie dans-par-ou, en nou n'en r'ouitha pon pâslé, Djeu merci! Mais ch'éthait 'té mus si nos gens s'étaient entr-arrangis d'vant qué de v'nin d'même s'exposé a la rislée du publyi.
Dans des cas coumme chounna, j'lus doun'nais en avis de consulté deux-très èscriveurs de gazettes - y'en a pus d'yun parmi nous qui pourrait lus en montré long sus bin des choses.
Et justément! en pâslant d'Etats, v'la tchi m'ramémouéthe que l's Elections n'sont pon déja si loin. tchès qu'ous n'allez en faithe, bouonnes gens? Allous ré-èslithe touos chès Députés la sans opposition, ou y'en a ti pus d'yun d'la djinque qui s'a tumbzé de d'sus sa scabelle?
En pâslant de ch'la, i' m'est v'nu dans l'idée que j'pouorrais offuche me rendre utile quand vindra l'moment d'chérchi des vouéx. Né v'chin ch'que j'ai pensé. Jen'soummes pas pus otchupés que ch'la siez nous, dèpis qu'mes femmes ont tchité le toumates. J'pouôraîmes allé touos les très chérchi des vouex; mé d'un bord, Laïzé d'l'autre, et Lonôre travaillé pour les siens qui sont d'la Chapelle! Tchès qu'ous en criyis? Chaque candidat nos paiethait dans les tchinze a vingt louis s'i perdait, et d'viers chinq s'i' gagnait s'n èslection. Mé, j'îthais siez l's' élécteurs le matin, et j'dithais qu'man candidat est pour l'Economie et l'Progrès; Laïzé îthait l'arlevée, et souôtchindrait que l'sien est pour le Progrès avec Economie; tandi qu' Lonôre îthait l'sé - avec sa p'tit lanterne - pour dithe de voté pour les siens qui sont raide pour Nos Vielles Institutions! Coumme cheunna, y'éthait tréjous, au bu du compte, un Député d'èslu dans chaque Paraisse; ch'né s'ait pas tréjous l'pus faillyi, et la vielle bérque n'en îthait ni piéthe ni mus qu'a ch't'heu. Car - ou n'êtes pas sans l'avé r'mértchi, d'pis l'temps qu'ou éliséz des Députés - ch'est pas yeux qui gouvernent!!
Piteur Pain
4/11/1916
Viyiz étout: