Y faut craithe que l'Chef est d'avis que n'v'la qui fut un grand évènement dans la vie du Sieur Caouain d'avèr un bain d'pis qu'il ermint la publication d'mes dires sus l's'élection faute d'run et laissi quassiment deux colonnes d'la gazette au Sieur Caouain pouor y raconter s'n'expérience. A m'n'avis dithèt dires n'auraient jamais du être mins dans la gazette mais d'pis que v'la qui fit plaisi au Chef y n'faut pus rein en dithe.
Dans la paraisse a man biau cliochi, il y eut une bordée d'fun au dernier meeting, viyant qu'Edgar était fort mârri car en lièsant la requête l'boss n'vit pon qu'Edgar s'appelle èttout Philip. Et ch'est qu'Edgar aime bein Philip. Par trais fair l'boss ly dit d'rester trantchille et de s'assièthe.
Oprès l'meeting, Edgar Phlip s'fit qu'il tait blieu et que touos les siens du Coumité des qu'mins étaient rouoges mais il voulait saver tchi qui douonni l'droit d'mettre la tchèrpenterie iou qu'oulle es et il est encouore du même avis qu'oulle n'd'vrait pon être laissie la.
J'sis allée èttout, chute semaine, dans la paraisse d'a côté et la préchaine fais y faut que j'vos pâsle de Lilian qui était a chu meeting et qui accepti l'offre de bèthe à la santé de Moussieu l'Connétable et des grands d'la paraisse.
Quant â l'élection à St Ou j'en ai oui et veu de touotes les sortes.
L'Samedi d'oprès l'meeting, Reggie fit une gageaille d'un louis avec Phlip que l'chantgni Jim s'en aller y v'nir.
L'sèr d'vant l'élection, Johny you know, lus dit à Morville qu'il avait fait l'calchulle et qui pouvaient aller lus couochi et dormi tranchille viyant qu'nous s'rait de 30 à 40 vouaies d'l'avant. Et il tait minièt quand y sortit de Morville. Les siens d'l'autre bord se couchites pon en tout et chest qu'il y en eut du travas de fait en chutte nièth et tchi saccacherie.
Les siens d'Highfield quémanchites à bouogi quassiment à la même heuthe que l's'autres allaient lus couochi. Dolphus s'en fut d'un bord, Bill de l'autre, Percy et Franky en fites autant.
Pourtchi que Charlot et d'Georgi allites du bord d'la Pulente?
P't'être que Freddo de St.-Brelade en sait un p'tit pus long et j'connais bein un oisé qui n'fit pon grand travas avec l'Steam Roller l'jour du poll.
L'p'tit John du Haut d'la Mare n'tait pon sièz ly viyant que l'Captain de la Corbière ly avait douonne une job. Nou fait, pon à tuer des p'tits moussieux d'soie, sauf votre respect. P't'être que ch'tait à plieumer des pirots ou des picots pouor Noué mais y fut bein payi pouor la job et n'v'la pourtchi y n'resti pou sièz ly.
Mais tchès que l'foreman à John des Mielles était à faithe de chu bord de l'Ile. Y faut craithe qu'il avait peur d'être gelé et que ch'est pouor chunna qu'il avait avec ly un cough mixture que les angliais appelent long neck.
L'Captaine d'la Corbière fut bé nice car y r'ameni l'Phlip et sa Missis dans son motor-van.
L'buanhomme Frainque du Valet n's'déhalli pon non plus et j'sais pourtchi mais n'v'la qui n'ergarde que l'sien auquel y fit grand plaisi en restant sièz ly.
J'ai ouï dithe que Jim d'la Grève est a faithe des claviaux avec de l'osi qu'il acati a si buan marchi qu'nous ly donni encouore des caboches pour rein!
Maître Jean, qui est tréjous riche en buannes pensées, s'faisait, tchiques jours d'vant l'élection: Je n'peux pon perdre mon temps et déserter mes côtils pour aller voter, sans être payi. Ch'est au pus offrant!
J'ai ouï dithe que Jack du Coin est d'avis que les siens qui fîtes les spoil papers d'vaient être un miot excité en pensant qui s'n'allaient pouver fêter un raide buan Noué!
Dans l'bel du Parish Hall, pourtchi Frainque de Vinchelez s'faisait qui n'change pon d'casaque touos les jours et tchès que Dolphus dit au petit John John?
Une autre fais, Edwin, tu prendras bein soin d'enfrumer couomme il faut l'buanhomme Jean, mais ergarde bein à Dolphus et Percy, qui sont de malins oisiaux.
Je couonnais un homme dans chutte paraisse qui s'en va exhiber ses lapins a
Springfield, au show d'la Royale, viyant qu'il en a déjà vendu iun chinq guinées et qu'il en a encouore de chutte sorte.
L'sien qui tait prêt à douonner chinq mille louis pour casser l'êlection s'en va avèr a engraisî un p'tit pus l'rât, à chein que j'ai ouï.
Si nous ly d'mande s'n'âge, pour seur qu'oulle vous dira que vous êtes un affronté d'craithe qu'oulle a trente ans, mais si vous ly dites qu'oulle alli voté, p't'être bein que ch'tait rein que pouor chu jour là qu'oulle avait trente ans. Tchès qu'en pense Freddo des Landes, l'sien qui s'f'ra seur que sa Missis sait inscrite sus la liste électorale, plutôt deux fais qu'ieunne, mais Freddo est un vièr garçon qui n'y connait rein en tout.
(Notre babillarde de Marie fait allusion à bien d'autres soi disants incidents qui se seraient passée dans cette paroisse ainsi dans celle de Grouville, mais nous publierons ces dires une autre fois.)
Marie Hibou
6/1/1923
Viyiz étout:
