À Portinfé Saint Ou.
Jeudi au sé
Moussieu l'Editeu.
Agniet, par ichin la fraid a 'té piéthe qué jamais, et j'crais bein qué ch'est la même chose siez vous, et dans toutes les autres parties de l'Ile étout. Dépis ma dernié lettre j'avions yeu tchiques bieaux jours d'solé et nou pouvait dêshaller sans crainte d'attrapper une dôse de pneumonie, mais agniet ch'est un vent tchi pâsse à travers de toutes les craques tchi s'trouvent dans une vielle maison. La Merrienne, tch'est ocquo forte et robuste, pliains les p'tits ouaisieaux, et touos les matins ou va jusque dans l'gardin avec une bollée de miettes et d'autres restants pour yeux. Malheutheusement, les fichus mauves ont faim étout, et à matin y'en avait bétôt une vingtaine dans l'gardin à avaler tout ch'qu'i' pouvaient trouver et à êffriter les mêsles, les grives, les êtournieaux et tout le p'tit ouaiselin. Si j'avais peut bouogi d'ma grand'-chaise j'éthais tâchi d'en abattre yunne ou deux des vilaines créatuthes, mais, à qu'menchi, j'n'en ai pas la forche, épis j'comprends que la louai les protège : ch'est pourtchi, j'ai à les laissi trantchilles.
À ch'teu, Moussieu, pour la grande êlection à Saint Martin. Tchi surprinse! Pas pour la victouaithe de Tom Billot, comme par s'n ênorme majorité. J'avais gagi douze sous tch'il y veindrait par pûs d'vingt vouaix, mais jamais j'ne me s'sais imaginé tch'i batt'rait lé Sieur d'la Mathe si aisiment. Chein tchi montre, Moussieu, que d'nos jours nou n'peut pas s'fier sûs chein qu'nou-s-entend, car même samedi pâssé un bouon Saint Martinais que j'trouvis en Ville m'asseûthit que l'Sieur d'la Mathe était seux d'san coup, car il avait touos les Méthodistes avec li, tandis que l'Tom Billot n'avait qu'les Anglyicans. Quant à chonna, Moussieu, j'avais mes doutes de tchitchuns tch'avaient signé le papi du Chantgni d'la Mathe. Je n'éthais pas creu, par exemplye que l'Joe Dorey et yun ou deux autres étaient si raides Méthodistes.
À ch'teu pour chais douze sous que j'ai gâgni. Quand j'tais p'tit mousse, j'éthais peut accater sept bârres d'chocolat à la p'tite boutique au Carrefour à Chendre ou siez les Miss Moûtchet à la Crouaix au Lion. Y'avait le fréthe, Tom, tchi rac'modait des bottes et des souliers, et ses deux sœurs, tchi gardaient la boutique. Ch'tait d'bein p'tites gens, pas pûs d'quat'e pids d'haut, et jamais j'n'ai seu de ouèsque i' v'naient. Je n'sais pas si y'a ocquo tchiques vielles personnes à Saint Pierre tchi pouôrraient m'en dithe pûs longtemps, que lûs vrai nom était Mousquet, mais je n'sis pas seux si ch'tait vrai.
Y'a ocquo tchiques êlections en v'nant, et nou pâsle de yun ou deux candidats pour la vacanche pour Chantgni à Saint Martin. Y'a, par exemplye, lé Jack Richard, un homme tch'est raide bein connu dans la pâraisse et tchi f'thait sans doute un excellent Chantgni. J'ai ouï étout du Gerald Richardson du Clios Fallu, du Vingtnyi J.D.Germain, lé fis du Député d'autfais, et de yun ou deux autres citoyens qu'nou respecte, mais au moment i' n'y a rein d'certain. À la Trin'té. lé John Dorey Richardson, candidat pour Député, ne s'sa pas oppôsé, ou je s'sais bein surprint, car il a toutes les qualités pour le poste.
Nos Etats s'réunissent à ch't heu' deux fais la s'maine, et l' n'ont pas fait un mauvais qu'mench'ment, car la fameuse muthâlle ne s'en va pas être bâtie, par chein qu'nou-s-comprend, et y'étha un grôsse somme de sauver. Il est à espéther tch'i' s'en vont continnuer d'même, car la pôsition financiéthe est ocquo hardi critique.
Nos pouôres tchultivateurs ont perdu, accordant à la 'Post', des milles et milles brécolis à cause de la g'lée. Ch'est bein dû, mais ch'est l'temps tchi décide tout, pas seulement pour les brécolis, mais pour tout ch'que nou pliante dans la tèrre. J'peux vaie à ch't heu que j'éthais à attendre ocquo tchique temps pour man fricot d'nouvelles patates fricachies avec une tranche ou deux de gras lard. Mais lé jour veindra quand-même, et j'n'ai pas vêtchu tant d'années avec ma Merrienne sans apprendre qu'la pâtience est un vertu qu'un homme mathié dait tchultiver s'i' veur aver un mio d'paix dans la maison.
J'n'ai pas 'té un mio surprint dé vaie sûs la gâzette que nos faiseurs de vendues s'en vont chergi pûs haut à l'av'nîn. Mais i' m'semblye que sept-et-d'mi du chent est hardi haut. Chonna s'en va donner une chance à d'autres de faithe des vendues à mains d'commission. J'me r'souveins que l'défunt Harold Benest avait dans sans temps éprouvé à hauchi sa commission, mais que chonna n'prouvit pas. Dans chu monde i' n'faut pas être trop gourmand.
Y'a étout l'appel du Sieur Durrell pour tchiques milles louis pour sauver lé Zoo, tch'est en dangi d'faithe banqu'route. J'espèthe tch'i' réussitha, car nou n'voudrait pas vaie le Zoo dispathaître, et i' n'faut pas oublier que l'Sieur Durrell n'a jamais d'mandé ou r'chut un sou pour tout l'travas tch'il a fait.
À bétôt, Moussieu, jusqu'à la s'maine tchi veint.
Viyiz étout: