Les Pages Jèrriaises

Des caltchuls statistiques

Les fanmil'yes, sont-i' bein heutheuses
Quand il' ont deux êfants et d'mie!
Les méthes, mouon Doue, tchi caltchuleuses!
En mouoyen nou-s'a mains qu'deux pids.

Y'a vîngt-quat' heuthes dans eune journée,
Trente jours étout au mais d'Avri,
Tchi font sept chents vîngt heuthes... Ah mais!
En mouoyen nou-s'a mains qu'deux pids.

Y'a quat' êvangiles, dgiêx c'mandements,
Et douze mais dans not' calendri.
Même si chent douzaines font douze chents,
En mouoyen nou-s'a mains qu'deux pids.

Y'a douze Pâraîsses, et pis Trais Rouais,
Et quarante pèrques dans eune vrégie.
Ch'est chînquante-chînq, à chein qu'nou ouait.
En mouoyen nou-s'a mains qu'deux pids.

Nou dit qu'la gliaiche gèle à zéro
(Ou à trente-deux s'nou-s'est pus vyi)
Et ch'est à chent d'grés qu'nou bouort l'ieau.
En mouoyen nou-s'a mains qu'deux pids.

Un cat a sept vies, ch'est bein vrai.
Y'a eune douzaine au boulandgi.
L'Vîngt'nyi vos r'mèrcie chent mille fais.
En mouoyen nou-s'a mains qu'deux pids.

Ch'est à mains qu'quarante milles à l'heuthe
Qu'les cacheurs sont s'posés d'cachi.
Mais les rues d'Jèrri n'sont dgéthe seûthes.
En mouoyen nou-s'a mains qu'deux pids.

J'ai compté huit syllabes à la
Lîngne dans chu p'tit niolîn d'poésie.
S'oulle est rîsibl'ye - ou n'fait pon d'ma:
En mouoyen nou-s'a mains qu'deux pids.

 

Geraint Jennings 2002

 

Viyiz étout:

 

Les Pages Jèrriaises