|
Un grand salut à touos Jèrriais Qui pâlent oquo en vierr patouais, Ne f'chin à vous, d'ches êmigrés Qui partout l'monde sont parsémés. Y'en a d'nous qu'étaient Saint Ouennais Et d'autres, fièrs d'être Saint Martinnais, Qu'en Australie ont 'té pliantés Ou à Tèrre Neuve sont arrivés. Un tas au Canada d'la ville Sont hors, avec les siens d'Grouville, En Angliétèrre dé Saint Cliément Y'en a avec des gas d'Saint Jean. En Améthique, dé haut en bas, Y'a des garçons qu'ont fait lus pas ; Eune racachie dé Saint Sauveux D'autres dé Saint Pierre, dé ch'la ch'est seux. Dé Saint Louothains, des hommes hardis, Et eune douzaine dé Sainte Mathie Ont ieu l'idée dé s'faithe fèrmièrs, Au Su' d'l'Afrique parmi les nièrs. Dé Saint Brélade nou peut compter Hardi d'gaillards qui sont en mé ; Nouvelle Zélande veurt pus d'familles - V'là les Trin'tais, garçons et filles .... Dans sa vîngtaine, à tchique grand mousse L'ambition veint, lé sort lé pousse ; I' trouve l'Ile p'tite - lé monde est grand, Et i' s'en va, p't-être pour tout l'temps. Mais n'importe iou que j'sommes à ch't heu, Ch'est en Jèrri qu'est notr-e tchoeu, Et j'espéthons dévant notre fîn Èrvaie la belle baie d'Saint Aubîn!
P. W. Luce |
Viyiz étout: