Ch'est acouo piéthe au mais d'Févri,
Mais pas tréjous, à chein qu'j'ai ouï,
Car, s'lon les vièrs, i' peut faithe bé
Quand la plieine leune sait s'comporter!

En Mar I' vente la pé du dgiâtre,
Ouêqu'nou-s-est l'mus ch'est au pid d'l'âtre;
Mais l'solé d'Mar est hardi fort -
V'là tchi peut d' charme vouos touonner l' corps!

Les bouonnes avèrses du mais d'Avri
Font Douard et Ph'lippe couorre à l'abri;
Ch'n'est pon pliaisant pour les hardelles,
Pour cotillons, souaies ou dentelles!

Lé doux mais d'Mai, lé pus bé d'tous,
Fait dêhaler l's habits en v'lous;
Mais don, aujourd'aniet, ma fé,
Nou va touos nus quand veint l'êté!

Mais la chaleu veint au mais d'Juin
Et nou c'menche à suer'dès l'matîn,
Tant et si bein, dévrai, tchiquefais,
Qu'la sueu d'goutte dans la soupe dé pais!

Juillet l'brûlant peut vouos rôti,
Quand i' s'y met ch'est san pliaisi;
N'y'a rein qu'lé minnistre êbliavé
Qu'a peux d'êt' brûlé du solé!

Lé bieau mais d'Août, d'amors, étou
Cauffe dé bouon tchoeu dans l'temps d'l'avoût;
Mais les fortes ôrages, dgia, tchiquefais
Font les vielles tremblier dans lus braies!

Au S'tembre nou-s-est battus d'bieau temps -
Si ch'n'est pas plyies, brises ou grands vents!
I' peut êt' rude, i' peut êt' doux -
J'connais des gens d'même par siez nous!

Au mais d'Octobre ch'n'est pus l'êté,
Trop souvent si l'temps n'est sus l'bé
Ch'est d'la fraîcheu et brousse et bliâse -
Il est d'mêtchi d'mett' ses caudes drâses!

Lé gris temps d'Novembre et la plyie
Vouos fait pester et il enn'yie;
Nou prendrait biin rester au liet
Auve deux p'tits d'gouts à s'rêcauffer!

En Dézembre nou-s-a l's esprits bas,
Mucreu partout, l'solé n'lit pas;
Mais, bah, tout ch'la est oublié
Quand veint les fêtes et fricots d'Noé!