Les Pages Jèrriaises

Les Deux Mêmes Tchans

 

un tchian
Ch'est un tchian
clyiquez pouor ouï les mots

J'vos racontais l'autr'jour en vers
Un incident qui m'tchi souos l's'ièrs
Quand je m'prom'nais le long d'une route...
Ou' vos en rappel'lez, sans doute,
Deux tchans, sus un lopin d'bannelais,
L'un avec l'autre distchutaient
L'ordre du jour: la grand' renchiéthe
Sus tout ch'qui faut mangi et baithe,
Et partitchuliéth'ment sus l'lait,
Qu'les marchands avaient augmentè
D'un sou la pinte, livré en ville
Et portè jusqu'à domicile. -
L'un s'en plaignait avec dêpiè
L'autre en 'tait aussi satisfait
Coumme du vièr prix, car, pour san compte,
I' savait bein que ch'est une honte
D'être injuste envers les fermièrs
Qu'ont d'l'embarras pardessus l'sièrs
A payi ch't'annèe lus fermage
Sans pâler d'un tas d'arrièthages.
Et i' pensait, avec raison,
Qu'la dghèrre a fait la position
Difficile pour l'agricultuthe
Qui nos fournit la nouorrituthe.

Huit jours oprès, les deux mêmes tchans
Se rencontraient, en s'êbattant,
Dans les clios, s'lon lus habitude,
En bêtes qui n'ont pas d'inquiétudes.
Se fit au tchan de l'homme de rein
Le sien qu'était à l'homme de bein:
- "Eh bein, man vieux, dis, tch'est qu'tu'en pense?
Les villais n'aiment pas la dêpense
Et, en r'fusant pour deux trais jours
D'avair du lait, ont copè court
A la tentative de renchiéthe
Et j'rai achteu du lait à baithe!"

Le tchan de l'homme qui n'avait rein,
Et qu'avait yeu bein souvent faim,
Le r'gardant ov un yi tranchille:
"Vaithe, vous, dit-i', qu'êtes de la ville,
Pourvu qu'ou' seyiz rassassiès
Ou s'sèz tréjous bein satisfaits.
Huit jours tu'as plieuthè de minzèthe
Car tu n'avais pon d'lait à baithe!
Mais si tu'étais un pouorre êfant,
Comme i'y'en a par siéz nos gens,
Tu'éthais apprins que ch'est une faute,
Un crime, de n'penser qu'à sa paute
Et, respect, à sen estoma'
Quand nou n'a ni mahan, ni ma'!
Ne f'chin m'n'avis, qu'ou f'thaites mus d'suivre:
"I' faudrait vivre et laissi vivre!"

Elie
1915

 

Viyiz étout:

 

Les Pages Jèrriaises