. . . .

Il est temps que j'finisse m'n'histouèthe,
Car nou n'peut pas tréjous braithe.
Ne v'là chein qui s'est arrivèt,
A nos braves garçons d'la Trintai,
Et i'vos assaeuthe que ch'est la véthitèt.

DAEUXlÊME PARTlE

Pour bein fini eunne histouèthe,
I' faout du temps à la faithe,
Mais coumme je n'l'avais pas finie,
J'men vais vos dounné la deuxième partie.
J'avions ovec nous un janne homme prudent
Qui s'mint à cachi la nouvelle jument.
Enfin i'nos ent' dimes y'a du bon,
Parce qu'oul 'tait trantchile comme un mouton.
Arrivés dans l'village de Gouorèt,
Je k'menchaîmes tous a avé frèt,
Et d'maîme le d'cendimes de d'dans la vainne,
Pour qué la jument n'eusse pas tant d'painne.
Oprès avé marchi jusqu'au haout d'Faldou
Et qu'la jument 'tait ervenue d'faithe le tou,
Nous v'là tous ermontais dans l'wàdjin
Pour nos en r'venin bouan rond par St. Martin
Coumme j'nos en r'venaimes en paix,
J'rencontrîmes daeusse-treîs Trin'tais
Qui lus z'n'allaient bouan rond à Gouorèt
Ponr prendre le baté d'Cart'ret.
Un p'tit pus lyien j'vîmes un janne garçon
Qui r'venait èttou d'la pêque au lanchon.
Coumme i' s'en r'venait pour la Trin'tai.
Nos v'la à l'î dithe chein qui s'était passèt
Là-d'sus i' s'en fut bouan rond sûs sa bike
Dithe à nos gens que j'taîmes tous all-right,
Car ou' pouvaient bein pensé qui 'taîent jaînnés
De n'ervais pas les garçons ni lûs pan'neaies.
Enfin, i'nos v'là arrivès à la Ville-ès-'Vêque
Après avait fait eunne bouanne petite pêque.
J'étions tous assèz bein rêvillyis,
Mais j'avions la mînne un mio changie.
Nos v'là tout d'un coup daeusse-treîs à dèslyié
Tandi que l's'aoutre 'taient mâtés à nos r'gardé,
J'mînmes la bérisse d'emprunt dans l'èstabble.
Et ovec d'l'avène et du fain oul 'tait pas mal.
Châtchun s'n'allit en temps siez li
Pour fricachi l'paîsson qu'il avait pêtchi,
Parce qu'i' 'tait grand temps de dèsjuné
Et raconté s'n'histouèthe châtchun siez sé.
Oprès que j'eûmes touos bein dèsjunèt
J'pensi i' faout qui y'ait tchique chose de fait.
Tchiqu'un s'en fut téléphone ès Haoutes Crouès
Pour savé si la bérisse qui nos avé si bein jouès
Ayait tèt veue dans les routes ou dans les près.
Mais coumme i' r'vint sans nouvelles,
Hélas! pensîmes, tchesque j'allons faithe.
Ch'n'est pas qu'la jument sait d'grand valeur,
Car oul' est vieille et pas d'eune fine couleur.
Mais ou'l avait eunne grais sûs l'dos
I' fallait bein décidé d'faithe tchique chose.
Nos v'là daeux allé en bike jusqu'à la Rocque,
Pour vei, s'il avaient veu not' Cocotte,
Mais oprès avait d'mandé à quat' maisons,
Je n'pûmes pas en avé aoutchunnes raisons.
Enfin nos v'là siez notre anmin d'St. Cliément
Qui nos dounni hardi d'encouthagement,
J'vos dis: lé pûs aisi de la r'trouvé,
Ch'est d'mettre une annonce sûs l'Post d'asès sé.
Nos v'la hors par la grand route de St. Cliement
Veis si tchiqu'un aithaient ouï pàslé d'la jument
I' nos dirent qu'oul avé tèt veue à Samarès,
Nos v'là bons, je k'menchions a avé l'frais.
J'continuîmes not' route par la gran' Chéthièthe
Pensant d'nos z'n'allé faithe de belles affaithes,
Mais rein du tout, nos v'là hors au Dicq
Et là i'crûmes de la vei, à vrètchi.
Nos r'velà hors siez un anmin d'Bagot,
Pour savé si la bérisse nvait tèt veut au trot,
I' nos dis, oprès y'avait contèt not' painne,
Oul a p't'être tèt veue par tchique polismainne.
Nos en allîmes en ville siez un Chantyni, enfin
Qu'est en toutes manièthes un bouan anmin,
Il est tréjois près à vos faithe piaîsi,
Mais i' n'faout pas èspreuvé à s'fichi li.
Et i' téléphôni pour savé si un bobby la vi.
Mais i' n'en avait pas veu rein ni ouï-pâslé,
Et d'maimme j'pensîmes qu'il 'tait temps d'filé.
Ne v'là man parchounnyi qui s'en alli,
M'disant qu'il avait besoin d'allé par le marchi.
Dans chu 'temps là i' 'tait heuthe de diné,
Et j'n'avais pas grand temps d'm'arrêté.
Mais j'vit un janne houme qui fait d's'affaithes
Pour l'i dithe tout chein qui fallait faithe.
Enfin je m'en r'vins par Queen's Road
En pensant a bein des chôses,
Et dès que j'fut ramontèt, oprès avé bein suèt,
J'rencontri moussieu Député d'la Trin'tét.
J'm'arrèti pour de la jument y'en pâslé,
Mais j'fut surprins de veis qu'il savé.
Me r'vela hors bouan rond sûs la bike,
Hélas! je n'pathaissais pas bein bright,
Dès que j'fut arrivèt auprès Sion,
J'entendit tchique chose de bon,
La jument a tèt veue à quat' heuthes et d'mie,
Dans l's'alentours de la Hougue Bie.
A la fin lé v'là r'arrivèt à la Trin'tèt,
J'vos garantis qué j'tais bein lassèt.
Et dès que i'fut d'vallé, ou' s'en vint en riant,
Mé dithe que la jument été ertrouvée à Maufant
Et comment qu't'est v'nue à l'savé,
Par un vaîsin qui veint justement d'arrivé.
J'men fut tout d'un coup siez li l'trouvé,
L'î d'mandé l'piaîsi de téléphôné
Eu Ville et à notr' anmin d'St. Cliément
De n'lûs jaînné pas d'aoutre dé la jument.
J'men r'vins siez nous et m'assiévit à la tablle,
Hélas! j'dis, né v'là t-i' eunne bouanne job.
Oprès avé bein diné, j'dis au domestique,
Quand tu s'sas ervenu d'la boutique,
Tu'ithas cherchi la Cocotte à Maufant,
Et, ma fingre, i' n'fut pas trop longtemps.
Mé v'là hors en ville ermené l'aoutre jument,
Etant termié ovec notre anmin d'St. Cliément.
Hélas, not' péque nos a couôtèt bein chi,
Mais j'taîmes oquo bein de n'ervenin pas à pi.
An lieu d'avé tèt jusqu'à la Rocque pêtchi,
J'éthaimes fait mûs d'allé en acaté au marchi.
Et à touos les siens qui nos ont aidji
Je n'pouvons sinon qu'lus dithe merci.

-

Mé v'là enfin fini de m'n'histouèthe,
Oprès avé prîns eun p'tit d'temps à la faithe.
J'cré bein qu'ou n'manquethez pas d'en rithe,
Mais ou n'veindrez pas mé l'dithe.
I' m'est v'nu à l'idèe d'l'èscrithe en jèrriais
Sachant qu'ou z'aimais bein le vièr patouais.
Et à touos mé z'anmins de not' petit Jèrri,
J'vos r'quémande d'allé au marchi pêtchi.

IUN DES ONZE