Mé et Mêrrienne,
Man parchonnyi
(Eune raide bouonne femme,
Trop p'tit comme lyi),
J'sommes bein heûtheurs
A Portînfer.

J' d'meuthons touos seurs,
Rein qu'lyi et mé,
N'y'a pon d'avièrs
A nouos badrer;
Tout est trantchil'ye
A Portînfer.

J'sommes hors sus l'âge -
Jé n'sommes pus jannes,
Nouos v'là touos vièrs
Allant pianne-pianne,
Mais j'sommes dé charme
A Portînfer.

J'sommes èrtithés
Né v'là tchique temps,
Bein confortabl'yes,
Deux bouons vivants -
Ph'lippe et Mêrrienne
A Portînfer.

N'a pus d'suffat
Pouor nous chutte vie,
Dé tout fardé
J'sommes souôlagis -
Pas d'aut' travas
A Portînfer.

Douochement nouos deux
A ch't heu j'vivons,
Nou s'lève, nou mange,
Pis j'nouos r'couochons -
Nou-s-est à s'n aîthe
A Portînfer.

Jé n'sommes pon riches,
Mais j'gabathons
Et, comme nou l'sait,
Y'a du pouongnon
Dans l'côffre-fort
A Portînfer.

J'ai un mio d'bein
En sou mouvants,
Et la Mêrrienne
A d'la vielle rente -
Y'a tchiques hèrpîns
A Portînfer.

J'aîdgons ès pauvres,
Car, grâce à Dgieu,
Faut faithe du bein
Tandi qu' nou peut -
Ch'est nouot' pliaîthi
A Portînfer.

Un canârien
Tchi nouos connaît,
Atout sa cage
Pendue ès rouais,
Sûffl'ye chanson
A Portînfer.

Un cat, un tchian,
Deux'trais lapîns,
Vielle poule chendrée
Auve ses pouochîns -
V'là nouot' fanmil'ye
A Portînfer.

A l'entou d'nous
Et souos les pids -
Un tas d'ramas
Et d'vieillâqu'thies ;
J'n'y r'gardons pon
A Portînfer.

Quand ès nouvelles,
N'manque pon d'porteurs,
Car pouor chenn'na
J'sommes bein chanceurs
Dé d'meuther 'chîn
A Portînfer.

Tout l'long d' l'êté,
D'allant, dé v'nant,
À londgeu d'jours
Toutes sortes d'gens
Pâssent au carrefour
A Portînfer.

Pis en hivé,
N'nouos ennyie pon,
Les vaîthîns veinnent -
Rare qué j'sortons
Dé nouot' démeuthe
A Portînfer.

Les uns et l's aut's
Tchi veulent entrer,
Liéthe la gâthette,
Faithe du flianné
Sont les beinv'nus
A Portînfer.

Tous à l'entou
D'un bieau rouoge feu,
Quand i' fait fraid
A tchête dé jeu -
Dans la tchuîthinne
A Portînfer.

Dans ma grand' tchaîthe
J'y f'thais ma vie,
Au pid du grais
Si bein assis,
Au coin dé m'n âtre
A Portînfer.

J'aime bein ma pipe
Dé p'tun remplyie,
Quant à Mêrrienne,
Sa compangnie -
Eune tâssée d'thée,
A Portînfer.

Il y fait bé
Tréjous ichîn,
Rein tchi piêsse niéthe,
Autchun chagrîn;
Ch'est mangnifique
A Portînfer.

Nou n'voudrait pon
Rester ailleurs,
Car împôssibl'ye
D'êt' pus heûtheurs;
J'nouos y pliaîthons,
A Portînfer.

V'n'-ouos-en nouos vaie
Dans tchique dêtou,
Né mantchiz pon
D' v'nin à St. Ou -
J'en s'sons touos fièrs
A Portînfer.

Mes chièrs anmîns,
A la préchaine!
Nouos complyîments -
La grand' Mêrrienne
Et l'gros vièr Ph'lippe
Dé Portînfer!

Ph'lippe dé Portînfer