Les Pages Jèrriaises

La dêcompt'tie

Dgix! Ch'est pouor y'aller; j'avons la vèrte veue,
l'engîn abrévé, l's înstruments ladgis,
et nou-s'est pouor d'senchorchéler achteu.
C'menchons pouor la dreine fais la dêcompt'tie!

Neu! Chu nouvieau-né n'es'sa janmais vyi
tch'atchil'ye la niv'lot'tie à preunmié veue;
un neu neunmétho tchi n'est dgéthe meûthi,
net coumme un sou, tch'est nobl'ye et tch'a l'tchoeu neu.

Huit! Ch'est un neunmétho tréjous d'accord;
tch'est pouor et janmais contre dans touos les d'bats.
Chu neunmétho vote tréjous du bouôn bord;
auve un huit à l'ouïe n'y'a janmais d'èrtas.

Sept! S'i' n'tchait pon d'la plyie, i' f'tha bein sé.
Un tchéthaûd charme lé temps coumme un marcou
et les sept b'lettes s'saient bétôt înfectées:
chenna sent la pouque et pique coumme un poux.

Six! L'dé est pitchi et au pilôsi;
chein tch'est ôsé veindra en beheindaine.
Ch'n'est pon un neunmétho chanceux tch'est l'six;
ch'est raîque la maîntchi tch'est eune d'mié-douzaine.

Chîn! Né v'chîn toute eune pouongnie d'chein qu'nou-s'a;
eune pouongnard pouor assâsinner César.
Et té, Brute? Véthe, ch't'î-chîn 'tait un bruta,
et j'lî flianqu'thais un mouoché à chîn carres.

Quat'! Ès carres du monde, nou-s'îtha en viage
pouor vaie des bêtes exotiques à quat' pids;
et v'là tch'est mus d'les vaie siez ieux qu'en cage:
des couochons d'tèrre, llamas et okapis.

Trais! Tchiques mênages vont bein mus en trio:
j'aime chette-chîn et chette-là est m'n amouotheuse.
Un trais-carres à faithe la carre en avo;
ches'-chîn sont seurs d'l'aimer s'oulle en est seuse.

Deux! Tch'est qui sauve? Dé vrai, la mèrquéthie.
Jé n'connaîssons ni deux paids ni deux m'suthes.
Quand j'avons à m'suther, i' faut d'l'avis:
eune cabiche vaut la maîntchi dé deux huthes.

Ieune! Ch'est qu'nou-s'est au d'sans à san tout seu
à jouer des gammes dé solitaithe dé siette.
Eune chandelle n'êcliaith'tha pon la nièrcheu;
sans pouver vaie nou joue l'as ou l'ouinnette.

Zéro! L'affaithe est lanchie en fîn d'compte,
et nou-s'en a dêcompté jusqu'à rein;
v'là la fouâle satchie et la fîsée monte.
Nou-s'en fit l'caltchul atout ses deux mains.

Geraint Jennings
 

Viyiz étout:

 

Les Pages Jèrriaises