|
Dgiêx couques mârris quartellîtent deux oranges; Un orangyi crût jusqu'à souaixante pids; Sus la tête d'eune adgulle dansîtent dgiêx anges; Les vaques savent compter jusqu'à septante-six. Un mille-pids codpîsit chent balles dgiêx fais; Chîntch'ièrs èrmèrtchîtent deux tchièrs d'un craîssant; La maîntchi d'la leune lithait pouor siêx mais; Lé Porte-Fagot tchièrchit un êléphant. Vîngt êléphants pâssîtent tchînze jours siez nous - Ches pachydèrmes chârîtent eune dgiêxaine d'lyits. Il' aiment lé blianc vîn - il' en prîntent deux d'gouts. Deux'trais vielles fil'yes bûtent chîn gallons d'whisky. Eune pieuvre vendit des boutillies d'rouoge vîn; Les pîngouîns en acatîtent chînquante-trais; Y'en avait quat' boutelles pouor châque pîngouîn (Don, treize ouaîsieaux et quart, qu'i' pathaîssait). Lé quartchi-maît' à mié-c'mîn s'arrêtit; Nou dithait bein qué deux têtes valent mus qu'ieune; Qu'un trépid vaut mus qu'eune sorte dé trais-pids - Et tripliément touos les trente-deux d'la leune. Ch'est jusqu'à septante-six qu'i' comptent, les vaques; La pieuvre démande huit gambes à ses longues braies - Ou j'dithais-t-i' huit manches à sa câsaque? - Les êléphants m'éthaient ramémouaithé....
Geraint Jennings Novembre 2002
|
Viyiz étout: