Ach'teu, i' sont grises, mes pensées
Et la bliue bliâse fliotte d'vant mes ièrs,
Mais l'rose solé mé mouontréthait
Un violet trembliément dé tèrre.

"Les vèrtes nues sont d'l'hèrbe tchultivée
Dans l'ciel", nos explyiqu'thaient les vièrs.
Les néthes êtailes illeunminn'naient
Chu violet trembliément dé tèrre.

Mais mastchies d'jaunes branques, les blianches vaques
Èrgardent des oranges mauves dans l'air.
Mouôn Doue! Tch'est qu'ch'est? Tch'est qui les châque?
Un violet trembliément dé tèrre.

La lîlas plyie tchait caude et douoche,
Et la pourpre ieau rempl'ye toutes les mers.
Mais chutte nouvelle veint bliue d'ma bouoche:
Un violet trembliément dé tèrre.

Ch'est la vèrte grève tchi m'a changi;
Ch'est les châtchieaux d'sablion d's avièrs.
Tch'est qu'est pouor ieux l'pus grand dangi?
Un violet trembliément dé tèrre.

Geraint Jennings
19/6/2000