I'y avait eune fais eune fanmil'ye d'biches tchi d'meuthait sus les fliancs d'eune montangne. P'pée Bichot, M'mée Bichot et lus P'tchiot Bichot, pour vos donner lus noms, 'taient bein contents dans lus siex-ieux, où'est qu'nou trouvait un p'tit doue, d' belles flieurs et d'belle patuthe étout.
Mais eune êté, lé solé lit chaque jour sans cêsse, la caleu d'vint terribl'ye. Touos les flieurs mouothitent, l'doue 'tait à sé, l'hèrbe touonit d'vèrt en jaune et pis en brun. P'pée Bichot dêcidit d'bouogi la fanmil'ye ès clios d'ava. I' c'menchitent lus viage dé bouonne heuthe l'matîn, mais auprès tchique temps, l'solé c'menchit à brûler et l'air d'vint surcauffé. Les pouorres biches 'taient bêtôt lâssés, mais il' êpyaient à l'aut' bord d'eune rivièthe des cliosées d'hèrbe à mangi.
Lé P'tchiot, comme autchun aut' êfant, n'tait pon si lâssé qu'ses pathents, et i' couorrit en avanche. Entre les bouais tchi craissaient sus les bords d'la rivièthe, i'viyait un vièr pont en bouais muchi dans l's ombres.
Malheutheusement, en d'ssous du pont d'meuthait eune mannièthe d'criatuthe tchi 'tait si laid qu'même sa méthe n'l'avait janmais aimée. Chu monstre soulait rester là jeu et niet pour mangi les gens et l's annimaux tchi voulaient passer par l'pont.
Lé P'tchiot Bichot sautit sus l'pont et c'menchit à en crouaisi, “Trip, trip,” fit ses pids sus l'bouais. La laide criatuthe s'rêvilyit tout d'siette, sortit d'san creux et dit au P'tchiot, “Ha! Arrêtez-là, ma p'tite biche, pour qu' j' peux vos mangi!” Lé pouôrre P'tchiot 'tait si êffrité par l'appathence du monstre, tchi 'tait couèrt d'pité et tchi puait comme eune mai à feunmyi, tch'i' tremblyiotait d'sa tête jusqu'à la coue, mais ch'tait eune maline biche! Vite comme un êpart d'feu, i'rêponnit au monstre, “N'mé mangiz pon, moussieu - j'sis si p'tit qu' j'n'peux janmais vos satisfaithe. Attendez un p'tit pour ma mêthe, tch'est bein pus grande qu'mé, et tchi vos f'thait un bein miyeu r'pas.”
La criatuthe considéthait ches mots; il avait faim, mais i'viyait qu' ch'n'tait qu'un pouôrre failli p'tit morcé d'bichot. Don, en litchant ses babinnes, i' dêcidit d'laissi l'P'tchiot continnuer san c'mîn et d'attendre l'arrivée d'sa mêthe. Lé P'tchiot 'tait bein heutheu et couôrrit à l'aut' bord d'la rivièthe aussi vite qu'ses p'tites gambes pouorraient li emporter.
V'là don qu'sa mêthe arrivit sus l'pont. “Trap, trap,” fit ses pids. “Ha! Vos v'là à ches dreines!” fit l'monstre. “Ch'est vrai chein qu'vot' P'tchiot m'dit - ou m'f'thait un raide bouan r'pas.” “M-m-m-m-mais, moussieu,” fit M'mée Bichot, “Lé temps a 'té si caud, si sec, qu'not' patuthe est toute morte, et ch'là d'pis eune bouanne pause. Jé n'sis vraiment qu'l'pé et l's os. Ou f'thez bein mus d'attendre man bouanhomme tch'est deux fais pus grand qu'mé.” Lé maudit annima pensit un p'tit, en s'd'mandant si ch'tait mus d'mangi M'mée, tchi n'tait vraiement qu'eune maigre annima, ou d'attendre un r'pas tchi vallait la peine d'en mangi. A la fîn, auve un mio d'regrét, i' laissit la M'mée continnuer à l'aut' bord d'la rivièthe.
P'pée Bichot n'li laissit longtemps à attendre. Il avait 'té à mangi des brîns d'hèrbe tch'i' dêcouvrit ichîn et là dans les prés, mais i'n'y avaient pon assez pour li satisfaithe. Il appraichit l'pont dans un mauvais heunmeu et auve la faim dans sa ventre. Lé monstre sortit d'san creux et l'affaithe r'c'menchit. “Grrr! Vos v'là, P'pée Bichot. Vot' bouannefemme dit la vethité - ou m'f'thez un souverain r'pas! Restez-là, qu'j'vos mangisse!”
Mais P'pée Bichot n'avait pon autcheun întention d'rester là pour être mangi - il avait faim, l'hèrbe 'tait vèrt à l'aut' bord d'la rivièthe, et i'n'avait pon d'peux d'la criatuthe du tout. I' soufflyait deux'trais fais pour cliergi ses nâsilles, i's'ebrayit, ses ièrs touannitent rouoges, i'tappit ses pids d'drièthe dans la poussièthe et pis, i's'elanchit vèrs l'monstre.
En fache d'chutte rêponse, la criatuthe s'ertouonnit pour èrv'nîn dans san creux, mais trop tard! Au même înstant, v'là les cornes à P'pée tchi fitent l'contact auve san tchu, et l'monstre volit comme un ouaisé dans l'air pour au mains chent vèrgues d'vant d'tchaie dans la pus profonde partie d'la rivièthe. P'pée Bichot, hardi content d'san travas, continnuit san c'mîn et trouvit sa fanmil'ye dans un pré où'est qu'i'y avait tout pliein d'hèrbe à mangi, tandis qu' l'monstre - pour vos dithe la vethité, personne n'l'a janmais veue d'pis, mais ….. méfi'ous quand ou vos trouv'thez sus un pont!
Viyiz étout: