'Combein d'pîntes dé sang qu'i'y'a dans le corps à un homme?' mé d'mandit Henri.
Ch'en'tait la eune tchestchion à m'pôser dans l'mitan d'un parti siez ma tante ch't êté. La même chose m'arrivi quand j'tais pus janne, quand not' vaisîn Mess Perchard mé d'mandit combein dé pais dans d'la sausse dé tonmates qu'y'avait dans eune tînne. Je n'comprends pas dutout pouortchi qu'les gens mé pôsent d'itelles tchestchions. Ch'n'est pas comme si j'mé promène auvec eune tinnée d'pais sus l'haut d'ma tête. Enfin, ch'n'est pas tout chenna!
'Combein d'pîntes dé sang qu'i'y'a dans le corps à un homme?' mé r'démandit Henri.
'Mais huite' j'li rêponnis.
Ah nouffait! V'la tchi n'dait pas être correct. Tout l'monde né dévent pas en aver huit pintes. V'la tch'est p'têtre correct si tu-as siex pids d'haut, mais si tu n'as qué chinq pids et un pousse, où'est qu'tout chu sang la peut être. Ch'srai comme êprouver à mettre eune quarte dans eune m'suthe dé pînte.
J'ai cherchi pour tchiquechose au sujet dans les livres à la Bibliothèque Publique, mais j'n'ai pas trouvé rein. Mais j'sis à penser dé donner un coup d' téléphone à l'Hôpita, pour vaie si peuvent m'explytchi tch'est qu'en est.
Si tu donne eune pînte dé sang à l'Hôpita, quand tu-es fînni, i't'donnent eune tâsse dé thée ou d'café ou même du jus d'orange, et i'vos en donnent la même quantité qu'ous ayis siex pids ou chinq pids ieune. S'i vos disent à l'Hôpita qui faut béthe tout pliein duthant la journée pour rempliaichi lé sang qu'ous avez donné: dites-mé, estche qué l'nouvieau breuvage en France qui' s'appelle 'Rouoge Orangina' qu'est fait auvec lé jus du sang d'navet es'sait miyeuthe chose à béthe?
Jé m'rapelle d'aver oui qué Mess Romthi était à l'auberge un sé et qu'il avait veut un homme béthe trais pîntes de biéthe.
Absolument, personne né peuvent pas aver si sé, et personne n'ont pas chutte quantité la dé sang a rempliaichi! Vraiement, j'n'y comprends rien!
ALeP
Viyiz étout: