|
L'aut jour, un vier Seigneur de mes amins
Fit v'nin siez li ses n'veurs et ses couosins,
Pour lus montré une bell' neuv' ratière
Qu'iavait 'tait fait' pour happé les gros rats
Qui font lus nids dans sa casse à contrats.
Il' entrir'nt tous par la porte d'drière,
Et ramontir'nt amont d'viers niers degrés,
Qui, ch'est bein' seux, n'ont jammais tait scrobés!
En tâtonnant i'vir'nt dans un' mansarde
Qui pouvait faire écalé d's' yers à tous!
Pour bein en dir' tout y'était chain d'sus d'sous.
Quand ch'érait 'tait un grand vier corps-de-garde,
Abandonné depis quasi chent ans
Pour servi' de r'traite à touos les cat-huans,
I' n'érait pon peu paraître un brin pière!
Le meuble était abyémé de poussière;
L'plianchais était pus d'à mainqui pouori;
Les fn'êtr's avaient d's'ozaines de papi;
La porte était si p'tit souvent ouverte
Que l's'irangni's l'avaient toute couverte;
Et l'reste s'en allait en perdition
Comm' si ch'eut 'tait une renonchâtion!
II.
Enfin, après qu'i' s'furent touos assis,-
Les uns sur de p'tites rondes scabelles,
Qui n'étaient pon trop nettes ni trop belles,
Les autres dans de viers fauteuils perchis
Qui n'avaient pon l'air d'être fort seuretables,-
La trapp' fut minse entre deux vielles tables,
Pour que chacun pusse la vais d'tout près,
Et dir' s'uou la pouvait bandé sans crainte
D'être sé même happé par les ortés;
Car che serait une terrible étreinte.
Pour le chain qui s'y trouverait pinchi!
Après qu'la trappe eut 'tait examinée,
Et qu'oull' eut 'tait par plusieurs approuvée,
Il y en eut iun qui tout-à-coup se l'vi:
S'dit-i' j'viens d'faire un' grande découverte!
Je m'appercheu qu'la trappe est toute verte;
Or, Aristote affirme pour certain
Que tout ch'qu'est vert n'est jamais bouan à rain;
Je f'rons don mux d'en faire des billettes
Pour nouos cauffé tandis que j'somm's ichin.-
- Chain qu'ou dit's là, dit iun, n'est qu'du gnolin:
Ou n'avez qu'à pâté d'vouos découvertes!
Je n'craindrais guèr' s'i n'y'avait qu'la couleur!
Chain qui m'fait peux, ch'est s'n'énorme grandeur.
Si d'itell's trapp's étaient un' fais bandées,
Toutes nouos poul's s'y trouv'raient attrapées,
Et j'n'érions pus d'oeus à not déjuné!
Par conséquent, je d'vons nouos opposé
Ach'qu'il y'en ait d'bandées sus nos terres. -
- Si je n'étions que des casseurs de pierres,
Se fit un autr', j'sérions hors de dangi;
Mais comme j'avons des ménag's à soigni,
Cheux d'entre nous qui n'ont pon la veue bouanne
Seraient tréjous en risque d'être prins
Quand il' iraient visité lus lapins;
Et j'sis bein seux qu'i n'y'érait pon personne,
Tant cliai qu'i' viss', qui pouorrait empouqui
Un mio d'framment, - pas même un seul quarqui, -
Sans se trouver attrappé, d'quiq' mannière,
Dans les ressorts de l'horrible ratière.
Ch'es discours là remplir'nt tout l'mond' de peux:
I'n'voulaient pas quitter à mangi d's'oeus;
Et nou peut dir' que quant à la pincheure
l'n'l'aiment pon, ch'est une affaire seure!
Après une heur' passée en grand devis
Il y'en eut iun qui se l'vi sus ses pids:-
Couozins, dit-i', si j'ai bouanne mémoire,
l' dait y'avé, dans l'fond d'la vielle armoire,
Deux trapp's qui n'ont pas ocquorre servi;
Si j'les vyions je pouorrions mus jugi
Laquell' des trais est la pus convenable;
Je f'rons don mus d'les mettre sus un' table. -
- S'ou faites ch'la, dit iun d'sus san couossin,
C'hest bien seux qu'ou-z-y perdrez vot' latin!
- Bon! bon! dit l'autre, étudiez vot' grammaire,
Pour nous j'savons fort bain chain qu'i' faut faire.
Ne v'chin les trapp's de qui j'vouos ait pâlé.
J'allons les mettre ichin pour les m'suré.
Comm' nou c'menchait à prendre la mesure
D'iune des trapp's qu'nou-z-a-veue en picture,
Nou ouit un craq - et l'vier plianchais crévi!
Dans un clin gui tout' la pêque s'nalli,
Je n'sais pon ioù, car nou n'en a rveu méche!
I'n'est resté qu'un gros creux à la pliéche!
Quant à cheux qui virent le pataflas,
I' n'restir'nt pas à fair' de longs hanlas!
Dès qu'il' eur'nt veu le creux épouvantable,
Qu'iavait 'tait fait par les trapp's et la table,
I's'encouorir'nt à vau les niers degrés
Comm' si cheut 'tait un flioquet d'ératés!
...............................................
...............................................
Jérôme de l'Ile
|
